MATÌÙT 1 - Ala Ane Wene Ket Mene Warogo Wo'ninapike Wene

Yesùt Karìsùt apu opalak taginabìk wagaukwa wene

¹ At Yesùt Karìsùt Aberaham en, Taùt en, tagomakwe a'nogo apu opalak ero ba nen taginabìk wagaukwa mene inetage yì o.

² At Aberaham en Isak tatìk, Isak en Yakùp tatìk, Yakùp en Yehura agoromì inom taginapìk,

³ Yehura nen he, he Tamat wanhikesik he, ap Peret ho, Sera ho, eperak taginapìk, Peret en Heseron tatìk, Heseron nen Aram tatìk,

⁴ Aram en Aminatap tatìk Aminatap en Nahason tatìk, Nahason nen Salmon tatìk.

⁵ Salmon nen he, he Arahap wanhikesik he, Poat tatìk, Poat en he, he Ùrùt wanhìkesik he, Obet tatìk, Obet en Isaì tatìk,

⁶ Isaì nen he, ap Taùt etagepogot a'nogo tatìk, atì'nogo taginabìk wagaukwa. Nen, atì nen he, at Taùt en ap Ùrìa agwe telogo wolok wùlìpikesik he, Salomo tatìk,

⁷ Salomo nen he, Erehabeam tatìk, erehabeam en Abia tatìk, Abia nen Asa tatìk,

⁸ Asa nen Yosapat tatìk, Yosapat en Yoram tatìk, Yoram en Ùsìa tatìk,

⁹ Ùsìa nen Yotam tatìk, Yotam en Ahat tatìk, Ahat en Hìsìkìa tatìk,

¹⁰ Hìsìkìa nen Manase tatìk, Manase nen Amon tatìk, Amon nen Yosìa tatìk,

¹¹ Yosìa nen ap Yahurì mene o Pabel wogisek lagaukwa atem higit, at Yekonìa agaiya'lak inom taginapìk, atì'nogo taginabìk wagaukwa.

¹² Nen, apùnì Yahurì mene o Pabel wogisek lagaukwama logolìk he, hobuk at Yekonìa nen he, Sealtìel tatìk, Sealtìel en Serubabel tatìk,

¹³ Serubabel en Abìùt tatìk, Abìùt en Eliakim tatìk, Eliakim en Asùt tatìk,

¹⁴ Asùt en Satok tatìk, Satok en Akìm tatìk, Akìm en Elìùt tatìk,

¹⁵ Elìùt en Eleasat tatìk, Eleasat en Matan tatìk, Matan nen Yakùp tatìk

¹⁶ Yakùp en Yùsùp, he Marìa agùn a'nogo, tatìk, he Marìa nen he, Yesùt nit en Karìsùt ìkì lago a'nogo tatìk, ero ba nen taginabìk wagaukwa.

¹⁷ Atì'nogo taginabìk wagaukwa atì re, ap Aberaham ta'lagike hùlì nen he, ap Taùt ta'lagaike atì hùlì ba inapu inopalak inebe 14 hùlì nen taginabìk wagaukwa. Nen, Taùt ta'lagaike hùlì nen he, apùnì Yahurì mene wogisek o Pabel lagaukwa atì hùlì ba inapu inopalak 14 hùlì nen hobuk taginabìk wagaukwaat. Nen, ap Yahurì mene o Pabel wogisek lagaukwa hùlì nen he, Karìsùt ta'lagaike atì ba, inebe 14 hùlì nen hobuk taginabìk wagaukwaat atì.

Yesùt Karìsùt ta'lagaike wene

¹⁸ At Yesùt Karìsùt ta'lagaike atì ebe yì'nogo ta'lagaike Agosa Marìa atì, ap Yùsùp ebe wanhì'lek, we, lopolek were'ma re, Ala Areagùn nen omalik a'mathesike.

¹⁹ A'mathesikomo re, at Yùsùp oabùt hana nogo nen he, a'la nen, “An he atì apùnì ineilhanem heraksamo ekalì asinogo nen he, hinagasogo heraksegein,” ìlùk, akìkì lagaike.

²⁰ Atì'nogo akìkì logolìk, hùako nogo ikenem he, at malaikat Ala nen pogot oba nen yoko pelaksa wagarek mene aike oba wagaikesik he, mel yogosike: “Yùsùp Taùt opa yì. Hat he, He Marìa atì wanu nabìt, ìlùk ha'la akagùn o. Omalik atì Ala Areagùn nenat a'mathikomo. Halok he, wanino.

²¹ Omalik atì ebe abat tasigin o. Tasumo re, at en oe agot weak hagarìlùgì mene korogo wìlìk telinabigin o, ìlùk etage Yesùt salino,” ìlùk yogosike.

²² Atì'nogo hagasugun ìlùk he, ninopase Ala Etagepogot en he, ap aike hageat ayoko hesikomo wene yogoisìkì logolìk he, helal waganogo hesike mene higit hogoat haga'lasuagalùk isike atì.

²³ At atì nen he: “Helekerek aike omalik a'ma arìk he, eak abat takegein o. Ta'laga halok he, nit ninane ba, Ala ninom welago, u hak, etage Imanuel ìkì logagun,” ìlùk helal waganogo hesike mene higit hogoat haga'lagaike atì.

²⁴ Atì re, at Yùsùp eluk agaikesik, malaikat Ala nen lakhei wagaikomo, abì ba yogosike mene a'nogo higit hogoat, agwe a'nogo wanhikesik

²⁵ eperak nogo ìgìlek were'ma eak abat takasikomo re, etage Yesùt salhike.