MATÌÙT 20 - Ala Ane Wene Ket Mene Warogo Wo'ninapike Wene

“Ap aike yabu anggur yabumo hagatì lagaukwa,” ìlùk oba lìrogo yogoisasike wene

¹ At Yesùt en hobuk mel yogoisasike: “Ala nen awe a'ma hisikere'ma atoma eperak higit he, mel hake. Ap kweang esewerek mene aike eyabu anggur yabumo hagasuagalùk ap heraginabìk ohealegat yoko wùlìpike.

² Wùlìpikesik, ap inayoko hesike mene inom wene mel yogoisasike: Hineki omake hesik hagatep halok he, oko uang ineki omake hesik hagatenem wogisagarek hagat hinebe lopok omakìtek wokhisegein o, ìlùk yogoisasikomo, it en he, Elok, ìlùk yogosukwama re, at eyabumo laksasike.

³ Laksìlìk he, o mo yegelogo lagai wagaikomo lagaike hak he, it ap aike hùnogoat mene pasar atoma welegat were'ma eileken isasike.

⁴ Isasikesik he, Ap yì sanì. Hit he, an neyabu anggur yabumo atoma hinomat hagasi lano o. Hagasumo re, an nen oko higit hogoat wokhisegein o, ìlùk yogoisasike.

⁵ Atì'nogo yogoisasikomo it a'nogo lagaukwama re, ap kweang esewerek a'nogo ebalep hagasike hagat he, hobuk atì'nogoat likene jam 12 hake it aike inayoko hìgìk, hìmaganekokwe, jam 3 hake it aike inayoko hìgìk, hìkì lagaike.

⁶ Hobuk o hi igìlùk iko kolek jam 5 wùlìpikesik he, it aike welegat metek were'ma eileken isìlìk he, Hit ohealek enat welegat motok metek welagep yì nenahalok, ìlùk yogoisasikomo re,

⁷ it ap amanogo nen he, Yabu aike wanuagalùk ninayoko hìgì'lek atì nen welago o, ìlùk yogosukwa. Atì'nogo yogosukwama re, at ap eyabu esewerek a'nogo nen he, Halok he, hit hinomat an neyabumo anggur yabumo atoma hagasi lano o, ìlùk inayoko hesike.

⁸ Atì'nogo inayoko hesikomo lagaukwama, o arat hi isikomo re, ap eyabu esewerek a'nogo nen, it ap amanogo yabu hagato kolek serisek welagaike mene aike mel yogosike: Ap yabu hagarì'lùgì mene amanogo waisa lan o. Wagaika halok he, it hobuk kaga mene atì tak oko wogisìlìk he, it ebalep kaga mene atì oko hobuk wogisanok o, ìlùk yogosike.

⁹ Atì'nogo yogosikomo, it hobuk jam 5 ba hagasi lagaukwa mene amanogo tak wagaukwama re, oko uang yabu ineki omake hesik hagatenem wogisagarek a'nogo mene omakìtek omakìtek wogisasike.

¹⁰ Nen, hobuk he, it ebalep hagasi lagaukwa mene amanogo we, ina'la nen, Nit hùko negen oba louk hogo aike wo'nisegein o, akalùk wagaukwa meneat he, oko uang a'nogo meneat omakìtek omakìtek it aike ebalep wogisasike hagat wogisasike.

¹¹ Atì'nogo wogisiko kolek he, it amanogo uang wanhì logolìk inoabùt uarek-puarek hagatì logolìk he, ap kain eyabu esewerek mene a'nogo mel yogosukwa:

¹² It hobuk wagaika mene yì re, we, satu jam hake hamùlùgat hagatì lagaika meneat he, nit ohealegat lagosik, mo aik api'mo ninoba libi'-lebek hogo wanho mene ninom higirat wogisegen atì nahalok, ìlùk yogosukwama re,

¹³ ap eyabu esewerek a'nogo nen, ap it mene aike mel yogosike: Nagot e. An kolorogo wokhetì'lek o. Oko uang omakìtek wokhisegein ìgìma re, Ì o, ìlùk egep a'nogoat wokhetì.

¹⁴ Halok, helalùk lan o. An netaùken nenat it hobuk hagatì lagaika mene yì, hat wokhetì hagat wogisegein, ìlùk

¹⁵ an nokawerek nagarogwerek en usak mene nenat ìgì atì mea akegen? An lebek hogo wogisìgì atì nen hat ua palhen? ìlùk yogosike.

¹⁶ Atì'nogo yogosike, atì hak he, it hobuk mene atì ebalep asugun o. Nen ebalep mene atì hobuk asugun o,” ìlùk yogoisasike.

“An noasugun o,” ìlùk, eki pìre ba yogoisasikesik en, hobuk aike yogoisasike wene

¹⁷ At Yesùt en atì'nogo yogoisalùk, at ebe o Yerusalem pigìlùk he, at ane wanhì lagaukwa mene inebe 12 nen amanogo waisasikesik wogisek inaligat ebekalem pìkì logolìk he, mel yogoisasike:

¹⁸ “Nagoromì. Nit yogotak he, o Yerusalem pìkì lago. Arat pìlì'mo nen he, an abat ta'lasi wagagi a'nogo, ap en yoko lìlìk an nebe it ap Ala esewerek inogogi kaintek mel, it ap Ala ane helal waganek esewerek mene mel, ineki ba hanumo, it en ap aike nen noasuagalùk ùkùm noba hogoin o.

¹⁹ Ùkùm noba hìlìk he, it ap etakwe mene nen inane kerethìgìk yogonetìk, tùgì labìsake noatìk, ìlìk he, nebe e ba menhanìlìk noasuagalùk wogisogoin o. Nen, arat noatenem, neki pìre warek logopik en he, Ala nen nelugu'nabigin o,” ìlùk yogoisasike.

Yakobùt Yohanet eperak, inagosa nen Yesùt aike kìno yogosike wene

²⁰ At Yesùt en atì'nogo yogoisasikesik were'ma, at Sepeteùt agwe nen eagwì wogisek Yesùt oba wagaikesik eitep awì yagasogo hai watì logolìk he, “Nit aike kìno yogohesuogolùk hoba wago,” ìlùk yogosukwama

²¹ at en he, “Hat ha'la kì'nogo akalùk en egen,” ìlùk yogosikomo, he a'nogo nen he, “An neagwì pìre ya re, apùnì obogat hat hawe a'ma hisegeinmo atoma hera'lu, at aike heki ebekwe, nen aike heki peikkwe, kain logouagalùk he, menhisanogolùk yogohetì o,” ìlùk yogosike.

²² Atì'nogo yogosikomo, at Yesùt en he, “Hit kìno yogonetep atì re, wene ebe hinokorat logolìk yogonetep o. An yì aik tì aik haga'nabugun atì re, hit atì'nogo hagathinabusak elok akegep?” ìlùk u hak he: “An nagei hinago negein atì re, hit elok nasak akegep?” ìlùk yogoisasikomo, it en he, “Elok nasagat o,” ìlùk yogosukwa.

²³ Atì'nogo yogosukwama, at Yesùt en he, “An yì aik tì aik haga'nabugun atì hak, hit atì'nogoat hagathinabugun meneat he, hat aike an neki ebekwe, nen aike neki peikkwe ninom kain logouogolùk atì nek he, an nen menhikasak, mea o. We, an nopase nen hageat en logouagalùk weteberogo hisasike meneat hisegein o,” ìlùk yogoisasike.

²⁴ Atì'nogo yogoisikenem, it at agoromì he'nakìt inebe 10 nen inasuk holhukwasik he, ina'mage it ap inebe pìre oe agot eperak aremnogo inoba hesukwa.

²⁵ Ina'mage atì'nogo inoba hesukwama re, at Yesùt en inebe obogat atogosuagalùk waisasikomo atogosukwama mel yogoisasike: “It apùnì etakwe mene inogogì pemerìntah mene nen mep lagai'-lagak hogo hagarinapìk, nen it ap kaintek atì nen, set kwil-kwal hogo yogoisìgìk, egarek atì hinelu.

^26-28 Mene re, hit en it hagatarek atì hak, atì'nogo hagatì logousak motok lek o. An abat ta'lasi wagagi a'nogo re, hit apùnì nen lebe'nììkì logouageip ìlùk wagagi lek o. At he, an nen hit lebethisìkì logolìk, hit hinebe hele homage negen welagep mene atì, hinebe logolegat hikalhinabigìlùk, anat noasuagalùk wagagi atì. Atì hak he, hit aike sa nen, An inoe kain asigin, akiko halok he, hinagorat asuak. Nen, hit aike sa nen, An he, netagewerek asigin, ìlùk, akiko halok he, hinatitigekeat asuak o,” ìlùk yogoisasike.

Ap inebe pìre ineileken mùm mene hagarinapike wene

²⁹ Yesùt inom atì'nogo hagarìk lagaukwasik he, o Yeriko nen wùlùpenem he, apùnì motok apik opolik lop hutik lagaukwa.

³⁰ Laganem he, ap inebe pìre ineileken mùm mene ebekalem hùrek were'ma, apùnì nen he, “Yesùt wìrì'logo,” ìlùk isukwama inasuk holhukwasik, inane hùkorogoat he, Yesùt mel yogosukwa: “Taùt en tagokwe mene ninoe a! Hetawì'ninabin o,” ìlùk yogosukwama re,

³¹ it apùnì apik amanogo nen he, “Hinane o,” ìlùk, wenagisasukwa. Atì'nogo wenagisasukwa meneat he, it a'nogo nen inane hobuk hùkorogoat yogotì logolìk he, “Taùt tagokwe mene ninoe a! Hetawì'ninabin o,” ìlùk yogosukwa.

³² Yogosukwama re, at Yesùt ebe melarìk waisasikomo wagaukwama re, mel yogoisasike: “An nen nìkì'nogo hagathinabuagalùk yogonetep,” ìlùk hinok wogisasikomo,

³³ it en he, “Ninoe. Nit nineileken mùm yì hano haga'ninabinogolùk yogoheto o,” yogosukwa.

³⁴ Atì'nogo yogosukwama re, at Yesùt en etawìrinabìk he, eki ineileken oba hagisasikomo re, aremnogoat hano agaukwasik, Yesùt opoligat lagaukwa.