KALATIA 6 - Ala Ane Wene Ket Mene Warogo Wo'ninapike Wene

“Hit-hit lebet-lebet ìkì logoino,” ìlùk yogoisasike wene

¹ Nerùgì nagaiya'lak. At aike weak hagatenem hineileken hegep halok he, at atì apotkwe oabùt hebelasuagalùk, hit Ala Areagùn eberogoat hina'la werek mene nen hinane lìok hogo asuk wa'no o. Asuk atì'nogo watenem, hit atì'nogoat hinoba asinogo ìlùk, hinokawerek hinepe hebelogo logoino.

² Hit-hit hinoba ekin aike werek halok, hinebe lopok aike nen aike lebet-lebet ìkì logoino o. Atì'nogo hagatì logogun atì ba nen, wene Karìsùt en ninasuk warogo yakùlnisasike wene a'nogoat higit hogo hagatì logogun atì.

³ Mene re, hat aike hetage lek logolìgat he, “An kain,” ìlùk, ha'la nen akìkì lagen halok he, hokawerek en lalìkì lagen atì.

^4-5 Hinebe lopok hinokawerek enat, “An hano hagatì lagì a? Weak hagatì lagì a,” ilùk, hinoabùt palìlìk he, “Hano hagatì lagì,” ìlùk, akegep halok he, elok hogorakasagat o. Atì'nogo meneat he, nit hagatì lago mene atì, ninokawerek ninoba lopok enat usak atì nen he, “It aike hagarì'lùgì atì weak. Nen, an hagatì lagì nek he, esin,” ìlùk usak lek o.

⁶ Nen, at aike nen hano wene yakùlhisikenem, hit hinasuk holhì lagep mene nen hinagarok hano mene atì lebethìkì logoino.

⁷ At Ala lal-pal hogo yogosusak nogo? Motok lek o. Mene re, “Atì'nogo yogosusak elogat,” ìlùk akogoin halok, hinokawerek en lalogoin o. Apùnì nen yì mene tì mene awì yatarek mene, eken atì meneat wurik aganem, ebe palharek atì hak,

⁸ at sa nen oabùt esogat logolìk hagarì'logo halok, oabùt atì baat alema'lakegein atì. Mene re, at aike sa nen, Ala Areagùn eperak hutik logolìk, at mene hagarì'logo mene halok, Ala Areagùn atì nenat, eluk motok logouagalùk hanothegein atì.

⁹ Halok he, ninomame lek agì'legat hano mene hagatì logogun halok he, yì mene tì mene yakhìlìk higit asi laganem, ebe palharek hak, hobuk elùgùn oba ebe hano mene helogoin atì nen he, ninaberalì agì'legat hagatì logouok o.

¹⁰ Ma re, nit o yogotak hano mene hagasusak elok welago ya ba re, apùnì aike inebe obogat leberisìkì logolìgat, esin hake re, ninerùgì ninagaiya'lak inetatùken Karìsùt oba hìpìrìk werek mene hùgì hanorogo leberisìkì logouok o.

Wene elùgùn warogo inasuk watìk, hai warinapik, isike wene

¹¹ Yogotak an nokawerek neki nenat helal hùkotek mene waganogo hinoba lakhei wagì atì, hineileken enagat hano!

¹² It apùnì aike nen he, “Hinogat hinekalìma mene palini o,” ìlùk, ning hogo yogohisìlì'lùgì mene atì, it apùnì aike nen ineileken isìlìk, “Hano hagarì'lùgì,” ìlùk akoagalùk hagarì'lùgì atì. Yesùt ebe e ba menhìlìk wasukwa wene a'nogo yogoisikenem he, apùnì Yahuri mene nen weagarinabinogo ìlùk, wene hùnogo mene ning hogo yogohisìlì'lùgì atì.

¹³ It atì wene Ala nen ninasuk wasike wene a'nogo hanorogo hologo welagì'legat he, inokawerek inogat inekalìma mene palìkì logolìk, “Hit atì'nogoat aike palani o,” ìlùk, inokawerek en hogorakìkì logouogolùk ìlì'lùgìì atì.

¹⁴ Mene re, an yì hesik tì hesik hogorakasak motok nabìt o. We, ninoe Etagepogot Yesùt Karìsùt e ba menhìlìk wasukwa mene a'nogo hesik enek hogorakamo, elok. At ebe wasukwa atì nen, apùnì kweangma inoabùt inesogat logolìk hagatarek mene atì arat mabenetsasike akìgì. Halok he, apùnì wa'larìk, yì mene tì mene hagasusak oba lì'ma agarek hak, apùnìl inoabùt inesogat logolìk hagatarek mene a'nogo li'matsasìgì atì.

¹⁵ Ninogat ninekalìma mene palek halok mel, pale'lek halok mel, ebe atì mene esin hùk. At he, Ala nen ninebe ket hùnogoat haga'ninabì'logo atìat esin o.

¹⁶ An wene hinasuk warogo yogohisìgì mene yì, higit hogo hagatì logogun mene hùgì, Ala nen he: “An nagainapùrì Isirael meneat o,” ìlùk, at enat hinetaùken hapuk hogo hikìgik, hinebe etawìthinapìk, ìkì logouak o.

¹⁷ Hobuk he, an Yesùt atitigeke ìlùk, nebenakwe nagapùt enagat werek atì nen he, it aike nen an na'la wiikweak hogo haga'nabusak lek o. Motok nabìt.

¹⁸ Nerùgì nagaiya'lak. Ninoe Etagepogot Yesùt Karìsùt oabùt hano a'nogo nen hinetaùkenma logolìk eberogoat sethisek logouak u hak, “Amin,” ìgì atì.