MATÌÙT 28 - Ala Ane Wene Ket Mene Warogo Wo'ninapike Wene

Yesùt ebe eluk agaike wene

¹ Atì'nogo hagasukwasik ineki sabìt oba welegat welagaukwasik en, hùen hari Minggu ba, o hìl lakhei waga kolek, at he Marìa aua Maktala mene a'nogo mel, he Marìa aike a'nogo mel, Yesùt warek hesukwa ba ineileken hùogolùk wagaukwa.

² Waga kolek aremnogoat he, lugul hùkoat langathiko kolek malaikat Ala nen pogot oba nen yoko pelaksa wagarek mene aike pi wagaikesik, kwe helep mene te'mek hogo yagasukwa a'nogo lekalogo lakhìlìk he oba hù'lagaike.

³ At malaikat a'nogo elokoken he, eilabùt hake hagatì logon he, asu laberek mene elokoken hìrìnakùp hake motok yararathesike.

⁴ Atì'nogo hagasikomo re, it ap kagalek welagaukwa mene amanogo inayùk en inoagelekwe lei'-leik ìkì logolìk he, apùnì warek mene hake motok lìangorogo haga'lagaukwa.

⁵ Nen, at malaikat a'nogo nen it hìmì amanogo yogoisìkì logolìk he, “Hinayùk agùp o. Hit he, Yesùt e ba menhìlìk wata a'nogo hineileken hùogolùk wagep atì, an nelu o.

⁶ Mene re, ebe yoma lek. At en yogohisasike hak, Ala nen eluguthikomo werek o. At welaga ba yoma obùlùk enek yì hineileken hìtha we'ni.

⁷ Hìthalùk he, Yesùt a'nogo wa'lagasi'mo nen Ala nen eluguthikomo o, ìlùk, at agoromì ane wanhì lagaika mene amanogo hepok yogoisa lano o. Hit o Kalilea oan lagì'lek werek kolek, at tak lìlìk were'ma hineileken ha logoin o. Nane yogohisìgì atì eberek logoino,” ìlùk yogoisasikomo,

⁸ it hìmì amanogo omoulama atoma nen laga logolìk inayùk agaukwa meneat he, hobuk ina'la hai apik hakìlìk hakìlìk, at agoromì ane wanhì lagaukwa mene amanogo inoba humusegat yogoisa lagaukwa.

⁹ Yogoisa lùogoluk laganem ebekalem at Yesùt inom apì arìk he, mel yogoisasike: “Nerugì e!” ìlùk yogoisasikomo, it hìmì amanogo horok-horok lìlìk he, esok ineki hakìkì logolìk he, hai warogo ineitep awì yagasogo hogorasukwa.

¹⁰ Hogorasukwama, at Yesùt en he, “Hinayùk agùp o. An nagoromì amanogo o Kalilea lagauak en, yogoisa lano. Atoma lagalìk ineileken neogoin o,” ìlùk yogoisasike.

Inapeliagat, “Yesùt warek hina'lùk wùlùpama ìlùk yogoisano,” ìlùk yogoisasukwa wene

¹¹ Atì'nogo yogoisasikomo, it hìmì aremnogo oan laga kolek, it ap kagalek welagaukwa mene amanogo aike o kota kisukwasik he, wene obogat haga'lagaike mene amanogo, “Tì'nogo haga'laga,” ìlùk, it ap Ala esewerek mene inogogì kaintek amanogo motok pìlìng-palang hogo yogoisasukwa.

¹² Atì'nogo yogoisasukwama re, it mel, it ap inalùgetek amanogo mel, inom inebe atogothìlìk wene palhùlùk he, it ap tentara mene amanogo uang perak mene apigat wogisìkì logolìk

¹³ mel yogoisasukwa: “Hit en he, Hùako nit nogo iko kolek, at Yesùt ane wanhì lagaika mene amanogo wagaikasik Yesùt warek hina'lùk wùlùpama, ìlùk yogoisìkì logoino.

¹⁴ Wene haga'laga mene atì hesik he, at Gubernur asuk holhe halok, hit ùkùm hinoba asinogo ìlùk, nit en at a'la kagalugun o,” ìlùk isukwama re,

¹⁵ it ap tentara mene uang amanogo helasukwasik he, it ap amanogo nen isukwa higit hogoat hagasukwa. Wene atì'nogo wiagathesukwama nen, it apùnì Yahurì mene nen he, yogotak hùlì ikoat werek o.

Yesùt en he, “Hano wene yogoisìlìk laga logoino,” ìlùk yogoisasike wene

¹⁶ At Yesùt en agoromì ane wanhì lagaukwa mene inebe 11 en amanogo yogoisìkì logolìk, “O Kalilea lìlìk tom atì ba lagalìk logoino,” ìlùk, wene warìsasike higit hogoat lagaukwasik lagasukwa.

¹⁷ Lagasukwasik were'ma at Yesùt ebe ineileken hasukwasik he, hai warogo ineitep awì yagasogo hogorato kolek meneat he, it he'nakìt aike nek he, “At ebeat he a? Mel he a,” ìlùk akasukwa.

¹⁸ Atì'nogo akiko kolek, at Yesùt ebe inera'lu wagaikesik he, mel yogoisasike: “Ala nen he, pogot oba mene mel, kweangma mene mel, obogat he, an esewerek hanhomo o.

^19-20 Halok he, yì apùnì tì apùnì ìnùkùl etage lopok obogat an nagoromì haga'lasuagalùk, nopase Ala etage ba, an aput netage ba, Areagùn etage ba, ninetage palogo ima pelaginapìk, an nen wene hinasuk watì mene atì obogat it apùnì aike nen higit hogo hagatì logouagalùk yakùlisìgìk, ìlìk laga logoino o. Lakhani! Hit atì'nogo hagarinabìk laganem, an nebe ninom moto'-motogat were'ma, hùlì o elùgùn oba haga'lasigin o,” ìlùk yogoisasike.