KOLOSE 4 - Ala Ane Wene Ket Mene Warogo Wo'ninapike Wene

¹ Nen, hit it atì inogogì kaintek mene, hina'la nen he, “Ninoe Etagepogot pogot oba werek o,” ìlùk hùthìlìk he, hinagoromì hinatitigeke mene atì, yì mene tì mene wogisasak higit hogoat wogisìkì logoino o.

“Sapan tì'nogo ìkì logolìk, hinoabùt tì'nogo hagatì logousak,” ìlùk yogoisasike wene

² Sapan he, Ala hai watì logolìgat, hinaberalì agì'lek hutik-hutigat ìkì logolìk, hinepe hebelogo logoino.

³ Sapan ìkì logolìk, nit hesik he, mel ìkì logoino: “Ala ninopase. Wene Karìsùt en hagasike wene, alep ha'la hinago welagaike mene a'nogo, it Paùlùt lak en yogoisìlìk nìkì logouagalùk, kwe hùrisano,” ìlùk, sapan nit hesik ìkì logoino. Wene atì hesigat neki hele warogo hanhama yoma welagì.

⁴ Wene atì, an nen yogoisasak higit hogoat, tùkùm hogo yogoisìkì logoik en he, sapan ìkì logoino.

⁵ It apùnì Ala ane inokot mene hesik he, hit hina'la motok kagalek logolìk, “Nit Ala againapùrì hagasusak mene hanoasuak ya baat hagatì logouok,” ìlùk atì meneat hagatì logoino.

⁶ Hinane yì hesik tì hesik it aike yogoisìkì logolìk, yì mene tì mene mayu helhenem etuk hano egarek hak, “Wene atì hano ù,” ìlùk, wanuagalùk, hinane lìok hogo yogoisìkì logoino. Atì'nogo yogoisikenem, it hinoba hinok wanhenem, wene oko inebe lopok yogoisoageip en, hinelùrogo logoino.

Wene elùgùn warogo hai warinapike wene

⁷ At Tìkìkùt ninagot ninetawì mene, nit ninomat ninoe Etagepogot atitigeke logolìk, at hesik oabùt hùpùn hogo hagaterek mene nen wene an nabok hobuk yogohisa wesigin a'naga o.

⁸ Hit en he, “It inebe atì'nogo werek hìgì,” ìlùk, wene hinelu arìk he, hinetaùken hapuk uagalùk, atì hesigat hinoba lakhei wesigin atì.

⁹ At eperak wesuagalùk, ninagot Onesìmùt, ebe ap hit mene oabùt hùpùnsek ninetawì mene a'nogo, eperagat laksa wesigin atì. It wìrìk he, wene nit yoma hagatì lago mene obogat yogohisa wesugun o.

¹⁰ Arisitarekùt an neperak nineki hele warek welago mene nen hai wathinapìk, Parenapat agaiyak Marekùt a'nogo nen hai wathinapìk, ega o. At Marekùt hesik wene alep yogohisasigi a'nogo hagat, at ebe hinoba waga halok, hanorogo wanino.

¹¹ At Yùsìtùt, etage aike Yesùt a'nogo nen, hai wathinapeat o. Inogat inekalìma mene palek mene re, inebe hìnagan atem enek Ala awe a'ma logogun wene a'nogo ninom en yogoisìkì logolìk lebe'niikenem na'la hano arì'logo.

¹² At Epaperat, Karìsùt Yesùt atitigeke, ebe hit meneat a'nogo nen, hai wathinapeat o. At en he, hit hina'la nen, “Ala ane atì eberogoat,” ìlùk huthìlìk he, hinetaùken wurik arìk hinebe metegat logolìk he, yì mene tì mene Ala a'la akikerek hak hagato logouageip ìlùk sapan hit hesik ning hogo iko motogat welagarek.

¹³ Ati'nogo ìkì logolìk, hit hesik mel, apùnì o Laolikia mene hesik mel, Hierapolìt mene hesik mel, omamerogo hagarì'logo ìlùk, an nen oabùt palhìrìk en yogohisìgì atì.

¹⁴ At Lukat, ebe loktet logolìk ou hagarinaperek mene ninetawì mene a'nogo nen hai wathinapìk, at Temat en hai wathinapìk, egaat o.

¹⁵ It ninerùgì ninagaiya'lak Ala againapùrì o Laolikia welagaikarek mene atoma mel, he Nìmìpa a'nogo mel, Ala againapùrì aike at aua atogorogo Ala ane yakùlì'lùgì mene mel, “Paùlùt lak en hai wathinapa,” ìlùk yogoisano o.

¹⁶ Wene helal palogo hinoba lakhei wago mene atì, arat etage salhep halok he, it Ala againapùrì o Laolikia atogorì'lùgì mene inasuk holuak en etage saluagalùk lakheino. Nen, it Laolikia mene inoba Lakhìgì a'naga, hit hinoba lakhei waganem, etage salinoat.

¹⁷ At Arìkìpùt a'nogo wene mel ìlùk yogo'no: “Ninoe Etagepogot en hayoko hìkì logolìk he, Yabu an hesik tì'nogo haga'no, ìlùk yogohesike mene atì, elùgùn warogo haga'no,” ìlùk yogo'no.

¹⁸ Yì nek he, an Paùlùt nokawerek neki nen helal waganogo hai wathinapì. Hit en he, “Paùlùt eki hele warek werek,” ìlùk noba eberek logoino o. Ala oabùt hano a'nogo nen hakhisek logouak o.