LAKSASIKE 25 - Ala Ane Wene Ket Mene Warogo Wo'ninapike Wene

At Paùlùt en he, “Ùkùm noba haga atì, ap Kaisat en wene ero heragasogo elùgùn wasuak,” ìlùk isike wene

¹ Ap Pesetùt a'nogo menhesukwama, o Kaisarea atoma wagaikesik he, eki hìnagan welagaikesik en, o Yerusalem lagaike.

² Lagaikesik were'ma, it ap Ala esewerek mene inogogì kaintek amanogo mel, ap Yahuri mene inogogì kaintek inetagewerek aike mel, inom oba kisukwasik he, ùkùm Paùlùt oba hìkì lagaukwa mene a'nogo yogosukwa. Yogotì logolìk, a'la kageik-kagauk hogo hagasukwa.

³ Atì'nogo yogosukwa atì re, at kain agoromì nen Paùlùt ebe wolok o Yerusalem wesuogolùk waganem, ebekalem wasuogolùk weim abok inane omakeat lapuk hogo isukwasik en, at yogotì logolìk, “Hat hoabùt hano nen, nit nina'la hanorogo Paùlùt ebe o Yerusalem yoma lakhei we'no,” ìlùk inane lìok hogo kìno yogosukwa atì.

⁴ Atì'nogo yogosukwa meneat he, at Pesetùt en he, “At Paùlùt eki hele warek o Kaisarea atomaat logouak. Were'ma, an yoma welagì'lek hepogat legein o.

⁵ At en hagasusak lek mene aike hagatomo halok, hit ap kaintek yoma nen ùkùm oba houageip en ìlùk ninomat lùok o,” ìlùk yogoisasike.

⁶ Atì'nogo yogoisasikesik, eki 8 en he a? 10 nen he a. Inom o Yerusalem welagaukwasik en, o Kaisarea wagaike. Wagaikesik, hùenkwe re, o apùnì ùkùm inoba hìgìk, kotìk, ìkì lagaukwa ba hù'lasi kìlìk, agoromì nen Paùlùt ebe wolok wesuagalùk yogoisasike.

⁷ Yogoisasikomo lagaukwasik ebe wolok wagaukwama re, it ap Yahuri mene o Yerusalem en wagaukwa mene amanogo Paùlùt ebe ìlìng-walìng hogo hebìlìk, yì ùkùm tì ùkùm ekin mene apigat oba hesukwa. Atì'nogo meneat he, at weak aike hagatì'lek nogo nen he, “Eberogoat weak yì'nogo hagatenem nineileken hogo,” ìlùk yogosusak lek agaike.

⁸ Atì'nogo lek agaikomo, at Paùlùt en ebe elelerogo mel yogosike: “Wene Ala nen nit apùnì Yahuri mene ninasuk wasike wene a'nogo aike sagalogo heraksìlìk weak hagatìk, o Ala awì wùrìk a'nogo weagathìgìk, ninoe kain Kaisat o Ùrùm mene a'nogo ane sagalogo heraksìlìk aike weak hagatìk, motok ìgì'lek o,” ìlùk yogosike.

⁹ Atì'nogo yogosikomo, at Pesetùt en he, apùnì Yahuri mene ina'la hanorogo ìlùk, Paùlùt mel yogosike: “O Yerusalem atoma nen wene yì hesik an neilhanem ero heratenem, eberogoat halok an nen elùgùn wasik en, ninom lùok a? Habìt a,” ìlùk yogosike.

¹⁰ Yogosikomo, at Paùlùt en he, “An yogotak he, ùkùm inoba hìgìk, kotìk, egarek oba yoma, ninoe kain Kaisat Ùrùm mene eki ba welagì. Halok, ùkùm noba haga mene yì, at were'ma atoma nenat ero heragasogo elùgùn wasuak. An nen it Yahuri mene weak aike hagarinapì'lek atì, hat heluat o.

¹¹ An nen aike hagasusak lek mene hagatìk, weak hagatenem inebe motok inoatarek mene hagatìk, eberogoat ilema re, Noasusak higirat. Noa'ni, ìlùk ile. Mene re, it ap yoma nen ùkùm noba le'maat hìlì'lùgì atì nen, it aike nen, it ap yì ina'la hanorogo ìlùk, an nebe it ineki ba hanusak mea o. We, noe Kaisat enat wene atì ero heragasogo elùgùn wasuak o,” ìlùk yogosike.

¹² Yogosikomo, ap aike at Pesetùt inom logolìk, “Yì'nogo hagasuok, tì'nogo hagasuok,” ìlùk inom ìkì lagaukwa mene inom en, “Tì'nogo hagasuok,” isukwasik en Paùlùt mel yogosike: “Hat en he, Wene yì, ap Kaisat en ero heragasogo elùgùn wasuak o, ìlùk egen atì nen, Kaisat oba lakhagaginat o,” ìlùk yogosike.

Ap Agarìpa he Perenike eperak wagaukwama Paùlùt hesik yogoisasukwa wene

¹³ Atì'nogo isukwasik he, ineki hamùlùgat were'ma nen, ap kain etagepogot Agarìpa erei Perenike eperagat, ap Pesetùt hai wasuogolùk oba o Kaisarea wagaukwa.

¹⁴ Wagaukwasik ineki aike inom atoma were'ma, at Pesetùt a'nogo nen he, wene Paùlùt hesik Agarìpa mel yogosike: “Ap Pelìkìt en ap aike eki hele warek herakhesike mene yoma werek.

¹⁵ Werek kolek, an o Yerusalem lagìma, it ap Yahuri mene Ala esewerek inogogì kaintek mel, inalùgetek mel, inom noba wagaikasik he, an nen ap atì ùkùm oba hìlìk ebe wasuagalùk yogoneta.

¹⁶ Yogoneta mene re, an nen oko mel yogoisìgì: Nit apùnì Ùrùm mene hagatorek he, ap aike ùkùm oba hikenem, it ùkùm oba hogoinwerek en ap atì ebe yogotenem, at en oko it yogoisìgì'le'ma re, inebe inoasuagalùk wogisasak lek, ìlùk yogoisìgì.

¹⁷ Atì'nogo yogoisìgìrìk, inebe ninom yoma wagosìk, nineki welagì'legat he, hùenkwe nagoromì nen ap atì o apùnì ùkùm inoba hìgìk, kotìk, egarek oba wolok wesuagalùk yogoisìgì.

¹⁸ Atì'nogo yogoisìgìma, lagaikasik ebe wolok wagaikama, at ebe tùlem menhìlìk, it ap amanogo melarìk he, motok weak hagate mene ùkùm oba hogoin akìgì mene, atì'nogo oba hìgì'lek.

¹⁹ We, it en inopase Ala oba hìpìrìk logolìk inane hùnogo tomok egarek mene hesik ùkùm aike oba hìgìk, ap aike etage Yesùt atì, ebe wa'lagaike meneat he, at Paùlùt en he, Hobuk apotkwe eluk agaikesik werek o, ìlùk ane keirogo ìlì'logo atì nen ùkùm oba hìgìk, ega o.

²⁰ Ùkùm atì'nogo oba haga mene atì, an wene atì hesik hùthìgì'lek. Noake palagama re, an nen Paùlùt mel yogotì: O Yerusalem lìlìk en he, wene yì ero heragasogo, an nen elùgùn wasik en, lùok a? Habìt a, ìlùk yogotì.

²¹ Yogotìma, at Paùlùt en he, Wene yì at Kaisat en ero heragasogo elùgùn wasuak en neki hole waregat herakhaninok o, ìlùk ikomo, an nen nanoromì mel yogoisìgì: At Kaisat oba lakhousak aga halok, lakhegeinmo re, eki hele waregat hesogo logoino, ìlùk yogoisìgìma werek,” ìlùk yogosike.

²² Yogosikomo, at Agarìpa nen he, “Ap atì ane an nasuk lopok holusak walok o,” ìlùk yogosikomo, at Pesetùt en he, “Halok he, hùen halok ane hasuk holinok o,” ìlùk yogosike.

²³ Yogosikomo, hùenkwe ap Agarìpa ho, he Perenike ho, eperak hogorinapo kolek, it ap tentara inogogì kaintek mel, ap o atoma mene inetagewerek mene mel, inom o ùkùm inoba hìgìk kotìk egarek oba a'nogo kisukwa. Kisukwama, at Pesetùt en agoromì nen Paùlùt ebe wolok wesuagalùk yogoisasike.

²⁴ Yogoisasikomo lagaukwasik ebe wolok wagaukwama, at Pesetùt en he, “Agarìpa noe. Nen, hit ap aike ninoba ki wagep mene yoma hinom, nerùgì nagaiya'lak. Ap yì hineileken hegep yì re, it apùnì Yahuri mene o Yerusalem en, yoma nen, inebe obogat en, an yogonetì logolìk he, Ap yì eluk logousak lek. Wasusak o, ìlùk inane hùkorogoat ìlì'lùgì.

²⁵ It en atì'nogo ìlì'lùgì meneat he, an nen wene atì ero heratì mene re, at en weak aike eberogoat hagatenem, ùkùm inoba hìlìk inebe inoatarek higit hogo aike hagate le'ma hìgì. Meneat he, at okawerek en he, Ùkùm yì ap Kaisat en ero heragasogo elùgùn wasuak, ìlùk ikomo, Kaisat oba lakheigìlùk ìgì atì.

²⁶ Mene re, ùkùm at oba haga mene atì ero heratenem, an nen hùthìgì'lek noake palagama wene atì hesik helal waganogo ninoe kain Kaisat oba nìkì'nogo lakhousak heat agama nen he, nerùgì nagaiya'lak. Hit obogat mel, ebe esin hake noe Agarìpa mel hinom en ùkùm Paùlùt oba haga mene atì, ero heratenem, an hùthìlìk helal sekek hogo waganogo lakhegein ìlùk na'la akìgìrìk en at ebe hinoba wolok wagì yì.

²⁷ Atì'nogo hagatì atì re, wene ero heragasogo nen, Tì'nogo hagatomo, ìlùk helal sekek hogo wanì'le'ma, at eki hele warogo lakhousak he, mea akìgìrìk en at ebe wolok wagì atì,” ìlùk yogoisasike.