LAKSASIKE 26 - Ala Ane Wene Ket Mene Warogo Wo'ninapike Wene

Paùlùt en, ebe elelerogo wene Agarìpa yogosike wene

¹ At Agarìpa nen he, Paùlùt mel yogosike: “Wene hat hokawerek hesik yogone'nogolùk yogohetì,” ìlùk yogosikomo re, at Paùlùt eki ba hai wasikesik mel yogosike:

² “Agarìpa noe. Wene it ap Yahuri mene nen ùkùm noba hìlì'lùgì atì, noba le'maat o, ìlùk nebe elelerogo wene hat heilhanemat yogotak igin yì re, na'la hai hakìkì lagì.

³ Nit apùnì Yahuri mene hagatorek mene atì mel, wene ninane hùnogo tomok ogorek mene atì mel, obogat hat helu atì nen, nane harat yogohesigìlùk na'la hai hakìkì lagì o. Halok, yogoheto kolek, ha'la pùk agì'lek hasuk hologo logoino, noe.

⁴ An nebe elege ba nen apùnì ninùkùl omakeat mene ninom o kota Yerusalem logolìk noabùt ero ba nen hagatì lagagi mene atì, it apùnì Yahuri mene obogat inelu o.

⁵ Nit Ala awe a'ma kìlìk logolìk hagatì lago wene atì, it ap aike Parisi mene inawene hesogo logolìk, yùgùnat hake hagato kolek, an enek he, motok ning hogo hesogo logolìk hagatì lagagi atì, it ap yoma hageat en inelu motok o. Halok it en he, Atì eberogoat hagatì lagaike meneat ike, ìlùk yogohesusak he a? Inabìt he a.

⁶ Yogotak ùkùm noba haga mene ero herasuogolùk melagì yì re, at Ala nen he, Tì'nogo hanothinabigin, ìlùk ninopalak wene warisasike wene atì, an nen, Eberogoat hano'ninabigin o, ìlùk netaùken at oba eberek welagì atì hesik, ùkùm noba haga mene ero herasuogolùk welago yì.

⁷ Alebat en, nit apùnì Yahuri mene ninùkùl etage lopok 12 yoma obogat en, Ala nen he, Tì'nogo hanothinabigin, ìlùk wene warisasike atì, ebe hagarinabuagalùk, Ala oba hìpìrìk logolìk, likene hùako, at hogorato motok welagaikarek. An hogo re, wene warisasike atì eberogoat haga'ninabiginat o, ìlùk eberek welagì atì nenat, it ap Yahuri mene yì nen ùkùm noba hìlì'lùgì yì, noe,” ìlùk at Agarìpa yogosikesik,

⁸ hobuk it ap Yahuri mene yogoisìkì logolìk he, “Nagaiya'lak. Hit en he, Ala nen apùnì wa'lagaikarek mene eberogoat inelugurinabigin, ìlùk, hùthahùk atì nahalok,” ìlùk yogoisasikesik, Agarìpa mel yogosike:

⁹ “An alep he, Yesùt aua Nasaret mene etage atì lek asuagalùk yì mene hagatìk, tì mene hagatìk, hagatì logoginat o, ìlùk na'la akasigi.

¹⁰ Atì'nogo hagatì logolìk, alep o Yerusalem logolìk, Ala againapùrì ineki hele wasigìlùk isigimo re, it ap Ala esewerek inogogì kaintek en, Ì o. Hano, ìlùk surat wo'nesukwama, Ala againapùrì inebe logolegat ineki hele warogo hisìgìk, inebe inoasuogolùk ikenem, Ì o. Inoasuogat, ìlùk ìgìk, ìkì lagagi.

¹¹ Atì'nogo ìkì logolìk he, an o apùnì Yahuri mene sapan egarek obakwe lopok kìlìk, it inetaùken Yesùt oba hìpìrìk welagaukwa mene hebisoagalùk nane keirogo yogoisìgìk, yì aik tì aik hagarinapìk, ìkì logolìk, na'mage apik lagakì logolìk he, it aike o walegat esako-esako atoma mene mùgisek laga lagagiat,” ìlùk yogosike.

At Paùlùt en he, “Yesùt en tì'nogo wanesikomo, nepe hebelhigi,” ìlùk yogosike wene

¹² “Atì'nogo inoasigìlùk isigimo re, it ap Ala esewerek inogogì kaintek en, Hano, ìlùk surat palogo wo'nesukwama, o kota Tamìsìk lagagi atì.

¹³ Agarìpa noe. Atì'nogo o likene ebekwe laganem he, mo apipin hake re, mea. Apipin apik mene, an mel, ap ninom lagagu mene mel, pogot oba nen lìa ninera'lukwe yasi pi wagaike.

¹⁴ Atì'nogo yasi pi waganem he, nit obogat kweangma tukwagathìgìk pisugumo, at aike nen ane yogonetì logolìk, apùnì Iberani mene ninane ba mel ikenem nasuk holhigi: Saùlùt. Saùlùt. Anat yì aik tì aik haga'nabigìlùk mù'narek nìkì lagen atì nahalok. Sapi wam sìge louk ekat kabelek mene ba ebe sathikenem, Nabìt, ìlùk okawerek en temuk hogo warikerek atì hak, hat hokawerek en hebe atì'nogoat weagathakìkì lagen o, ìlùk yogonesike.

¹⁵ Atì'nogo yogonesikomo, an nen he, Eige. Noe. Hat sa, ìlùk yogosigi. Yogotenem ninoe Etagepogot en he, An Yesùt. Yì aik tì aik haga'nabigìlùk mù'narek nìkì lagen mene a'nogoat o.

¹⁶ Mene re, hebe melame. An nebe helokoma melasi wagì yì. Hat hebe an natitigeke arìk logolìk, yogotak heileken neegen mene mel, hobuk nebe helokoma melaganem neegein mene mel, apùnì aike yogoisìkì logoinogolùk, hayoko hìgì atì.

^17-18 Apùnì Yahuri mene mel, it etakwe mene mel, hoasuogolùk ikenem, an nen telhapì logogin o. It etakwe mene ineileken mùm werek atì hekenogo hagarinapìk, inebe o mùmmo werek atì inelokwe hebelogo lìa ba hisa wagìk, Ibilit eki ba werek atì, Ala eki ba hisa wagìk, inok en ìlùk inoba lakhagagin o. Lakhagoumo, it inetaùken an noba hìpìrethoumo re, it weak hagarì'lùgì mene atì, at Ala nen sagalogo legetsìgìk, An nagainapùrì ìlùk, inebe woginapìk, igin o, ìlùk yogonesike,” ìlùk yogosike.

At Paùlùt hagarìk nìkì lagaike mene hesik yogoisasike wene

¹⁹ Atì'nogo yogosikesik, aike mel yogosike: “Atì nen, Agarìpa noe. Ala nen Yesùt nelokoma melasuagalùk lakhei wagaike mene atì, ane hologo hagatì logoigìlùk nomamerogo hagato motok welagì.

²⁰ Wene atì, emakum it apùnì Yahuri mene o Tamìsìk atoma welagaukwa mene yogoisasigi. Hobuk o Yerusalem lìlìk logolìk, it atoma mene yogoisìgìk, o propinsi Yurea mene obogat yogoisìgìk, isigisik, it etakwe mene yogoisìlìk nìkì lagì. Atì'nogo yogoisìlìk nìkì logolìk he, Weak hagatì lagep mene heraksìlìk hinoabùt hebelarìk hinelokwe Ala wogo'no o. Hinelokwe Ala wogorìk he, hinoabùt apùnì inoabat hebelarìk hagatarek hagat hagatì logoino o, ìlùk yogoisìkì lagì.

²¹ Yogoisìkì lagì atì nenat, an Ala awì wùrì'mo kìlìk were'ma, it ap Yahuri mene nen nebe hakhanìlìk noasuogolùk isukwa atì.

²² Noasuogolùk isukwa meneat he, Ala nen ha'narek motok were'ma, an yogotak yoma metek logolìk hit ap kaintek mei, hinagoromì mel, wene an nen yogohisìkì lagì yì. Wene yì re, hageat en, it ap Ala ane yogoisìkì lagaukwa mene nen mel, at Musa nen mel, Hobuk tì'nogo haga'lasigin, ìlùk isukwa meneat yogohisìkì lagì o.

²³ It en he, Karìsùt ebe wa'larìk he, at tak eluk arìk, wene lìarinabigin wene atì, apùnì Yahuri mene yogoisìgìk, etakwe mene yogoisìgìk, igin o, ìlùk isukwasik helal waganogo hesukwa atì hagat an nen ìkì lagì o,” ìlùk yogosike.

²⁴ At Paùlùt ebe elelerogo wene atì'nogo isikesik aike igin ha'ma re, at Pesetùt en ane hùkorogoat he, “Paùlùt. Lùgùlùgì palhen hìgì. Hat en yì wene tì wene logolegat yakùlhì lagen atì nen lùgùlùgì paluagalùk hagathapomo hìgì,” ìlùk yogosike.

²⁵ Atì'nogo yogosikomo, at Paùlùt en he, “Pesetùt noe. An lùgùlùgì palhìrìk ìkì lagì lek o. We, hano logolìk wene eberogoat yogohisìkì lagì o,” ìlùk isikesik,

²⁶ “Agarìpa noe. Wene yì obogat hat helu atì nen, an hat heilhanem nayù'lek hogo ìkì lagì. Wene atì, o hinagoma haga'lagì'lek. We, weinamma haga'lagaike atì nen, wene atì aike hat hokot welagen, ìlùk na'la akìkì lagì lek o.

²⁷ Agarìpa noe. Wene it ap Ala ane yogoisìkì lagaukwa mene nen isukwa atì, eberogoat ìlùk akìkì lagen lek nogo? Eberogoat ìlùk akìkì lagenat o. An nelu,” ìlùk yogosike.

²⁸ Atì'nogo yogosikomo, at Agarìpa nen he, “An nebe yogotak ya hepogat Kerisiten mane asuagalùk, hat en haga'nabigin ìlùk akìkì lagen a? Mea o,” ìlùk yogosike.

²⁹ Atì'nogo yogosikomo, at Paùlùt en he, “Yogotak ya he a? Logopik en he a. Hat mel, hit aike nane yogotak holhì lagep mene hinebe obogat mel, an neki hele warek welagì yì hake nek hinoba agì'lek, an welagìrek hagat haga'lasuageip ìlùk Ala ayoko hìkì lagì o,” ìlùk yogosike.

³⁰ Atì'nogo yogosikomo re, at etagepogot Agarìpa a'nogo mel, at kain gubernur Pesetùt a'nogo mel, he Perenike a'nogo mel, it aike inom hùrek welagaukwa mene obogat mel, inebe mela'lùk,

³¹ olilu wùlùpukwa. Wùlìbìk he, it-it ìkì logolìk, “Ap atì re, eki hele watìk, ebe watìk, usak hake weak aike hagatì'le'maat o,” ìlùk isukwa.

³² Atì'nogo isukwasik, at Agarìpa nen Pesetùt yogotì logolìk he, “Paùlùt en he, Ùkùm noba haga mene yì, at Kaisat en ero heragasogo elùgùn wasuak o, ìlùk ìgì'lek logoilepma re, nit en eki hele hikalilo,” ìlùk yogosike.