LAKSASIKE 22 - Ala Ane Wene Ket Mene Warogo Wo'ninapike Wene

¹ “Nogogì nagoromì. Wene yì an noba le'ma o, ìlùk nokawerek nebe elelerogo yogohisegein yì re, hinasuk hanorogo holino,” ìlùk ikenem,

² it en he, “Nit apùnì Iberani mene ninane ba yogonisìlì'logo,” ìlùk inane motok li'-lek agaukwa. Inane li'-lek agaukwama re, at en he, mel yogoisasike:

³ “An he, ap Yahuri mene, nebe o propinsi Kilikia o kota Tarasùt ta'lagagi meneat he, o Yerusalem yoma nen kùlnapukwama nalùge agagi. Nalùge agagimo, ap kain Kamaliel nen wene Ala nen ninopalak inasuk wasike wene a'nogo tùkùm hogo yakùlnetì lagaike. Yakùlnetenem, an nen hit yogotak Ala hesik hinomamerogo hagatì lagep atì hagat hagatì lagagi.

⁴ Hagatì logolìk he, apùnì Yesùt ane wanhukwasik opolik yì'nogo laga lagaukwa mene hùgì inoasigìlùk mùgisek laga logolìk aike inoasigiat. It aike hìmì lek, ap lek, ineki hele warogo wogisek, o ineki hele warek hisagarek oba hìikì lagagiat.

⁵ Atì'nogo hagatì lagagi atì, ap Ala esewerek mene inoe kain ebe mel, inalùgetek mel, inom obogat en surat hagarogo ninagaiya'lak Yahuri mene o Tamìsìk mene inoba wolok loagalùk wo'nesukwa. Wo'nesukwama, it apùnì Yesùt ane wanìk opolik laga lagaukwa mene o atoma were'ma ineki hele warogo wogisek, o Yerusalem yoma hisa waganem, ùkùm inoba hìgìk, inebe inoatìk, uagalùk lakhanhukwasi'mo nogo nen he, it inelu. Halok, it enat, Eberogoat ike, ìlùk yogohisasak werek o,” ìlùk yogoisasike.

At Paùlùt en he, “Yesùt en tì'nogo wanesikomo nepe hebelhigi,” ìlùk yogoisasike wene

⁶ An o kota Tamìsìk horogat legein ha'ma re, likene omake hesigat pogot oba nen apipin motok apik mene an nera'lukwe yasi pi wagaike.

⁷ Yasi pi waganem he, an nebe kweangma tukwak hogo po isigi. Po isigimo, at aike nen ane yogonetì logolìk he, Saùlùt. Saùlùt. Anat yì aik tì aik haga'nabigìlùk mu'narek nìkì lagen atì nenahalok, ìlùk yogonesike.

⁸ Atì'nogo yogonesikomo, an nen he, Eige. Noe. Hat sa, ìlùk yogosigimo, at en he, An Yesùt, nawì Nasaret mene, yì aik tì aik haga'nabigìlùk mù'narek nìkì lagen mene a'nogoat o, ìlùk yogonesike.

⁹ Yogonetenem he, it ap an ninom lagagu mene nen, lìa atì ineileken hasukwa meneat he, ane an yogonesike atì, inasuk holhì'lek.

¹⁰ Inasuk atì'nogo holhì'lek werek kolek, an nen he, Noe. An nìkì'nogo hagasik, ìlùk yogotenem, at en he, Hebe melarìk he, o Tamìsìk kino. Kìlìk were'ma, hat en Ala walok mene obogat hagasigin mene hesik ap aike nen yogohesigin a'naga o, ìlùk yogonesike.

¹¹ Atì'nogo yogonesikomo, lìa a'nogo nen neileken silukk-pabuk ìlìk mùm agaike. Mùm agaikomo re, it ap ninom lagagu mene amanogo nen neki hak-hak o Tamìsìk wo'narek kisukwa.

¹² “Kisukwama, o Tamìsìk atoma ap aike etage Ananiat. Wene Ala nen ninasuk wasike wene a'nogo hesogo logolìk higit hogo hagatenem, it apùnì Yahuri mene o Tamìsìk mene obogat en inane agauk hogo yogotì lagaukwa.

¹³ At ebe an noba wagaikesik, nera'lu metek logolìk he, Saùlùt, nagaiyak. Heileken hekename o, ìlùk yogonetenem, aremnogoat an neileken hekenarìk, at ebe tùkùm hogo hasigi.

¹⁴ Hikenem, at en he, At Ala ninopalak en hogoratì lagaukwa mene a'nogo nen he, at a'la akikerek mene helu agìk, at aput oabùt higit mene Yesùt atì heileken ìgìk, at ane ape ba nen ikenem hasuk holhìk, inogolùk, hebe wenakhapesik hayoko hike atì.

¹⁵ Halok, heileken hìgìk, hasuk holhìk, egen mene atì re, apùnì obogat pak hogo yogoisìkì logoino.

¹⁶ Mene re, hat yogotak aregenma logousak lek. Hebe mel arìk he, hat weak hagatì lagen mene Ala nen sobalhapìk, it aike nen ima pelakhapìk, uak en he, Yesùt etage palogo Ala ayoko heino, ìlùk yogonesike,” ìlùk yogoisasike.

“Yesùt en Ala ane apùnì etakwe mene yogoisa loagalùk, nayoko hesike,” ìlùk yogoisasike wene

¹⁷ Atì'nogo yogoisasikesik, aike mel yogoisasike: “Atì'nogo yogonesikomo, an hobuk o Yerusalem wagagisik he, Ala awì wùrì'mo sapan ikenem, Areagùn na'la kisikomo nabìkakan hasigi.

¹⁸ Nabìkakan oba, ninoe Etagepogot en he, Hat en, heileken an neegen mene atì mel, hasuk holhen mene atì mel, apùnì o yoma mene pak hogo yogoisikenem, hane inasuk holugun motok lek o. Halok, o Yerusalem yoma nen hepok wùlìbino, ìlùk yogonesikomo, nabìkakan oba hasigi.

¹⁹ Atì'nogo yogonesikomo, an nen he, Noe. An o sapan egarek obakwe ya kìgìk, ta kìgìk, laga logolìk he, apùnì inetaùken hat hoba hìpìrìk welagaukwa mene hùgì, ineki hele watìk, tùgì inoatìk, hagarìk nìkì lagagi a'nogo, it motok inelu o.

²⁰ At Sitepanùt, wene hat hesik pak hogo apùnì yogoisìkì lagaike mene a'nogo ebe watenem, an nebe atoma metek logolìk, Heing! Hano wata, ìlùk, it ap wasukwawerek inasu nokolek serogo welagagi atì, it ineluat o, ìlùk yogosigi.

²¹ Atì'nogo yogotenem, ninoe Etagepogot en he, It apùnì etakwe mene walegat atoma inoba lakhagagin atì nen he, lan o, ìlùk yogonesike,” ìlùkk yogoisasike.

²² Paùlùt en atì'nogo yogoisìlìk waganem, it amanogo inasuk hano holek welagaukwasigat he, hùlì atem oba ikenem inane hùkorogoat mel isukwa: “Ap oabùt yìgìnìk he, kweangma eluk logousak lek. Wasuok o!” ìlùk

²³ inokawerek inasu nokologo laksìgìk, kweang alolongeke yalelogo lìaksìgìk, isukwa.

²⁴ Atì'nogo ikenem he, ap tentara esa logolhì lagaukwa mene inoe kain a'nogo nen, agoromì yogoisìkì logolìk, “Paùlùt ebe o ningsek wùrì'mo arì wolok kìlìk, apùnì Yahuri menu nen inane hùkorogo wene oba hìlì'lùgì atì, wane ero nìkì'nogo hagatomo nen ìlùk tùgì warogo wene ero hera'no,” ìlùk yogoisasike.

²⁵ Atì'nogo yogoisasikomo, it en ebe tùgì wasuogolùk hele warogo hesukwama, at Paùlùt en he, ap tentara mene kain aike atoma metek were'ma mel yogosike: “Hit en, ap aike o Ùrùm awìwerek meneat he, ùkùm oba hìgì'le'ma tùgì tak wasusak nogo?” ìlùk yogosike.

²⁶ Yogotenem, kain a'nogo nen yoko ap tentara esa logolhì lagaukwa mene inoe kain a'nogo oba lagaikesik he, “Hat nìkì'nogo hagasigìlùk egen mene nogo. Ap yì ebe o Ùrùm awìwerek meneat o,” ìlùk yogosike.

²⁷ Yogosikomo re, ap tentara kain a'nogo Paùlùt oba wagaikesik he, “Hat hebe o Ùrùm hawìwerek mene a? Yogonom,” ìlùk yogosikomo, at en he, “Nen, an nawìwerek meneat o,” ìlùk yogosike.

²⁸ Atì'nogo yogosikomo, ap tentara mene inoe kain a'nogo nen he, “An oko hùkoat palogo nen nawìwerek agagisik welagì,” ìlùk yogosikomo, at Paùlùt en he, “An o Ùrùm nawìweregat ta'lagagi meneat o,” ìlùk yogosike.

²⁹ Atì'nogo yogosikomo re, it at tùgì wasuogolùk isukwa mene amanogo nen hepogat hek hogo herakhesukwa. Atì'nogo herakhesukwama, ap kain a'nogo a'la nen he, “Paùlùt ebe o Ùrùm awìwerek mene werek kolegat, eki hele watìma yì nayùk e,” ìlùk ayùk apik agaike.

Paùlùt ebe it ap Yahuri mene wene ero pìlìngìtì lagaukwa mene inoba wolok lagaikomo yogoisasike wene

³⁰ Hùenkwe, it ap tentara esa logolhì lagaukwa mene inoe kain a'nogo nen, “It apùnì Yahuri mene nen ap yì ùkùm nìkì'nogo mene oba hìlì'lùgì. Wane tùkùm hogo nelu asusak mane,” ìlùk wene ero herasuogolùk, it ap Ala esewerek inogogì kaintek amanogo mel, ap Yahuri Ala hesik wene ero pìlìngìtì lagaukwa mene amanogo mel, atogosuagalùk inayoko hesikomo atogosukwama re, Paùlùt eki hikalogo hìlìk it inoba wolok lagaikesik he, inelokoma menhesike.