KOLOSE 3 - Ala Ane Wene Ket Mene Warogo Wo'ninapike Wene

¹ At Ala nen he, Karìsùt eluguthìkì logolìk, hit hinomat hineluguthinapikomo welagep atì nen, yì mene tì mene Karìsùt ebe pogot oba Ala era'lu eki ebekwe kainat welagarek oba atoma mene hela lùogolùk, hinomamerogo hagatì logoino.

^2-3 Hinebe wa'lagagisip he, hobuk Karìsùt hinomat hineluk logogun mene Ala nen oan sele'mathìgì'lek abùrarek werek atì nen, hina'la re, yì mene tì mene kweangma mene oba ebetì'lek logolìk he, pogot oba mene oba ebetì logoino.

⁴ Ebeto were'ma, at Karìsùt ninebe hobuk nineluk motok logouagalùk haga'ninaperek mene a'nogo weinam hogo waganem he, hit at hinomat weinam arì'mo hogothinabugun atì.

“Hinoabùt alep mene heraksìlìk he, ket mene wanino,” ìlùk yogoisasike wene

⁵ Ati nen he, hinoabùt hinesogat logolìk, hina'la nen yì walok tì walok akegesep mene atì warogo heraksìkì logoino. Hinoabùt atì re, pailak haksagarek atì mel, ina'la nen, walok ìlùk wesi nekarek atì mel, inetaùken nikeresik inoba aiyage lagaikerek atì mel, ineileken lagisìlìk ina'la nen walok akagarek atì mel, tùgì hareken oba hìpìrìk logou hak, ina'la nen, “Yì mene tì mene, an mene nek logoilep,” ìlùk akagarek atì mel, hinoabùt atì mene obogat warogo heraksìkì logoino.

⁶ It apùnì Ala ane inasuk holùhùk mene nen inoabùt atì'nogoat hagatenem, Ala a'mage lagalìk, weagarinabigin werek o.

⁷ Hit alebat he, atì mene hesigat hagatì logolìk, hinoabùt atì'nogoat hagato welagagip.

⁸ Atì'nogo meneat he, yogotak hit hinoabùt aike yì mene obogat heraksasagat. Ina'mage lagaikerek atì mel, ina'makwe heperikerek atì mel, it aike weagarinaparek atì mel, inape ba re, inabok weak palhìk, weak hagatarek mene asegen sabok ìgìk, egarek atì mel, heraksìkì logoino.

^9-10 Su alep mene nokologo laksìlìk he, hobuk ket mene labetarek hak, hit hinoabùt alep hagatì lagagip mene heraksìlìk, hobuk hinoabùt ket mene wanhìgip atì nen, hinapeliak ìkì logogùp o. Hinoabùt ket mene atì, Ala nenat elalhinapikesi'mo nogo nen he, at okawerek oabùt hake haga'larìk he, ebe motok tùkùm hogo hinelu asuagalùk, hobugalebat hagathinabì'logo atì.

¹¹ Atì'nogo hagathinapenem he, ninebe obogat ninoe Etagepogot Karìsùt aligatma, ninebe obogat at ninom hutik welago atì nen, inùkùl etage Yunani mene ìgìk, Yahuri mene ìgìk, egarek atì mel, inogat inekalìma mene palek mene ìgìk, pale'lek mene ìgìk, egarek atì mel, inane okut palek mene ìgìk, inebe Yalì-Somagei mene ìgìk, egarek atì mel, inatitigeke mene ìgìk, inalepma mene ìgìk, egarek atì mel, ìkì logousak lek welagep atì.

¹² Hit hinebe, Ala nen wenagasogo okawerek hesik hakasikesik he, “An nokawerek nagainapùrì o,” ìlùk, etawìrogo welagarek atì. Halok he, su ket mene labetarek hak, hinoabùt mel mene wanino. Inebe inetawìrinaparek mene atì mel, inoabùt enago welagaikarek mene atì mel, inokawerek en hogorakìgì'lek inetaùken seberogo welagaikarek mene atì mel, inoabùt lìok hogo hagatarek mene atì mel, inepe morogo welagaikarek mene atì mel, hinoabùt atì mene wanino.

¹³ Hit-hit aike nen aike weak hagathinapenem, eken hìgì'lek hinepe morogo logolìk, sagalogo heraksìkì logoino. Hit weak hagatì lagagip mene, ninoe Etagepogot en sagalogo heraksasike hak, hit-hit atì'nogoat sagalogo heraksìkì logoino o.

¹⁴ Atì'nogo hagatì logolìk, ebe esin hake re, apùnì inebe hinetawìrogo logoino. Inetawìrogo welagaikarek mene atì ba, hinebe omakeat motok lapuk hogo logou hagat logogun atì.

¹⁵ At Ala nen Karìsùt ebe omakeat mene hinom lapuk hogo hutik logouageip ìlùk hinayoko hesike atì nen, yì hesik tì hesik hagasuogolùk, hina'la nen he, “Karìsùt en ninom lapuk hogo hinasikomo welago,” ìlùk, wene atìat esinethìkì logolìk he, higit hogo hagatì logoino. Atì'nogo hagatì logolìk, Ala ebe hai watì logoino.

¹⁶ Apùnì inagarok apik mene ineilmo wulalhak welagaikarek hak, hit he, Karìsùt ane atìat hinetaùkenma ning hogo hìlìk logolìk he, hina'la kagalogoat, hit-hit wene hinasuk wat-wat ìkì logolìk, wene hit en yakùlisìgìk, it en yakùlhisìgìk, ìkì logoino. Yakùlisìkì logolìk he, Ala hesik wùnì Masimùt wùnì watìk, etawì Ala hogoratarek etawì watìk, Ala Areagùn nen hina'la kagalhenem, wùnì helalogo watìk, ìkì logolìk he, hinetaùkenma nen Ala hai watì logoino.

¹⁷ “Ninopase Ala nen wo'nisikerek atì, ebe Yesùt enat wo'nisikerek o,” ìlùk, Ala hai watì logolìk, “Ninoe Etagepogot Yesùt awe a'ma logolìk hagatì lago,” ìlùk, yì mene tì mene obogat hagasuogolùk, hinane yì hesik tì hesik uogolùk, at Yesùt etage palogo hagatì logoino o.

Hìmì ap yekerùgì inaua omakìma mene, “Tì'nogo hagatì logousak,” ìlùk inasuk wasike wene

¹⁸ Hit hìmì nerùgì. Ninoe Etagepogot hinom hutik logolìk hinoabùt hagasusak higit hogoat, hinagonì inawe a'ma logolìk inane hologo hagatì logoino o.

¹⁹ Nen, hit ap nagaiya'lak. Hinagagwì mep lagai'-lagak hogo hagarinapì'legat, hinetawìrogo logoino o.

²⁰ Nen, hit yekerùgì, nagoromì. Hinagosa, hinopaselak en, yì mene tì mene hesik yogohisikenem, inane hologo hagatì logoumo, ninoe Etagepogot oba lìok igin atì nen, atì'nogoat hagatì logoino o.

²¹ Nen, hit inopaselak, nagaiya'lak. Hinagainapùrì ina'la kolo asinogo ìlùk ina'mage lìapì logogùp o.

²² Hit inatitigeke mene nerùgì nagaiya'lak. Hinogogì kweangma mene nen, yì mene tì mene hagasuagalùk ikenem, inebe ineilhanem halok ina'la hanorogo hagatìk, lek halok kamo ìgìk, ìkì logogùp o. At he, ninoe Etagepogot hinayùk hogo hinetaùken omakeat logolìk, hinogogì atì inane hologo hagarisìkì logoino o.

²³ Yì mene tì mene hagatì logolìk, hina'la nen he, “Apùnì hesik hagatì lago lek o. We, ninoe Etagepogot hesigat o,” ìlùk, hinetaùken oba nen hagatì logoino o.

²⁴ Hinebe re, ninoe Etagepogot Karìsùt at awe a'ma logolìk, at hesigat hagatì lagep atì nen, hina'la nen he, “Nit hagatì lago atì hesik, oko re, at ninoe Etagepogot Karìsùt en esethinegein werek o,” ìlùk, hina'la hùthìlìk logoino.

²⁵ Mene re, at ninoe Etagepogot en he, apùnì inelokoken oba nek eileken isìlìk, aike elokoma hisìgìk, aike apotma hisìgìk, ikerek lek atì nen, sa nen weak hagate mene hesik, oko wogosu hak he, weak hagate atì higit hogoat ùkùm oba hegein werek o.