PILIPI 2 - Ala Ane Wene Ket Mene Warogo Wo'ninapike Wene

“At Karìsùt okawerek hesik sebirakìgì'lek hagatì lagaike hak, hit atì'nogo haagatì logoino,” ìlùk yogoisasike wene

¹ Nit Karìsùt ninom hutik logolìk, at en ninetaùken ago wa'nisìgìk, ninebe etawìrogo ninetaùken sebelhìk, Areagùn ninom hutik logolìk, lebe'nisìgìk, iko kolek nit-nit agìrogo netawì-hetawìrogo hagatorek atì nen,

² an na'la hùkorogo hai hakìkì logoik en, hinetaùken omakeat logoino. Atì'nogo logolìk hit-hit netawì-hetawìrogo omakeat mene hagatìk, hinoabùt hinetaùken omakeat welagìk, ìkì logoino o.

³ Yì mene ti mene hagasuogolùk, hina'la nen he, “An enek hanorogo hagatì logogin,” ìlùk, hinokawerek en agauk hogo hagatì logogùp o. Hina'la nen hogorakìgì'legat, “It aike hano. An he, mea,” ìlùk, akìkì logoino.

⁴ Atì'nogo akìkì logolìk he, hinebe lopok hinokawerek hesik enek oba ebetì logogùp. It apùnì aike hesik inomat inoba ebetì logoino.

⁵ Hinoabùt he, at Karìsùt Yesùt en a'la ebetì lagaike hagat ebetì logoino o.

⁶ At ebe re, Ala meneat logolìk, a'la nen he, “An Ala neperak higit hogo welagì yì, yì hagat motok logogin,” ìlùk akìgì'lek,

⁷ okawerek eram enat heraksìlìk, nit apùnì ninom higit agaikesik he, ebe ninatitigeke negenat agaike atì.

⁸ At okawerek en etage legethakìlìk, “An noabùt he, nopase nen, Wa'lasuak, ìlùk, akike higit hogoat ane hologo logogin,” ìlùk, ebe e ba menhìlìk wasuagalùgat akasike atì.

⁹ Atì'nogo akasike atì nen, ebe Ala nenat esinethesike. Esinethìlìk he, it aike inetage a'ma negen werek kolek, at enek he, Etagepogot ìlùk esin meneat salhesike atì.

¹⁰ It pogot oba mene mel, kweangma mene mel, a'ma baga mene mel, obogat at Yesùt hogoratì logolìk, ineitep awì yagasogo inebe lopok, at awe a'ma kugun atì.

¹¹ Atì'nogo kìlìk, inape ba lopok ninopase Ala hogoratì logolìk he, “Ninoe Etagepogot Yesùt Karìsùt atìat o,” ìlùk, pak hogo ugunat atì.

“Hit apùnì kweangma mene ina'lakwe logolìk lìarinapì logoino,” ìlùk yogoisasike wene

^12-13 Nerùgì nagaiya'lak. Hinebe netawì e. An ninom logolìk, nane ninhùp-nanhùbat ikenem hologo hagatì lagagip atì hagat, an yogotak nebe walegat werek kolek, nane atìat esinethìlìk he, hologo motok hagatì logoino. At Ala nen, hit en hagatì logouageip ìlùk, hina'la kagalogo hagathinapenem, hit hina'la nen he, “Ì, nit atì'nogo hagatì logou walok,” ìlùk ìlìk, Ala a'la walok mene hagatì lagep atì nen, at ebe hinayùk hogo hinoagelekwe lei'-leik ìkì logolìk, “At en telninabigin,” ìlùk atì hesigat hagato motok logoino.

^14-15 Hit en he, at Ala eilhanem ùkùm hinoba legat, nen, weak mene hina'la legat logouogolùk halok he, hinebe Ala againapùrì weak hagatì'lek tegelek motok logolìk, o mùm were'ma hesagal en lìathikerek hak, apùnì yoma inoabùt kolo weak hagatarek mene ina'lakwe lìarogo logolìk, yì mene tì mene hagatì logolìk, “Ninabìt,” ìlùk yìarek-puarek hagatì'legat, wene palhi'legat, hagatì logoino.

¹⁶ Atì'nogo hagatì logolìk, yì mene tì mene sùpùrogo wogisùogolùk ìnùgisagarek hak, wene apùnì inebe inelugurinaperek wene atì yogoisìlìk nìkì logoino. Atì'nogo yogoisìkì logogun halok, at Karìsùt wesigin atì sat, an nen, “Mep lagai'-lagak hogo nomamerogoat hagatì lagagi mene atì we tùlemat alemarogo hagatì'lek. We, Karìsùt hesik elok hagarogo hisìgìma,” ìlùk nalong asìgìn atì.

¹⁷ Mene re, apùnì nen wam topa wam Ala hisìlìk, warogo lolesuogolùk, opoloba eken amusu pelaparek hak, hit hinetaùken Ala oba hìpìrethìlìk wogotenem, opoloba apùnì nen an nebe warogo namep pelapa halok, an na'la hai hakikenem hit obogat hina'la hai hakasagat o.

¹⁸ Atì'nogoat, hit hina'la hai hakikenem, an na'la hai hùkasagat o.

Wene at Timotìùt hesik inom, Epaporolìtùt hesik inom, yogoisasike wene

¹⁹ Hit aroma hagatì lagep mene hesik, hinabok an nelu arìk na'la hano asuagalùk, netaùken ninoe Etagepogot Yesùt oba hìpìrìk were'ma, at en lebe'niikerek atì ba, at Timotìùt a'nogo hepogat hinoba lakhei wesigìlùk akìkì lagì.

²⁰ It apùnì aike yoma inoabùt hùnogoat hake werek kolek, at Timotìùt aligat oabùt an noabùt hake logolìk, hit hinebe etawìrogo hinoba eberogoat eberek welagarek.

²¹ At atì'nogo werek kolek, it apùnì atì inebe obogat enek he, Yesùt Karìsùt hesik hagatì'lek logolìk, inokawerek hesik esinethìlìk hagarì'lùgì o.

²² Mene re, at Timotìùt oabùt enagat hagaterek a'nogo hinelu. Inagainapùrì nen inopaselak leberisagarek hak, at ebe re, Ala awe a'ma logolìk an lebe'neagalùk hano wene a'nogo neperak en yogoisìlìk nìkì lagosik.

²³ An haga'nabugun mene wene ebe sekek hogo nelu agì halok he, at ebe hepok hit hinoba lakhei wesigin, ìlùk akìkì lagì.

²⁴ At ebe lakhei wìrìk he, an netaùken ninoe Etagepogot oba hìpìrìk welagì atì ba, at en lebe'niikenem he, nebeat hepok wesigin ìlùk akìkì lagì.

²⁵ At ninagaiyak Epaporolìtùt an Ala hesik naligat en hagasusak mea were'ma, lebe'neoagalùk noba lakhei wagagipmo re, weim yapì logolìk ning hogo yaparek hak, neperak Ala hesik ning hogo hagatì lagosik he, hobuk apotkwe hinoba lakhei wesigin akìkì lagìat o.

²⁶ At a'la akìkì logolìk, “An noba ou wanhìgi a'nogo, nabok it inasuk holhasik, nìkì'nogo hagarì'lùgì,” ìlùk, wenesùgì uan horo ebetì logolìk, “It obogat inoba legein,” ìlùk akìlì'logo.

²⁷ Ebe re, ou wanhì logolìk wa'la'lep meneat he, an na'la weak werek kolek wa'la'lepma re, hobuk na'la motok weagat asinogo ìlùk, Ala nen at etawiat, nen, an nebe etawiat, logolìk, hanothesikomo ebe se agasik werek atì o.

²⁸ At ebe hobuk hinoba waganem hineileken hìlìk he, hit hina'la hai hakìgìk, an na'la weak welagì mene hano agìk, uok en ìlùk he, hepogat hinoba lakhei wagì atì o.

^29-30 At ebe waganem he, ninoe Etagepogot hinom hutik logolìk he, hina'la hai hakìkì logolìk at ebe wanino. Hit en nìkì'nogo lebe'nea heat atì nen, hinobùlù'mo at en lebe'neagalùk he, “Nebe wa'lagì halok hanoat o,” ìlùk, Karìsùt hesik hagatì logolìk wa'la'lep mene atì. It apùnì aike inoabùt at hagaterek hak hagarì'lùgì mene halok hinane agauk hogo yogoisìkì logoino o.