KOLOSE 1 - Ala Ane Wene Ket Mene Warogo Wo'ninapike Wene

Hai warinapike wene

^1-2 Hit Ala againapùrì o Kolose atogotesep mene Karìsùt hinom hutik logolìk, at hesik hinoabùt hùpùn hogo hagatì lagep mene, nerùgì nagaiya'lak. An Paùlùt Ala a'la akasike ba, Karìsùt Yesùt en nayoko hìlìk lakhani wagaikomo wagagi mene a'nogo, ninagot Timotìùt neperak en wene yì helal waganogo hinoba lakhei wago atì. Ninopase Ala oabùt hano a'nogo nen, hano mene wokhisìgìk, hinetaùken hapuguthinapìk, ìkì logouak o.

It Ala againapùrì Kolose mene inoabùt hagatì lagaukwa ba, Ala hai wasike wene

^3-6 It aike nen hit yogoisìkì logolìk he, “Hit mene hano mene Ala nen wokhisegein mene pogot oba hikikomo werek o,” ìlùk yogohisasukwama, hinetaùken Karìsùt Yesùt oba hìpìrethìlìk, hagatenem, it aike nen he, “It inetaùken Karìsùt oba hìpìrethìlìk Ala againapùrì aike obogat inetawìrogo hagarì'lùgì,” ìlùk, hinabok ikenem ninasuk holhosik he, ninhùp-nanhùbat sapan hit hesik ìkì logolìk, ninoe Etagepogot Yesùt Karìsùt opase Ala at hai watì lago o. Hit wene hano wene, Ala oabùt hano nen hagarinaperek wene a'nogo emakum yogohisa wagaukwama, hinasuk holhigisip he, eberogoat ìlùk hùthasigip atì hùlì, Ala nen hanothinabì'logo hak, hano wene atì o yì awì tì awì Wìalarìk laga logolìk, Ala nen apùnì atì'nogo hano hagarinabì'logoat.

⁷ Hano wene atì, at Epaperat ninagaiyak ninetawì mene nen yakùlhisikenem yakùlhigip atì. At ebe re, Ala atitigeke nit ninom higirat logolìk, Karìsùt en ayoko hìlìk, lakhei wagaikomo, nit en yogohisa hak ninobùlù'mo oabùt hùpùn hogo yogohisìlì'logo atì.

⁸ At ebe ninoba wagasik en he, mel ike: “It inoabùt he, apùnì aike inetawìrinaparek atì mene, Ala Areagùn nen wogisikenem, apùnì aike inetawìrogo hagarì'lùgì o,” ìlùk, hinabok tùkùm hogo yogonisa waga atì.

⁹ Hinabok atì'nogo ikenem ninasuk holhosik he, nit en hit hesik sapan ìgìk, Ala ayoko hìgìk, kamo ìgì'lek iko motogat welago. Atì'nogo ìkì logolìk Ala Areagùn nen hina'la kagalhenem, hina'la motok kagalogo wene hùthìlìk he, at Ala a'la walok akikerek mene atì hit en, tùkùm hogo hinelùrogo logouageip ìlùk ayoko hìkì lagoat.

¹⁰ Atì'nogo hinelu arìk he, ninoe Etagepogot a'la hanorogo, at walok akikerek mene higit hogo hagatì logousagat. Yì mene tì mene awì yatenem ero hùko arik eken ìterek hak, hit Ala oabùt hinelu aga logolìk, yì mene tì mene hano mene hagatì logousak atì.

¹¹ Ninopase Ala omame apik hogoratarek mene a'nogo hinomamethinapenem, hit hinomamerogo motok logouageip ìlùk ayoko hìkì lagìat. Atì'nogo hinomamethinapenem, yì mene tì mene ekin hinoba aga kolek, hina'la pùk agì'lek, hinepe morogo logolìk, hina'la hai hakìgìk,

¹² ninopase Ala hai watìk, ìkì logousak atì. At ninopase nen, at againapùrì aike hinomat lìa ba hinawìwerek logouagalùk hagathinapikomo welagep atì nen, arat hai watì logousak atì.

¹³ Nit alep o mùmmo weak mene nen awe a'ma hele warogo ha'nisek were'ma, Ala nen hele hikalogo wo'ninabìk he, aput etawì mene a'nogo ha'nisek logouagalùk awe a'ma hinikomo welago.

¹⁴ Ala nen atì'nogo hele hikalogo telninapike atì, ebe re, at aput enat hele hikalogo telninabìk, yì weak tì weak hagatì lagagu mene atì, arat horogo legetsasike atì.

“Ebe esin he, Karìsùt at,” ìlùk yogoisasike wene

^15-16 Ala ebe nineileken hogorek lek meneat he, ebe poto hagarek hake, Yesùt ebe atìat o. At Ala nen, yì mene tì mene, pogot oba mene mel, kweangma mene mel, nineileken hogorek mene mel, hogorek lek mene mel, elalhike atì. Nineileken hogorek lek mene aike re, malaikat inomame apik logolìk inawe a'ma hagisek were'ma inane hologo welagaikarek mene atìat. Ala nen atì'nogo obogat elalhike atì, ebe re, at Karìsùt enat, okawerek hesigat elalhike atì nen, yì mene tì mene obogat atì, abel negen werek kolek, esin he, Ala aput makusa mene Karìsùt at atì.

¹⁷ At Ala nen yì mene tì mene oan elalhì'lek werek kolek welagaikesik he, yogotak yì mene tì mene obùlù'mo lopok werek atì, at enat hesogo were'ma hano werek o.

¹⁸ Nit Ala againapùrì ninoe kain at Karìsùt logolìk, ninebe ninelugu'ninaperek atì nen, at ebe eki esok negen welagorek. Yì mene tì mene abel negen werek kolek, at Ala nen, “Esin he, an naput makusa meneat logouak,” ìlùk, at ebe wa'lagaikesi'mo nen, eluguthesike atì.

¹⁹ At Ala nen, “An na'la walok he, an noabùt nesok motok welagìrek atì hak, an naput atì'nogoat neperak higit motogat logouak o,” ìlùk, a'la akasike higit hogoat welagarek.

²⁰ Yì mene tì mene kweangma mene mel, pogot oba mene mel, obogat Ala inom weak agaukwasik, weim palek hake were'ma, at Ala okawerek inom lapulogo hisasike atì ebe re, Yesùt e ba menhìlìk wasukwama amep wulagasogo wa'lagaike atì ba lapulogo hisasike atì.

²¹ Alep he, hit hina'la weak wene ebetì logolìk, hinoabùt weak hagatì lagagip atì ba, Ala hinom heksek logolìk weim palek negen welagagip.

²² Atì'nogo meneat he, hit hinebe at Ala okawerek hesik hakìlìk, at eilhanem ùkùm hinoba lek hogo hano tegelek logouagalùk, aput ebe wa'lagaike atì ba, okawerek hinom lapulogo hikasikomo welagep atì.

²³ Halok he, hano wene hinasuk holhigisip he, hina'la nen, “Hobuk hano asigin,” ìlùk, akasigip mene atì, hinetaùken abolok ìlìk kopologo hebìgì'lek ning hogoat hesogo logoino. Hano wene atì, at en o yì awi tì awi apùnì inebe obogat yogoisasike wene atì yogoisìlìk nìkì logouagalùk, an Paùlùt nayoko hesike atì.

Paùlùt en Ala againapùrì hesik hagatì lagaike wene

²⁴ An yogotak ya re, at Karìsùt en he, “Ala againapùrì obogat an nebeat o,” ìlùk nit hesik yì aik tì aik hìlìk hìlìk wa'lagaike atì, aike hìgì'lek mene obùlù'mo, an nebe hit hesik yì aik tì aik haga'nabì'lùgì atì nen na'la hai hakìkì lagì.

²⁵ An he, Ala nen, hit hesik, at againapùrì mene obogat inatitigeke logouagalùk nayoko hesikomo, wene Ala nen isike wene atì obogat yogoisìlìk nìkì logousak meneat, yogoisìlìk nìkì lagì atì.

²⁶ Wene atì, o holoat ero ba nen yì tahun tì tahun haga'laga logolìk, apùnì ta'larìk waga kolek, Ala nen apùnì yogoisìgì'lek ineilmasirogo at a'la hinago welagaike. Meneat he, yogotak nit at againapùrì mene halok, sele'ma hukalogo yogonisasike atì.

²⁷ At Ala a'la nen he, it apùnì etakwe mene obogat hano motok hagarinabigin wene atì esin hogorasusak meneat akasikesik en a'la hinago welagaike mene, at againapùrì halok sele'ma hukalogo yogoisagalùk isike. Wene atì ebe re, Karìsùt hit hina'la werek halok, hobuk hanothinapenem hogothinabugun atìat o.

²⁸ Ati nen, nit en he, wene Karìsùt abok atì hukalogo apùnì obogat inebe lopok yogoisìlìk laga lago. Atì'nogo yogoisìkì lago atì ba, inebe lopok Karìsùt inom hutik logolìk, inetaùken wurik ari'mo, Ala oba wogisek wesuogolùk, nina'la kagalek motok logolìk, inasuk watìk, wene yakùlisìgìk, ìlìk laga lago atì.

²⁹ An wene atì hesik katok hogo hagasigìlùk, at Karìsùt omame a'nogo an na'la logolìk nomame'napo kolek, ning hogo nomamerogoat hagatì lagi atì.