PILIPI 1 - Ala Ane Wene Ket Mene Warogo Wo'ninapike Wene

Hai warinapike wene

¹ Hit Ala againapùrì Karìsùt Yesùt hinom hutik logolìk, o Pilipi welagasep mene, hinebe obogat mel, hakhisek welagaikarek mene mel, lebethisagarek mene mel, nerùgì nagaiya'lak. An Paùlùt Timotìùt neperak en Karisùt atitigeke logolìk wene helal waganogo hinoba lakhei wago atì.

² Ninopase Ala, ninoe Etagepogot Yesùt Karisùt eperak inoabùt hano a'nogo nen hano mene wokhisìgìk, hinetaùken hapuguthinapìk, ìkì logouak o.

Ala againapùrì o Pilipi mene hesik, Ala hai watìk, ayoko hìgìk, isike wene

³ An he, ninhùp-nanhùbat hit hinoba motok eberek logolìk, nopase Ala at hai watì lagì.

^4-5 Hit emakum wene wanhìgip atì hùlì nen, yogotak hùlì, an nen hano wene apùnì aike yogoisìlìk nìkì logouagalùk lebe'niiko motok welagasep atì nen, ninhùp-nanhùbat na'la hairogo hit obogat hesik sapan ìkì logolìk, Ala ayoko hìgìk, hai watìk, ìkì lagì.

⁶ At Ala nen hit hano hagathinabigìlùk, emakum eki hakhikasikesik he, hano hagathinapì logopik en, hùlì at Yesùt Karìsùt wesigin atì like o eil hotologo wutarek hak, hano hagathinabi wesigin atì eberogoat ìlùk, netaùken hapuk hogo welagì.

⁷ Ala oabùt hano nen nayoko hesikomo re, an neki hele warek welagìk, neki hele oan watì'le'ma hano wene elelerogo ning hogo hagatìk, ìkì lagì hak, hit obogat atì'nogoat ninom hagatì logouagalùk hinayoko hesikeat atì nen, hit hinebe netaùken hutik welagì o. Atì nen he, an nen hit obogat hesik, “Yesùt eberogoat hagathinabi wesigin,” ìlùk akasak mene higit hogoat akìkì lagì.

⁸ Yesùt Karìsùt en hit hinebe obogat etawì welagarek hak, an nen hit netawìat logolìk he “Nimom logoilo e,” ilùk, na'la eberogoat akìkì lagì mene atì, at Ala elu o.

⁹ An nen sapan hit hesik ìkì logolìk, mel ìkì lagì: “Yì mene tì mene awì yatenem ero hùko arìk wùlùperek hak, hit ebe wene tùkùm hogo hinelu agìk, hùthìgìk, ìkì logolìk, apùnì inebe hinetawìrogo welagep atì mene hùkorogoat hinetawìrinapì logouageip en,” ìlùk, sapan ìkì lagìat o.

¹⁰ Hit atì'nogo hùthìlìk hagatì logogun halok, hina'la nen he, “Yì hano. Hagasusak mene,” ìgìk, “Atì weak. Hagasusak lek mene,” ìgìk, hùthìkì logogun atì. Atì'nogo hagasugun halok, Karìsùt wesigin atì like, ùkùm hinoba lek hogoat, hano tegelek were'ma wesigin atì.

¹¹ Yì mene tì mene awì yatenem ero hùko arìk eken ìterek hak, at Yesùt Karisùt en hagathinapì logogin oba, hinoabùt higit hogo hagato motok aike inomat hagatì logogun halok, at ebe waganem he, apùnì aike nen Ala hai watìk, hogoratìk, ugun o.

Paùlùt eki hele warek werek kolek, hano wene hùko agaike wene

¹² Nerùgì nagaiya'lak. Wene yì hinelùrogo yogohisak. An yì'nogo haga'napa yì ba re, hano wene lek agì'lek hùkoat arìk lìlì'logo.

¹³ An Paùlùt Karìsùt hesigat neki hele watama, welagì yì ba re, it ap at Kaisat etagepogot aua kìnogo ìlùk, kwe ba kagalek welagaikarek mene obogat mel, it apùnì aike yoma mene obogat mel en he, enagat hùthanì'lùgì.

¹⁴ An neki hele warogo hanhama welagì yì nen, Ala againapùrì aike inebe hùkokwe inetaùken ninoe Etagepogot oba hìpìrethìlìk wurik arìk he, wene Karìsùt hesik inane ba pak hogo yogoisìkì logousak inayù'lek arì'logo atì.

¹⁵ It atì o'moko nen ina'la kolo arìk he, an noba ua palhì logolìgat, yogoisìlì'lùgì atì. Meneat he, it o'moko nen ina'la hano logolìk he.

¹⁶ “At Ala nen Paùlùt ayoko hìkì logolìk he, Apùnì nen hano wene atì eberogoat ìlùk akoagalùk pak hogo yogoisìkì logoino, ìlùk ayoko hesikomo hìkì lago,” ìlùk, enagat hùthanìlìk nebe inetawì nen wene at Karìsùt hesik yogoisìlì'lùgì atì.

¹⁷ Meneat he, it o'moko ua palì'lùgì mene atì nen, wene Karìsùt hesik yogoisìlì'lùgì atì, inetaùken omakeat logolìk yogoisìlì'lùgìi hùk. We, ina'la nen he, “Paùlùt eki hele warek werek atì, ebe weak asuak,” ìlùk, inokawerek inetage hùko asuagalùgat yogoisìlì'lùgì atì.

^18-19 Mene re, it aike nen inetaùken pìre logolìk yogoisìgìk, it aike nen inetaùken omakeat logolìk yogoisìgìk, ìlì'lùgì meneat he, wene Karìsùt hesigat yogoisìlì'lùgì halok, yùgùnat. Na'la hai hakìkì lagì. Yì'nogo haga'napo were'ma, hit en sapan an hesik ìkì logoumo re, Yesùt Karìsùt Areagùn nen an lebe'niiko kolek, Ala nen telnabigin ìlùk an nelu logolìgat, na'la hai hakìkì logoginat o.

²⁰ An na'la nen he, wene Karìsùt hesik u nekalì agì'lek yogoisìkì logousak namolo. Halok, nekalì agì'lek yogoisìkì logogin o, ìlùk, hùthìlìk na'la hano welagì. Ninhùp-nanhùbat pak hogoat yogoisìgìrek hak, yogotak atì'nogoat yogoisagalùgat welagì. Nebe neluk logoumo hanoat. Nen, wa'lasumo hanoat. An atì'nogo haga'napo kolek, nebe abirekeat Karìsùt hesik hagatì lagì atì ba, apùnì nen Karìsùt hogorasuagalùgat welagì.

²¹ Atì'nogo welagì atì nen, na'la nen he, nebe neluk welagìrek atì, Karìsùt hesigat. Nen, wa'laganem he, hano mene sabùregein atì.

²² Nebe kweangma yoma neluk logolìk Ala eyabu hobuk hùkorogo hagasusak welagì atì nen, neluk logousak he a? Wa'lasusak he a. Kì mene aigerasik he, nokot arì'logo.

²³ An hagasusak mene wene pìre werek atì nen, netaùken pìre arì'logo. An wa'larìk he, Karìsùt neperak logoumo hano. Ebe hano motok atìat o.

²⁴ Meneat he, an hit hesik kweangma yoma logousak hanoat o.

²⁵ An wene atì hesik hùthìlìk, logogin, ìlùk nelu o. Hit hinetaùken Ala Oba hìpìrìk logolìk, wurik agìk, hina'la hai hakìgìk, ìkì logouageip en he, hit hinebe obogat ninom logogunat o.

²⁶ Logouogolùk, an hobuk hinoba wesumo re, hit Karìsùt Yesùt hinom hutik logolìk hina'la nen he, “Paùlùt ninom welago,” ìlùk, an hesik hinalong arìk hina'la hai apik hakogoin atì.

Paùlùt en, “Weim yapì logolìk ning hogo yaparek hak, hano wene hesik, ning hogo hagatì logoino,” ìlùk yogoisasike wene

²⁷ Wene hano wene Karìsùt en hagasike wene a'nogo ba, “Apùnì yì'nogo hagatì logoino, tì'nogo hagatì logoino,” ìlùk yogohisagarek meneat hagatì logoino. Atì'nogo hagatì logolìk, hinebe lapuk hogo hagatì logoumo, it apùnì aike nen hinabok ìkì logolìk he, “It inoabùt he, hano wene yogoisikenem holì'lùgì higit hogoat inetaùken Ala oba hìpìrethìlìk ning hogo metek werek o,” ìlùk, an nebe walegat were'ma yogonesugun he a? Hinoba wìrìk neileken hisegein he a. Wene hano wene yogohisogorek hak, hinom lapuk hogo logolìk, weim yapì logolìk ning hogo yaparek hak, wene atì hesik ning hogo hagatì logoino.

²⁸ It aike nen he, “Wene atì ninabìt,” ìlùk, iko kolegat he, hit enek he, hinayùk agì'lek ning hogo motok hesogo logoino. Atì'nogo hesogo logogun atì ba, it atì nong asugun ìlùk enagat haga'lagìk, hit telhinabìgìn ìlùk enagat haga'lagìk, Ala nenat hagasigin werek o.

²⁹ At Ala oabùt hano nen, hit hinetaùken Karìsùt oba hipìrethouagalùk enek hinayoko hesike hùk. Lek o. At hesik yì aik tì aik hìkì logouagalùk hinayoko hesikeat o.

³⁰ An alep he, weim yapì logolìk ning hogo yaparek hak, hano wane hesik ning hogo hagatenem hineileken neasigibat. Nen, yogatak nabok holhì lagebat. Atì mene, hit ninom lapuk hogo hagatì lagoat atì.