PILEMON 1 - Ala Ane Wene Ket Mene Warogo Wo'ninapike WeneHai warinapike wene 1-2 Pilemon nagaiyak e. Nagaiyak neperak Karìsùt hesik hagatorek mene hebe netawì e. An Paùlùt, Karìsùt Yesùt hesik neki hele warogo hanhama welagì mene a'nogo, ninagot Timotìùt neperak en, hat hebe mel, Ala againapùrì aike hat haua atogotarek mene mel, ninerei Apia mel, ninagot Arekìpùtt, weim yaparek hak, Ala hesik ninom ninomamerogo hagatì lago mene a'nogo mel, wene yì helal waganogo hinoba lakhei wago atì. 3 Nerùgì nagaiya'lak. Ninopase Ala mel, ninoe Etagepogot Yesùt Karìsùt mel, eperak inoabùt hano a'nogo nen hano mene wokhisìgìk, hinetaùken hapuguthinapìk, ìkì logouak o. Pilemon oabùt hagatì lagaike mene hesik, Ala hai wasike wene 4-5 Hat hetaùken ninoe Etagepogot Yesùt oba hìpìrethìlìk, Ala againapùrì aike obogat hetawìrinapetek atì habok nasuk holhìrìk he, sapan ninhùp-nanhùp ìkì logolìk, hat hetage ìlìk nopase Ala hai watì lagì o. 6 Nit ninetaùken Ala oba hìpìrethìlìk, ninerùgì ninagaiya'lak Ala againapùrì aike inom, Karìsùt ninom hutik were'ma, at en yì mene tì mene hano mene wo'nisikenem hùthogorek mene atì, hobuk hùkorogo hùthùogolùk Ala ayoko hìkì lagì. 7 Pilemon nagaiyak e. Hat en apùnì Ala againapùrì mene aike obogat hetawìrinapì logolìk he, ina'la hanorinapetek atì nen, an Ala hesik hagatì logouagalùk netaùken ago wathanhì lagenma na'la hai apik hakìkì lagì o. At Onesimùt Pilemon nen ebe wanuagalùk yogosike wene 8 Hat atì'nogo hagatetek atì nen, neperak Karìsùt ninom hutik logolìk, at hesik hagatoresi'mo re, an nen be, “At nagaiyak neperak,” ìlùk, nekali legat, “Tì'nogo haga'no,” ìlùk, nane uarek yogohesusak elok meneat he, 9 an Paùlùt yogotak nebe arat yaman agarìk were'ma, Karìsùt Yesùt hesik neki hele warogo hanhama welagì. Atì'nogo logolìk, hat netawìrogo welagìrek atì nen, nane lìok hogo hoba aike kìno yogohesik. 10 Ati re, an neki hele warek logolìk, at Onesìmùt etaùken Karìsùt oba hìpìrethike atì nen, ebe naput hake haga'lagìk, an nebe at opase hake haga'lagìk, ogosik en, at ebe waninogolùk yogohetìi o. 11 At alebat he, hat hesik hanorogo hagasusak mea negen welagaike meneat he, yogotak hat hesik enek hùk. An neperagat hesik hanorogo haga'nisìkì logogin mene elogat werek o. 12 Ati nen, at ebe an netaùken tùlem mene apotkwe hoba lakhei wagì atì o. 13 An hano wene yogoisìlìk nìgìrek atì hesik neki hele warogo hanhama werek kolek, hat en lebe'nììkì logou hak, hobùlù'mo at en lebe'nììkì logouagalùk ebe hakhousak meneat he, 14 hat en, “Ì o, hano. Heperak logoino,” ìlùk yogonetì'le'ma, an nen nabusak wene aike usak mea o. We, an na'la walok he, hat at ebe esewerek mene hetaùken nenat inogolùk, lakhei wagì atì o. Mene re, hat ha'la nen, “Nabìt,” akiko kolegat, an nen nane ning hogo yogohesusak he, nabìt o. 15 At Onesìmùt hat herakhagalùk Wùlìpike atì re, we, heki elama hesik logopik en, hobuk heperak motok logouogolùk waniginmo, at Ala a'la akasike ba haga'larì'logo akìgì. 16 At hobuk hat heperak logogun atì, ebe hatitigeke logolìk, hat hesik hagatì logogin meneat he, atì nek hùk. At he, at ebe Ala aput agasik ninagaiyak ninetawì meneat logogin atì. At en he, an netawì meneat logolìk, an hesik hano motok hagarì'logo atì, hamùlùgat o. Hat hesik enek he, at ebe kweangma hatitigeke logolìk, hagaiyak heperak ninoe Etagepogot hinom hutik logogun atì nen, ebenageik hetaùken tùlem motok logogin o. 17 Ati nen, hat en he, “Paùlùt ebe an nagaiyak neperak hutik welago mene,” ìlùk, akìkì lagen atì, Onesimùt apotkwe hoba lakhei wagì atì, an nebe hoba waganem wo'nabu hak, at ebe atì'nogoat apotkwe wanino. 18 At en kolo aike hagathapikomo, nomat oba hegenma palegeke werek halok he, nomat obogat an noba heino o. 19 An Paùlùt atì'nogo nomat noba welagì, ìlùk obogat atì oko paligin mene nokawerek neki nen helal wanhì atì o. An nen, hat hano wene yakùlhesigimo hokawerek hebe hesik hano mene ese agatik welagen atì, nomat hoba hìgìma palegeke hoba werek ìlùk yogohesusak meneat he, an atì'nogo usak he, lek. Hokawerek heluat o. 20 Ati halok nagaiyak e. Ninoe Etagepogot ninom hutik logolìk an na'la hai hakoagalùk, hat en an lebe'nea hak, at ebe atì hanorogo wanino. 21 Wene an nen yogohetì mene atì hat en hasuk hologo hagasiginat hìgì, ìlùk, na'la akìgìrìk en he, wene yì helal waganogo hoba lakhei wagì atì o. An nen, “Ebe wanino,” ìlùk, yogohetì mene atì, hat en atì'nogo hagatì logolìk hano mene aike inom hagasiginat hìgì, ìlùk, an neluat o. 22 Hit obogat en an hesik sapan Ala ayoko hìkì lagep atì nen, at en hobuk neki hele hikalogo wulakhanìk, hinoba wo'narek wesigin akìkì lagì. Halok he, an hobuk hinoba wìrìk nogo usak hesik, hat haua atoma o hùlù aike tegelogo hanìlìk logoino. Wene elùgùn warogo hobuk hai warinapike wene 23 At Epaperat neperak Karisùt Yesùt hesik hagatì lago atì nen, nineki hele warogo hinagama welago mene a'nogo nen hai wathape o. 24 Nen, an nagaiya'lak Karìsùt hesik hagatì lago mene, Marekùt mel, Arisitarekùt mel, Temat mel, Lukat mel, inebe obogat en hai wathapaat o. 25 Ninoe Etagepogot Yesùt Karìsùt oabùt hano a'nogo nen ebe hit obogat hinetaùkenma logolìk sethisek logouak o. |
@LAI 2013
Indonesian Bible Society