PILIPI 4 - Ala Ane Wene Ket Mene Warogo Wo'ninapike Wene

Elùgùn oba inasuk wasike wene

¹ Ati nenat, nerùgì nagaiya'lak. Hinebe netawì e. Ninoe Etagepogot hinom hutik ning hogoat logoino. Hit hinoabùt hagatì lagep oba an na'la hai hakìgìk, hogorakìgìk ìkì logolìk, hinoba wìrìk nebe ninom logoilo e, ìlùk, akìkì lagì.

² Ewolia, Sinitike, nerùgì e. Heperagat ninoe Etagepogot hinom hutik logolìk, hinetaùken omakeat mene ebetì logouageip ìlùk yogohisìgì atì.

³ Nen, hat nagaiyak aike Ala eyabu neperak hutik motok hagatì lago a'nogo, it hìmì inebe pìre atì leberisanogolùk yogohetì atì. It hìmì atì ho, ap Kelemen a'nogo ho, it he'nakìt an ninom Ala eyabu omakeat hagatì lago mene amanogo ho, hano wene ninomamerogo ninom yogoisìlìk nìkì lago mene ninetage lopok, at Ala arùesika ba nabùlal-habùlal hagarinabigin mene hugì inetage waganogo hikerek a'nogo ba, waganek werek.

⁴ Halok he, nerùgì nagaiya'lak. Hit ninoe Etagepogot hinom hutik logolìk, ninhùp-nanhùbat hina'la hai hakiko motok logoino. Hobuk nane etenogo yogohisagat: Hina'la hai hakikoat logoino.

⁵ Ninoe Etagepogot a'nogo hepogat wesigin atì nen, apùnì obogat en hit hùthikoagalùk, hinoabùt lìok hogo hagatì logoino.

⁶ Yì mene tì mene hesik wenesùgì uan horo ebetì'lek, obogat hesik Ala ayoko hìkì logolìk hai warogo kìno yogotì logoino.

⁷ Atì'nogo yogotì logogun halok, Karìsùt Yesùt hinom hutik welagasep atì nen, at Ala nen apùnì nen hùthasak lek mene elalinat hinetaùken hapuguthinabìk he, wenesùgì ebetì lagep mene atì, at enat sebelogo hakhisek logogin o.

⁸ Nerùgì nagaiya'lak. Wene elùgùn oba yì aike yogohisak, Hina'la ebetì logolìk he, hanorogo hagatìk, hogorinabusak mene hagatìk, ìlì'lùgì mene oba ebetì logoino. Atì ebe re, wene eberogoat mene oba ebetìk, hogorasusak mene oba ebetìk, higit hogo hagatarek mene oba ebetìk, inoabùt lopoksek logolìk hagatarek mene oba ebetìk, inoabùt heanerogo hagatarek mene oba ebetìk, inoba lìok usak mene oba ebetìk, ebeto motok logoino.

⁹ Wene an nen yogohisikenem hinasuk holhìk, an hagatenem hineileken nììgìk, ìkì logolìk, wene wanhìgisip en yakùlasigip mene a'nogo higit hogoat hagatì logoino. Atì'nogo hagatenem he, Ala ninetaùken hapuguthiaikerek mene a'nogo nen hakhisek logogin o.

Ala againapùrì o Pilipi mene nen Paùlùt: lebethasukwama hai warinapike wene

¹⁰ Hit alep, an noba eberìk lebe'neasigisip en, hobuk noba eberek welagep meneat he, nìkì'nogo lebe'nea heat welagasip en yogotak lebe'neegep atì nen ninoe Etagepogot neperak hutik logolìk na'la hai apik hakìkì lagì.

¹¹ An yì mene tì mene lek halok, werek halok, na'la hano nek logousak ìlùk arat yakùlasìgì atì nen, yì mene tì mene nelageik en kìno yogohisìgì hùk.

¹² An he, inelageik welagaikarek atì neluat, ineilmo seigweak welagaikarek atì neluat. Sùpùrùk nele ba inom, nabìt oba inom, yì mene tì mene apik werek oba, lek oba, atì an walsek nogo nen he, obogat hano nek akìgìrek.

¹³ At Karìsùt en nomame'napo kolek nogo nen he, yì mene tì mene weak aganem inom, hano aganem inom, elok logousak enek.

¹⁴ Elok logousak meneat he, an nelageik were'ma, hit en lebe'neegesep atì hano motok o.

¹⁵ Hit Ala againapùrì o Pilipi mene nerùgì nagaiya'lak. Emakum, an hano wene yogoisìlìk nìkì logoigìlùk, o Maketonia nen waganem he, Ala againapùrì o he'nakìt en lebe'nììkì lagaukwa lek meneat he, hit enek ninom hutik logolìk, lebe'niikenem helìkì lagagi atì hineluat o.

¹⁶ An o Tesalonika a'loma yì mene tì mene nelageik were'ma, ebe alep aike la'nesi wagagisip he, hobuk aike la'nesi wagagip atì.

¹⁷ Mene re, atì'nogo lebe'nììkì lagep meneat he, la'nesi waganem wanhì logousak atì hesik esinethìkì lagì hùk. We, hit oko sabùra hak he, Ala nen ebe mene wokhisikenem hit ese asuageip ìlùk esinethìkì lagì o.

¹⁸ Yogotak he, hit lebe'neegepma, helìgìrik, an obogat walok akìkì lagì mene elok agasik ato titelagaat o. Ap Epaporolìtùt oba hegepma wo'nesi wagama nen, neilmo werek aga. Hit en an lebe'neegep atì re, wam Ala hesik warogo etu loletì logolìk obasi hano mene lìagatenem, at a'la hano agarek hak, atì'nogo lebe'neegepma, at Ala a'la hano aga o.

¹⁹ Nen, hit yì mene tì mene hinelageik were'ma, an nopase Ala hogoratìrek mene Karìsùt Yesùt eperak hutik logolìk eilmo seigweak en hogoratarek mene a'nogo nen, wokhisikenem hineilmo seik asiginat o.

²⁰ Halok he, ninopase Ala hogorato motok logouok, ìlùk, “Amin,” ìgì atì.

Paùlùt en wene elùgùn warogo hai warinapike wene

²¹ Hit Ala againapùrì Karìsùt Yesùt hinom hutik welagasep mene hinebe lopok obogat hai wathinapì o. Halok, it aike yogoisano. Ati hak, an nerùgì nagaiya'lak Ala againapùrì ninom welago mene yoma aike nen hai wathinapaat o.

²² It Ala againapùrì o yoma welago mene obogat lapuk hogo nen hai wathinapaat o. Hai atì'nogo wathinapi logolìk, ebe esin hake re, it at kain Kaisat inom welagaikarek mene nen hai wathinapa o.

²³ Halok he, nerùgì nagaiya'lak. Ninoe Etagepogot Yesùt Karìsùt oabùt hano mene a'nogo nen hinetaùkenma logolìk sethisek logouak o.