LAKSASIKE 24 - Ala Ane Wene Ket Mene Warogo Wo'ninapike Wene

Ap Yahuri mene nen ùkùm Paùlùt oba hesukwa wene

¹ Atì'nogo yogoisasikesik, ineki 4 nen welagaukwasik aike were'ma, it ap Ala esewerek mene inoe kain Ananiat mel, inalùgetek amanogo aike mel, ap aike wene hano nek ìkì lagaike mene etage Teretùlùt mel, inom o Kaisarea wagaukwa. Wagaukwasik he, ap kain gubernur Pelìkìt a'nogo ba kisukwasik, ùkùm Paùlùt oba houogolùk yogosukwa.

² Atì'nogo yogosukwasik, Paùlùt ebe waerìk he, Teretùlùt en ùkùm oba houagalùk, yogosukwama, at en Pelìkìt mel yogosike: “Gubernur Pelìkìt noe. Hat en ha'nisek werek kolek he, nit yoma hageat en weim lek lìoksek welago. Apùnì nit mene hesik he, ha'la kagauk hogo, higit hogo hagatì lagen atì ba yì mene tì mene hano arì'logo.

³ Hat en o ya ta ninhùp-nanhùp hanorogo hagatì lagen atì, nit en, Hano, ìlùk, hai motok wathapì lago. Noe.

⁴ Atì'nogo mene re, an nen wene uan yogohetenem habìt asinogo ìlùk, wene horoat yogohesigin yì, hoabùt hano a'nogo re, hasuk holinok en, wene ebe yogohesik.

⁵ Ap yì nen he, apùnì weagarinabìk nikenem, oabùt palho. It apùnì ap Nasaret mene a'nogo opolik lìlì'lùgì mene inoe kain logolìk he, apùnì Yahuri mene o yì awì tì awì welagaikarek mene obogat ina'la menerìk niko.

⁶ Atì'nogo ina'la menerìk nìkì lagasik he, o Ala awì wùrìk weagatheigìlùk ikenem ebe hakhogo. [Hakhogosik he, wene nit apùnì Yahuri mene hagatorek mene ba anema wanuogolùk ogo.

⁷ Atì'nogo meneat he, ap tentara mene inoe kain Lisiat a'nogo wagasik he, ebe ninekimo nen telogo wolok lagasik yoma lakhei waga atì.

⁸ Atì'nogo lakhei wagasik ùkùm ap yì oba hogo mene ninebe hat hoba wesuagalùk yogonisikomo wago yì.] Nit en ùkùm oba hogo mene atì, hat en anema wanhì logolìk, helu asiginat o,” ìlùk yogosike.

⁹ Atì'nogo yogosikomo, it ap Yahuri mene he'nakìt amanogo nen hogo re, ùkùm at oba hìkì logolìk he, “At Teretùlùt en ike atì, eberogoat ike o,” ìlùk yogosukwa.

Paùlùt ebe elelerogo, at Pelìkìt yogosike wene

¹⁰ It en wene atì'nogo isukwama re, at kain gubernur a'nogo nen wene Paùlùt en aike uagalùk eki tùm pìlìng yogosike. Yogosikomo, at en he, “Noe. Apùnì nit mene, yì ùkùm tì ùkùm inoba hikenem, hageat en yì tahun tì tahun hat en inanema waganogo ùkùm inoba hìgìk, kotìk, egetek atì an nelu o. Atì nen, ùkùm an noba haga atì, le'maat, ìlùk, nebe elelerogo harat yogohesigin yì nen, na'la hai hakìkì lagì.

¹¹ An Ala hogorasigìlùk o Yerusalem kerat lagarìk oba nen, nineki 12 enek welago, ma re, hat en, Eberogoat a? lek a, ìlùk it hinok wogisamo helu asiginat o.

¹² An o Ala awì wùrì'mo kìlìk mel, o apùnì Yahuri mene sapan egarek obakwe kìlìk mel, o silimo wele'ma wùlìbi lìlìk mel, apùnì aike ninom ninane sagalhìk, nen, it aike inane hùkoat sagaluagalùk ina'la menetìk, ìgì'lek. Atì'nogo hagatenem it ap Yahuri mene nen ineileken nììgì'legat o.

¹³ It ap yì nen ùkùm noba hìlì'lùgì atì re, Eberogoat hagatomo, ìlùk nena mene inùkheogoin. Ìnùkheasak legat asigin o.

¹⁴ Mene re, wene eberogoat hagatì lagì mene ebe yì pak hogo yogohesik. It en he, Apùnì Yesùt opolik lìlì'lùgì atì weak, ìlùk egarek. Meneat he, an enek he, it en, weak egarek mene atì ane hologo, Ala nit ninopalak awe a'ma kìlìk welagaukwa mene atìat hogoratì lagì atì nek he, eberogoat hagatì lagìat o. Hogoratì logolìk, wene Ala nen ninasuk wasike wene atì mel, ap at ane yogoisìkì lagaukwa mene inane mel, obogat helal waganogo hesukwa mene werek atì, eberogoat ìlùk hesogo welagì.

¹⁵ It ap yì nen he, Apùnì hano hagarì'lùgì mene mel, weak hagarì'lùgì mene mel, inebe wa'larìk were'ma eberogoat Ala nen inelugurinabigin, ìlùk, inetaùken Ala oba hìpìrìk werek atì hak, an atì'nogoat welagì o.

¹⁶ Atì'nogo logolìk, na'la nen he, Weak aike hagatì, ìlùk na'la ekin logoinogo ìlùk he, Ala hesik mel, apùnì hesik mel, hano hagatì lagì ìlùk, na'la selek logoigìlùk, nomamerogo hagatì lagì o.

¹⁷ “An mo lagagìk, pìgìk, tahun logolegat o Yerusalem lagì'lek welagarìk he, nerùgì nagaiya'lak ninebe omakeat mene uak, uang aike leberisìgìk, Ala hesik aike hisìgìk, igìlùk lagì.

¹⁸ Lagarìk he, atì'nogo hagatì logolìk, o Ala awì wùrì'mo kuogolùk inoba horatarek atì hagat atì'nogo hora'lùk en kìgì. Atì'nogo hagatì atì, apùnì logolegat ninom kìgì'lek. It aike ninom ninane sagalhì'legat were'ma it Yahuri mene nen ineileken neegaat o.

¹⁹ We, it ap Yahuri mene aike o propinsi Asia nen lagaikasik atoma welagaika. Atì'nogo welagaika neileken isìgìrì'mo re, it enat ùkùm noba housak halok he, hat hoba ya wìrìk en ùkùm noba housak mene.

²⁰ It inebe lek halok he, it ap yoma werek mene nen uak. Apùnì nen it ap Yahuri Ala hesik wene ero pìlìngìtarek mene inoba hani lagaikasik, atoma metek werek kolek wene ero herata. Atì'nogo heratenem, an weak hagatì mene aike eberogoat inasuk holha mene nenat uak o.

²¹ An atoma metek logolìk, wene omakeat yì nek nane hùkorogo yogoisìgì atì: Apùnì wa'lagaikarek mene Ala nen eberogoat inelugurinabigin, ìlùk hùthìkì lagì atì nen, ùkùm noba hìkì lagep yì, ìlùk yogoisikenem enek he, inasuk holha atì,” ìlùk yogosike.

²² Atì'nogo yogosikomo, at Pelìkìt apùnì Yesùt opolik lagaikarek wene atì elu nogo nen he, Paùlùt mel yogosike: “Yogotak wene arat ogo. Hobuk ap tentara inoe kain Lisiat a'nogo ebe waga halok en, ùkùm hoba haga mane atì, an nan wene m heragasogo elùgùn wasigin o,” ìlùk yogosike.

²³ Atì'nogo yogosikesik, at agoromì tentara kain aike nen Paùlùt ebe serogo logouagalùk mel yogosike: “Hat en Paùlùt hesogo logolìk, yùgùnat nìkì logouagalùk hebeino. Nen, apùnì at mene nen yì mene tì mene at walok mene lebethùogolùk iko halok he, wenagisagùn o. Heraksìkì logoino,” ìlùk asuk wasike.

Paùlùt ap Pelìkìt mel, he Terusila mel, inoba wolok lagaukwama yogoisasike wene

²⁴ At Pelìkìt en atì'nogo, “Serogo logoino,” ìlùk yogosikesik, ineki hamùlùgat welagaukwasik en, at agwe etage Terusila, he ebe Yahuri mene. Wolok wagaikesik he, agoromì nen Paùlùt wani loagalùk yogoisasikomo lagaukwasik ebe wolok wagaukwama re, at Paùlùt en apùnì inetaùken Karìsùt Yesùt oba hìpìrìk welagaikarek wene atì yogoisikenem, Pelìkìt asuk holek welagaike.

²⁵ Atì'nogo holek werek kolek, higit hagatì logousak wene atì mel, inetaùken sebeksek logousak wene atì mel, hobuk Ala nen apùnì ninanema wanìk ùkùm ninoba hìgìk, kotìk, igin wene atì mel, yogoisikenem, Pelìkìt ayùk agaike. Ayùk arìk he. “Yagotak wene arat egen o. Hobuk usak higit aga halok he, wahesigin o,” ìlùk apotkwe lakhesike.

²⁶ Atì'nogo lakhesikesik, a'la nen he, “Paùlùt en uang aike wo'nesigin he a,” ìlùk akìkì logolìk, ninhùp-nanhùbat waerìk he, weneane eperak ìkì lagaukwa.

²⁷ Atì'nogo iko kolek, mo lagagìk pìgìk 2 tahun welagaukwasik en, hobuk Pelìkìt obùlù'mo ap aike etage Perekìùt Pesetùt gubernur asuagalùk menhesukwa. Menhouogolùk ikenem, at Pelìkìt en he, “It apùnì Yahuri mene ina'la hanorogo,” ìlùk Paùlùt eki hele waregat herakhesike.