PILIPI 3 - Ala Ane Wene Ket Mene Warogo Wo'ninapike Wene

“Alep hagatì lagagi atì, nong aga lagagimo, ìlùk, hobuk ket mene hagatì lagì,” isike wene

¹ Nerùgì nagaiya'lak. Wene ato yogohisak en he, ninoe Etagepogot hinom hutik logolìk, hina'la hai hakìkì logoino, ìgì atì. It aike nen weagathinapì'lek hinebe hano logouageip ìlùk, wene alep helal waganogo lakhei wagagi meneat, nape ale agì'lek hobuk nane etenogo yogohisegeinat o.

² It apùnì aike inoabùt yeke lo yeke oabùt hake atì nen, yì hesik tì hesik weak hagatì logolìk, “Hinogat hinekalìma mene palogo laksano,” ìlùk hina'la kagali wesinogo nen hinepe hebelogo logoino.

³ Nit he, ninogat ninekalìma mene arat palek logou hak, ebe meneat hagatì lago. Ala Areagùn nen nina'la kagalho kolek, Ala ebe hogoratìk, Karìsùt Yesùt ninom hutik welago, ìlùk, hogorakìgìk, ìkì logolìk he, yì wene tì wene ninogat etakwe yì hesik hagatorek atì ba hano'ninabigin ìlùk akìkì lago lek.

⁴ Ninogat etakwe yì hesik hagatorek atì ba hano'ninabigin ìlùk akasak higit logoilepma re, it apùnì aike nen mea negen akiko kolek, an enek he, esin negen akìkì logoile.

⁵ An nebe ta'lagagimo ineki 7 nen welagaukwasik en, ineki aike ba, nogat nekalìma mene palnapukwa atì. Nebe Isirael mene, nùkùl etage Penyamin meneat, nagosa nopase Yahuri mene nogo nen he, nebe Yahuri ebe Yahuri meneat ta'lagagi atì. Wene Ala nen ninasuk wasike wene a'nogo hesik, ap Parisi mene nen hesogo welagaikarek hak, ning hogoat hesogo welagagi mene.

⁶ Ala hesik akiluk hogo hagatarek mene atì, an atì'nogoat hano hagatì lagì salek, Ala againapùrì inetaùken Yesùt oba hìpìrethesukwa mene yì aik tì aik hagarinabìk nìkì lagagi atì. Atì'nogo hagatì logolìk, wene Ala nen ninasuk wasike wene a'nogo higit hogo hagatarek atì, an motok higit hogo hagatenem, apùnì aike nen ùkùm noba housak legat tegelek motok welagagi

⁷ An alep, atì'nogo hagatì logolìk, “Sabùrìkì lagì,” ìlùk akasìgì meneat he, yogotak he, Karìsùt ebe wanhìrik oba nen, “Alep hagatì lagagi atì, nong aga lagagimo hìgì,” ìlùk huthìkì lagì.

^8-9 Atì'nogo huthìkì lagì atì nek hùk. Noe Etagepogot Yesùt Karìsùt nelu agagi atì hano motogat o. Yì mene tì mene hùnogo mene hagatì lagagi atì, nong asigin mene hagatì lagagimo ìlùk, hùthìkì lagìat o. At ebe helìlìk he, neperak hutik motok logouogolùk, yabu aleke tegelogo wulaksagarek hak, yì mene tì mene alep hagatì lagagi mene atì, “We meneat,” ìlùk heraksasigi atì. Wene Ala nen ninasuk wasike wene atì ba, nokawerek en higit hagatì lagì hùk. It apùnì aike inetaùken Karìsùt oba hìpìrethikenem, ùkùm inoba mene korogo wokhìlìk hobuk Ala inom hùnogo hisikerek hak, an atì'nogoat netaùken at oba hìpìrethesìgìmo, ùkùm noba welagaike mene korogo wokhasike atì.

^10-11 At Karìsùt yì aik tì aik hìlìk hìlìk wa'lagaike hak, neperak higit hogoat, an atì'nogoat aik hìlìk hìlìk, wa'lasusagat akìkì lagì. Ma re, at wa'lagaikesi'mo, Ala omame ba eluguthesike hak, an atì'nogoat wa'lari'mo, nelugu'nabìgìn, ìlùk, oba eberegat welagì.

“An helagalùk akìgì mene atì hela lagalùk nomamerogo laga lagì,” yogoisasike wene

¹² Mene re, an yogotak ya, netaùken motok wurik agìk, ebe hano mene atì arat helìgìk, ìgì hùk. Oan o. Hano mene atì an heloagalùk, Yesùt Karìsùt en nebe wo'napike atì nen, ebe hela lagalùk, nomamerogo hagatì lagì.

¹³ Nerùgì hagaiya'lak. An atì ebe arat helìgì ìlùk na'la akìkì lagì legat.

¹⁴ Atì hela lagalùk wene omakeat mene yìat hagatì lagì. Atì ebe re, alep hagatì lagagi mene, nepe hebelarìk, napotma heraksalùk he, hobuk ket mene nelokoma werek mene atì hela lagalùk nomamerogo musok laga lagì. Karìsùt Yesùt neperak hutik were'ma, at Ala nen nayoko hìkì logolìk he, “Hano mene pogot oba mene wokhesigin,” ìlùk abok yogonesikomo, ebe hela lagalùk, sa awewerek sa awewerek humusek lagaikarek hak, nomamerogo musok laga lagì.

¹⁵ Halok he, nit ninetaùken wurik mene yì re, wene atì hesik hùthìkì logouok. Atì'nogo meneat he, hit hinetaùken wene welek mene oba ebetì lagep halok he, hùthoagalùk at Ala nen tùkùm hogo yogohisegeinat o.

¹⁶ Meneat he, yogotak ninoabùt wene atì higit hogo hagarìk waga lago hagat, atì'nogoat motok hagarìk laga logouok o.

¹⁷ Nerùgì nagaiya'lak. Hit hinoabùt an hagatì lagì hak, noabùt waganogo, atì'nogoat hagatì logolìk, it apùnì aike nen nit ninoabùt waganogo hagarì'lùgi mene atì, hineileken woginapì logoino.

¹⁸ An alep he, neki hobugalep yogohisasigi hagat, yogotak nane etenogo yogohisagat. Apùnì inebe logolegat en, “Karìsùt nit hesik e ba menhìlìk wasukwa a'nogo, ninabìt,” ìlùk inom weim palek negen logolìk inoabùt kolo hagarì'lùgì mene atì hesik inouak le aga logolìk yogohisìkì lagì.

¹⁹ It atì inetaùken Ala oba hìpìrìk logousak meneat he, inoba aiyage lagalìk hagatarek atì mene ba hìpìrìk logolìk inekalì hasak meneat he, hano salek atì hesigat inekalì lek hogorakìlì'lùgì atì. Atì'nogo hagatì logolìk he, inetaùken yì walok tì walok, wene kweangma mene oba eberì'lùgì atì, elùgùn oba arat nong asugun o.

²⁰ Atì'nogo meneat he, nit ninawì ero pogot oba werek o. Ninawì eroma atoma nen, ninoe Etagepogot Yesùt Karìsùt hobuk telninabi wesigin atì serogo welago.

²¹ At ebe wìrìk he, ninebe ninekalì negen welago yì re, at omame ba yì mene tì mene obogat, at awe a'ma hisegein atì nen, at ebe hogoratarek hagat, nit ninebe hogo'ninabusak meneat hagarogo hinegein o.