TITUT 1 - Ala Ane Wene Ket Mene Warogo Wo'ninapike Wene

Hai wasike wene

¹ Titut naput e. An Paùlùt, Ala atitigeke logolìk, apùnì at en wenaginapike mene inetaùken at oba hìpìrethìlìk were'ma ago warisìgìk, nen, nit at awe a'ma logolìk ebe wene yakùlisìkì lago wene a'nogo tùkùm hogo inelu asuagalùk yakùlisìgìk, uagalùk Yesùt Karìsùt en nayoko hìlìk lakhani wagaike mene a'nogo nen, wene yì helal waganogo hoba lakhei wagì atì.

² At Ala nen, yì mene tì mene oan elalhì'lek logolìk, nit apùnì hesik mel isike: “Apùnì an nen elalinabìk he, inebe ineluk motok logouagalùk, hano hagarinabigin,” ìlùk, abok isike atì, “Apeliak ikerek lek,” ìlùk nina'la eberek logolìk, ebe wene yakùlisìkì lago atì.

³ Yogotak wene atì weinam asusak higit hogoat weinam asuagalùk, at Ala telninapùkwe a'nogo nen, “Hat en wene atì apùnì yogoisìkì logoino,” ìlùk, nayoko hìlìk, noba hesike atì ba ebe weinam arì'logo atì.

⁴ Titut naput e. Hetaùken nit ninom higit hogoat Ala oba hìpìrethìlìk welagen atì ba, an nokawerek naput harat agagin atì. Ninopase Ala ho, ninoe Karìsùt Yesùt telninaperek mene ho, eperak inoabùt hano a'nogo nen, hano mene wokhetìk, hetaùken hapuguthapik, ìkì logouak o.

Apùnì Ala againapùrì aike serisek logouagalùk, inoabùt palogo nen menhisasak ìlùk yogosike wene

⁵ An nen hat o Kereta atoma hagalùk, wesigìlùk ìkì logolìk, wene tì'nogo hagatì logousak ìlùk, hoba hesigi atì: “Yì mene tì mene oan higirethìgì'lek mene, higirethìgìk, o ya ta atoma apùnì Ala againapùrì aike serisek logouagalùk inogogì lopok menhisìgìk, ìkì logoino,” ìlùk, yogohe'lùk wagag'i atì.

⁶ Apùnì Ala againapùrì aike serisek logouagalùk menhisasak atì re, inoabùt he, yì hake mene menhisasak. Apùnì aike nen, “At weak,” ìlùk ùkùm oba hili'lùgì lek mene halok, agwe omakeat waganek mene halok, againapùrì inetaùken Ala oba hìpìrìk welagaikarek mene halok, it aike nen ìkì logolìk, “Ap yì againapùrì inasuk ware'lek yùgùnat hagarì'lùgì atì ninabìt,” ìlùk, abok palì'lùgì lek mene halok, menhousak o.

⁷ Ap Ala againapùrì aike serisek logolìk he, Ala hesigat hagatì logogin atì nen he, it aike nen ùkùm oba hìlì'lùgì lek mene halok, menhousak o. At en he: “It aike ikenem weak. An ìgì nek he, hano,” ìlùk, ikerek lek mene halok, a'mage horok hakoksek lek mene halok, i anggur amusu oba lagolek nikerek lek mene halok, oabùt asialoksek welagarek lek mene halok, “Uang, yì mene tì mene an enek noba logoilep,” ìlùk, akikerek lek mene halok,

⁸ ap pok inokot mene waganem aua hanorogo woginaperek mene halok, hano hagatarek atì mene nek walok akikerek mene halok, etaùken uan mene halok, oabùt higit hogo hagaterek mene halok, ebe Ala hesik tegelek welagarek mene halok, okawerek en asuk warek welagarek mene halok, menhousak o.

⁹ Wene apùnì hanorinaperek wene yakùlisìkì logolìk inasuk hanorogo watìk, at en ebe wene ikenem, it aike nen, at ane sagalogo hagatenem, at en inane elok sagalogo hisìgìk, elogat ìkì logouagalùk, wene nit en yakùlesugumo, eberogoat ìlùk wanhìkesik, oabùt higit hogoat ning hogo hesogo welagarek mene halok menhousak o.

¹⁰ It apùnì aike logolegat ebe wene hologo higit hogo hagatì'lek hagarì'lùgì atì. Atì'nogo hagarì'lùgì atì, inebe hùkokwe re, it Yahuri inogat inekalìma mene palek mene, hano wene wanhukwasik enat he, hobuk ebe wene le'maat, we, tùlemat apùnì inawene mene ìkì logolìk, it aike lalinabì'lùgì atì.

¹¹ Atì'nogo lalinapì logolìk, yì mene tì mene inokawerek en sabùrasak lek mene sabùrùogolùk, yakùlisasak lek meneat yakùlisìkì logolìk, apùnì logolegat inagainapùrì inomat lalinabì'lùgì atì, it inane atì sebelogo pelaksano o.

¹² Apùnì o Kereta mene inokawerek mene aike wene a'la kagauksek yakùlisìkì lagaike mene aike nen, wene mel isike: “It apùnì o Kereta mene yoma inoabùt he, inapeliak iko motok logolìk, wam helo mene oabùt hake. Yabu wanùhùk logolìk, yì mene tì mene siok hogo nahùk inalele weak yì rì!”

¹³ ìlùk, at ane eberogoat isike. Ati nen, it atì inetaùken Ala oba hanorogo hìpìrìk logou hagat logouagalùk inasuk ning hogo watì logoino.

¹⁴ It apùnì Yahuri mene inera nen lìbìlogo wenesuayo wene pìlìngìrì'lùgì mene mel, apùnì aike nen, ebe wene heraksìlìk ina'la nen kagalogo, “Tì'nogo hagatì logousak,” ìlùk inasuk warì'lùgì mene atì mel, wene atì hesogo logoinogo ìlùk, inasuk ning hogoat watì logoino.

¹⁵ Ala nen apùnì aike ina'la hanorinape mene hùgì, it hesik, yì mene tì mene wesa lek. Hano nek o. Atì'nogo meneat he, it aike inetaùken Ala oba hìpìrethìgì'lek logolìk, ina'la akìlì'lùgì mene mel, eberì'lùgì mene mel, weagat werek atì nen, it hesik yì mene tì mene hano lek. Weak enek o.

¹⁶ It atì nen he, “An Ala ebe nelu o,” ìlùk, inane pak hogo ìkì logolìgat he, “Ebe ninokot,” ìlùk, u hak, inasuk ware'legat, Ala a'meilo mene hagatì logolìk, yì mene tì mene hanorogo hagasusak he, mea werek atì.