MATÌÙT 22 - Ala Ane Wene Ket Mene Warogo Wo'ninapike Wene

“He itì logolìk isago na wesuagalùk inayoko hesike,” ìlùk oba lìrogo yogoisasike wene

¹ Yesùt ebe hakhìgì'lek hebesukwama re, hobuk at en wene aike oba lìrogo apùnì amanogo mel yogoisasike:

² “Ala nen awe a'ma hisikere'ma atoma eperak higit he, ap kain etagepogot aike aput agwe ìgìtì logolìk, pesta isasukwa hagat o.

³ Isatì logolìk apùnì inayoko hesike mene na wesuagalùk, at atitigeke mene aike mel yogoisasike: Apùnì inayoko hìgì amanogo wesuak en woginabi lani o, ìlùk, yogoisasike meneat he, it inayoko hesike mene atì inabìt en wagì'lek kamo isukwa.

⁴ Wagì'lek kamo isukwama re, hobuk atitigeke mene aike mel yogoisasike: Apùnì inayoko hìgì mene amanogo wesuak en he, woginabi lani o. Lìlìk he, Ninoe nen he, mel ike ino: Warn sapi oe mene mel, wam he'nakìt hùkotek mene mel, motok heleleng hogo warogo arat isakhìgìrìk, yì mene tì mene heleleng hogo tegelogo hìgìrìk arat nasak higit aga o. Halok he, wesuak en yogoisa lani, ikomo wago, ìlùk laksasikomo lagaukwa.

⁵ Lagaukwa meneat he, it inayoko hesike mene atì ina'la pùk-pùk hagatì logolìk he, at aike eyabukwe wo'lakìgìk, at aike yì mene tì mene abasigìlùk wo'lakìgìk,

⁶ it aike nen, at kain atitigeke laksasike mene amanogo inebe haksìlìk tùgì inoarìk he, inebe motok inoatìk, isukwa.

⁷ Atì'nogo hagasukwama re, at ap kain etagepogot a'nogo asuk holhikesik, a'mage lagalìk agoromì tentara mene laksasikomo lagaukwasik, at ap kain atitigeke inoasukwa mene amanogo inebe motok warogo potsìlìk, inawì wùrìk kota atoma motok halì hesukwa.

⁸ Atì'nogo arat hagasukwama re, at ap kain etagepogot a'nogo nen atitigeke mene amanogo mel yogoisasike: Pesta arat isatì meneat he, it apùnì inayoko hìgì mene atì nako isago na wesusak lek aga. Nabìt.

⁹ Halok he, hit kwe hùko atogolma a'loma lìlìk were'ma re, apùnì aike lago halok, Pesta isago na lùok o, ìlùk, inayoko heino, ìlùk yogoisasikomo re,

¹⁰ it atitigeke mene amanogo hobuk kwe hùko atogolma atoma lagaukwasik were'ma, apùnì inoabùt weak mene, hano mene, laganem inom apì agaukwa mene obogat inayoko hesukwama wagaukwama re, ouma inebe motok pese isike.

¹¹ Arat peserogo kisukwama re, at ap kain etagepogot a'nogo eileken isagalùk ouma kisike re, ap omakeat aike su hìmì ìgìnapì logolìk pesta isago nùogolùk itarek mene ugu lek were'ma eileken lakhasikesik he, mel yogosike:

¹² Eige, nagot! Hat he, su hìmì ìgìnapì logolìk pesta nùogolùk ìtarek mene atì ìtì'lek ki wagen yì, nìkì'nogo ki wagen, ìlùk yogosike meneat he, ap a'nogo ane motok ìgì'lek kamo isike.

¹³ Ane motok ìgì'lek kamo isikomo re, at ap kain etagepogot a'nogo atitigeke mene amanogo mel yogoisasike: Ap atì eki esok motok hele homagasogo re, eta'ma inaik hùnogo lì ago le ago egare'ma o motok mùmmo atoma wulaksani o, ìlùk yogoisasike.

¹⁴ Atì hake, Ala nen apùnì inebe motok apik inayoko hikerek meneat he, inebe hamùlùgat enek weteberogo hisegein o,” ìlùk yogoisasike.

“Uang pemerìntah hesik kìno ikenem, wogisasak a? Lek a,” ìlùk hinok Yesùt oba wanhukwa wene

¹⁵ Hobuk he, it ap Parisi mene nen, “Nit Yesùt eil warogo wene oba hinok wanhenem ane igin oba eken hìlìk ùkùm oba houok,” ìlùk abok palhì lagaukwa.

¹⁶ Abok palhì lagaukwasik he, ap it inagoromì inane wanhì lagaukwa mene mel, it ap Herotet werekwe mene mel, Yesùt oba wene hinok wanuagalùk laksa wagaukwama it atì wagaukwasik he, mel yogosukwa: “Yesùt noe. Hat hoabùt he, wene eberogoat enek ìkì logolìk, Ala a'la nen, Apùnì tì'nogo hagatì logouak, ìlùk akikerek mene eberogoat yakùlnisìkì lagen atì nit ninelu o. Apùnì inebe hayù'legat logolìk inelokoken oba nek isìlìk he, aike helokoma hisìgìk, aike hapotma hisìgìk, egetek lek hììkì lago.

¹⁷ Halok he, hat ha'la kì'nogo akegen. Nit Yahurì mene hagatorek higit hogo re, uang pemerìntah hesik kain etagepogot Kaisat wogosusak a? Lek a,” ìlùk yogosukwama re,

¹⁸ at Yesùt en it ap atì inoabùt weak enagat palhikesik he, “Hit hinogat oba nek hano salek logolìk, hinetaùken pìre mene yì rì! Nenahalok noabùt paluogolùk ìkì lagep.

¹⁹ Uang pemerìntah hesik housak mene a'nogo neileken hak en ìnù'neani,” ìlùk isikomo uang a'nogo aike wogosukwama re,

²⁰ at en he, “Yì sa ebe hagarek oba etage helal waganek werek,” ìlùk yogoisasikomo,

²¹ it en he, “Arì Kaisat at o,” ìlùk yogosukwama, at Yesùt en he, “Kaisat mene halok he, Kaisat at wogotìk, Ala mene halok he, Ala at wogotìk, ìkì logoino o,” ìlùk, yogoisasikomo re,

²² it amanogo inasuk holhukwasik he, “Egi! Nayùk e,” ìlùk, hogora'lùk he, Yesùt hebùlùk o wele'ma lagaukwa.

Ap Saluki mene nen, apùnì wa'larìk en ineluk asugun hesik Yesùt oba hinok wokhasukwa wene

²³ It amanogo arat lagaukwama nen, o atì likeat, it ap Saluki mene nen, “Apùnì wa'larìk ineluk asugun motok lek,” ìlùk egarek mene aike Yesùt oba wagaukwasik he, mel yogosukwa:

²⁴ “Noe. At Musa nen mel ìlùk yakùlnisasike: Ap aike againapùrì oan taginapì'le'ma ebe wa'laga halok he, obùlù'mo omalik aike taginabuagalùk he, he soge atì ap atì agorat wanusak o, ìlùk yakùlnisasike.

²⁵ Atì'nogo isike mene were'ma re, nit were'ma yoma ap inebe 7 nen inopase omakeat en tago welagaukwa. Logolìk, inoe makusa mene atì agwe wanhikesik againapùrì taginapì'le'ma wa'lagaikomo agot opolik mene atì nen, He yì noe agwe soge an hanìlùk laga mene, ìlùk, wanhike.

²⁶ Wanhike meneat he, at atì againapùrì taginapì'le'ma wa'lagaikeat. Hobuk he soge mene a'nogo inagot inopolik mene atì nen wanhike mene re, atì'nogoat againapùrì taginapì'le'ma wa'lagaikeat. Inebe 7 nen amanogo inagainapùrì taginapì'le'ma wa'laga lagaukwa nek,

²⁷ Atì'nogo wa'lagaukwasi'mo nen, hobuk he atì ebe wa'lagaikeat.

²⁸ Halok he, it ap inebe 7 nen atì, he omakeat mene atì wanìk wagaukwasi'mo re, hobuk Ala nen apùnì warek mene inelugurinabigin atì sat he, he atì sa hak agwe asigin akegen,” ìlùk hinok wokhasukwama,

²⁹ at Yesùt en he, mel yogoisasike: “Hit he, Ala ane helal waganek atì mel, Ala omame atì mel, hinokot logolìk, hinane kolo egep atì.

³⁰ Apùnì warek mene Ala nen inelugurinabìk oba nen, hìmì ìkìgìk, it aike ìgìsìgìk, ìkì logogun motok lek o. We, it malaikat pogot oba mene welagaikarek atì hakeat logogun o.

^31-32 Nen, apùnì wa'lasugun mene Ala nen inelugurinabigin atì nek he, at en, Aberaham ho, Isak ho, Yakùp ho, inopase Ala anat o, ìlùk isikomo, at ane helal waganek werek a'nogo etage salhì'lek welagep nogo? Etage salhesebat o. At Ala re, apùnì warek mene inopase hùk. At he, apùnì ineluk mene inopase o,” ìlùk yogoisasikomo re,

³³ it apùnì apik amanogo inasuk holhukwasik he, “Egi! Nayùk e,” ìlùk hogorasukwa.

“Ala nen ninasuk wasike wene esin he, pìre atemat o,” ìlùk ap aike yogosike wene

³⁴ At Yesùt en wene atì'nogo yogoisasikomo, apùnì nen he, “Yesùt en it ap Saluki mene wene yogoisikomo, it en oko usak mea aga,” ìlùk isukwama, it ap Parisi mene inasuk holhukwasik he, inebe atogothìlìk,

³⁵ ap aike Ala ane yakùlisìkì lagaike mene nen, Yesùt oabùt paligìlùk oba hinok wanhì logolìk he, mel yogosike:

³⁶ “Yesùt noe. Wene Ala nen ninasuk wasike wene a'nogo, wene ebe esin hake kì isike akegen,” ìlùk yogosikomo,

³⁷ at Yesùt en, “Wene esin he, at Musa nen, Hinetaùken mel, hinoabùt mel, hina'la mel, omakeat arìk, ninopase Ala Etagepogot ebe atìat hinetaùken hutik logoino o, ìlùk isike atì,

³⁸ wene ebe hùko esin hake atì o.

³⁹ Nen, wet atì eperak higit he, aike yì Hit hinokawerek hinebe hinetaùken hutìk welagasep atì hak he, it apùnì aike hinom welagasep mene atì hinetaùken hutik logoino o, ìlùk isike mene esin aike atì.

⁴⁰ Wene at Ala nen, Yì'nogo haga'no, tì'nogo haga'no, ìlùk ninasuk wasike wene obogat mel, wene it ap Ala ane yogoisìkì lagaukwa mene nen isukwa wene obogat mel, wene esin pìre atem oba kelik werek o,” ìlùk yogosike.

“At Karìsùt atì, ebe sa akegep,” ìlùk yogoisasike wene

⁴¹ At Yesùt en atì'nogo yogoisasikesik he, it ap Parisi mene amanogo atogorek were'ma, at en hinok inoba wanhì logolìk he,

⁴² mel yogoisasike: “Hit hina'la nen he, Karìsùt Ala nen ayoko hìlìk lakhei wesigin isike a'nogo, ebe sa akìkì lagep. Nen, opa sa nen tagokwe mene akìkì lagep,” ìlùk yogoisasikomo, it en he, “At atì Taùt en tagokwe mene o,” ìlùk yogosukwa.

⁴³ Atì'nogo yogosukwama, at Yesùt en he: “Halok he, Ala Areagùn nen Taùt a'la kagalhikomo, at en he,

⁴⁴ Ala Etagepogot en an noe Etagepogot yogotì logolìk he, Apùnì hat haselei mene amanogo hesok en al lebelogo hisanok en, an nen hoba hisa wagì'lek werek kolek, hat an nera'lu neki ebekwe hebe kain logoinok, ìlùk Ala nen Karìsùt yogosike, ìlùk Taùt en isike atì re, nahalok isike akegep.

⁴⁵ At Taùt okawerek en Karìsut ebe hesik, An noe Etagepogot, isike halok he, hit en, Karìsùt atì Taùt en tagokwe mene o, ìlùk, nìkì'nogo usak akegep. Atì'nogo usak mea o,” ìlùk yogoisasikomo re,

⁴⁶ it en wene oko kì'nogo yogosu heat haga'lagaikomo, hùlì atì hùlì nen he, hobuk apùnì obogat en wene aike hinok wanu inayùk agaike.