KALATIA 5 - Ala Ane Wene Ket Mene Warogo Wo'ninapike Wene

“Karìsùt en ninalepma hinasikomo welago atì nen, ning hogo metek logoino,” ìlùk yogoisasike wene

¹ Nit Karìsùt en ninalepma hinasikomo yogotak ninalepma welago. Atì nen he, yì mene tì mene ekin weak mene it apùnì inatitigeke mene nen e pok hogo wolok loagalùk inomolo ba hagarek hak, ekin mene atì hobuk hinoba heinogo ìlùk, ning hogo metek logoino.

² An Paùlùt nokawerek en wene eberogoat yogohisak. Hit hinokawerek en hinogat hinekalìma mene it aike nen palhinabuagalùk inayoko hìkì lagep halok he, at Karìsùt en hanothinabigin lek o. Tùlemat haga'lakogoin atì.

³ Hit aike hinogat hinekalìma mene palhinabuagalùk, it aike inayoko hogoin halok he, hinebe lopok hinasuk hobuk wasik. Atì'nogo palhinapo halok, wene Ala nen ninasuk wasike wene a'nogo heraksìgì'lek obogat higit hogo hagatì logousak o.

⁴ Hit aike nen he, “Wene Ala nen ninasuk wasike wene atì ba hakothìlìk, at en he, ùkùm ninoba mene korogo wokhìlìk, ninom hobuk ninapotkwe hùnogo hinanuak,” ìlùk hagatì lagep halok he, Karìsùt hinom hek egesip he, at Ala oabùt hano nen wo'nisikerek mene a'nogo heraksalùk wùlùpep atì.

⁵ Mene re, nit en, ninetaùken Karìsùt oba hìpìrethesugusik, “Ala Areagùn nen tì'nogo lebe'nisiko kolek, Ala nen ùkùm ninoba mene korogo wokhìlìk, at ninom hobuk ninapotkwe hùnogo hinegein werek,” ìlùk oba eberek welago atì.

⁶ Atì nen he, nit Karìsùt Yesùt ninom hutik logolìk, ninogat ninekalìma mene palek mene lek, it aike pale'lek mene lek, ninom higit welago. Halok, atì hesik penesusak lek. We, esin he, ninetaùken Karìsùt oba hìpìrìk logolìk, apùnì aike ninetawìrinaporek atì ba enagat arì'logo.

⁷ Apùnì sa awewerek sa awewerek lagaikarek hak, hit hageat he, ebe wene atì hesik hinoabùt akiluk hogo hagatì lagagip meneat he, hobuk sa nen hina'la kagalhì lagama ebe wene atì hologo higit hogo hagatì'lek, hina'la pùk welagep nogo.

⁸ Atì re, ninoe Etagepogot hinayoko hesike mene a'nogo nen, “Ina'la tì'nogo kagalino,” ìlùk ikomo nen hina'la kagalì'lùgì hùk. Lek o.

⁹ Horoti hisuagalùk eken hìterek mene hamùlùgat a'la pelapenem obogat hìrìk wùlùperek hak, wene kolo mene atì nen hinebe obogat weagathinabìk lanogo ìlùk ìgì.

¹⁰ Atì'nogo meneat he, ninoe Etagepogot ninom omakeat agosik hutik welago atì nen, an na'la nen he, “It inoabùt he, wene hùnogo mene aike oba ebesugun legat,” ìlùk, hùthikìkì lagìat o. Sa nen hit weagathinabigìlùk hina'la kagalì'logo mene atì, Ala nen ùkùm oba hegein werek o.

¹¹ Nerùgì nagaiya'lak. An nen, inogat inekalìma mene palharek wene atì hano ìlùk yakùlisìkì logoilema re, noba yì aik tì aik haga'nabì'lùgì atì haga'napì logoilep akegep? Motok lek o. An wene atì wene yakùlisìkì logoilema re, wene Karìsùt ebe e ba menhìlìk wasukwa wene atì yakùlisikenem apùnì inasuk holìk he, inesok helep oba temuk hogo waragarek hak, ina'la pùk arìk wene herakselep legat o.

¹² Hit weagathinabuogolùk hinogat hinekalìma mene palhinabuogolùk hina'la ning hogo kagalì'lùgì mene palhinabuogolùk hina'la ning hogo kagalì'lùgì mene atì, hit Ala againapùrì hina'la nen tek hogo motok wo'laka wùlùbùak o!

^13-14 Nerùgì nagaiya'lak. Hit hinalepma logouagalùk Ala nen hinayoko hesikomo welagep. Atì'nogo meneat he, hina'la nen he, “An nalepma welagì,” ìlùk, apùnì inoabùt inesogat logolìk hagatarek mene inoabùt waganogo yùgùnat hagatì logogùp. At he, wene Ala nen ninasuk wasike wene a'nogo obogat lapuk hogo wene omakeat yì nek esin hake isike atì: “Hit hinokawerek hinebe hinetaùken hutik welagasep atì hak, it apùnì aike hinom welagasep mene hinetaùken hutik logoino o,” ìlùk isikomo helal waganogo hesukwa atì nen he, apùnì aike inebe hinetawìrogo logolìk hit-hit lebet-lebet ìkì logoino o.

¹⁵ Atì'nogo meneat he, wam okawerek en wam aike aik en lìbìlhìk, warogo haum hogo nìkìk, ikerek hak, hit-hit hinokawerek en atì'nogo hagatì logogun halok he, hinebe alema'larìk lanogo ìlùk hinepe hebelogo logoino o.

Apùnì inoabùt inesok logolìk hagatarek mene ho, Ala Areagùn a'la walok akikerek mene ho, eperak weim palek hagatarek wene

^16-17 An na'la yì'nogo akìgìrìk en igin. Ninoabùt ninesogat logolìk hagatorek mene atì nen, Ala Areagùn a'la walok akikerek mene atì warogo wulabigìlùk hagatìk, nen, at Ala Areagùn nen, nit ninoabùt atì mene warogo wulabigìlùk hagatìk, ìkì logolìk, eperak weim pelek motok hagatarek. Eperak atì'nogo hagataresik, hit en, “Tì'nogo haga'lo e,” ìlùk, ninhùp-nanhùp, akegesep meneat he, ebe hagatesep lek atì. Atì nen he, Ala Areagùn hinom hutik logolìk hano hagatì logoino o. Atì'nogo hagatì logogun halok, hinoabùt hinesogat logolìk, yì walok tì walok en hagatesep mene atì, hobuk atì'nogo hagatì logogun lek o.

¹⁸ Ala Areagùn nen, “Tì'nogo haga'no,” ìlùk, yakùlhisikenem hagatì logogun halok, wene Ala nen ninasuk wasike wene a'nogo ba hobuk ùkùm hinoba hegein lek o.

¹⁹ Apùnì kweangma yoma inoabùt inesogat logolìk hagatarek mene ebe enagat yì. Pailak hakìigìk, ina'meilo mene hagatìk, agasabu kalek hagatìk,

²⁰ tùgì hareken oba hìpìrìk logolìk hagatìk, apùnì aike inebe weak asuagalùk wesarogo hagatìk, apùnì aike inom weim palek hagatìk, serep agìk, ua palhìk, ina'mage hakoksek welagìk, inokawerek hesik enek esin hogo hagarìgìk, apùnì inebe omakeat mene inom hùlì-hùlì hagatìk, hek-hek hagatìk,

²¹ ina'la nen, it aike inagarok mene, “Namolo e,” akìgìk, i negen nìlìk lùgùlùgì palhìk, pesta nìlìk weak hagatìk, egarek atì inom, aike atì'nogo hagatarek mene obogat inom, hesik ìgì atì. It apùnì aike atì'nogo hagarì'lùgì mene hùgì, Ala awe a'ma hisikere'ma atoma esewerek asugun motok lek o, ìlùk, wene atì hesik alep yogohisasigi hak, hobuk hinasuk warogo yogohisìgìat atì.

²² Nen, e eken ìterek hak, Ala Areagùn apùnì ina'la logolìk inoabùt hagatarek he, ebe yì. Apùnì aike inebe inetaùken butik welagìk, ina'la hai hakìgìk, apùnì aike inom lìoksek welagìk, inepe morogo welagìk, inoabùt enago welagìk, inoabùt hano welagìk, inoabùt lopok hogo welagìk,

²³ inetaùken sebeksek welagìk, inokawerek en inasuk warek welagìk, egarek atìat o. Inoabùt atì'nogo hagatenem, ùkùm aike inoba hagarek nogo? Motok lek o.

²⁴ Ninebe Karìsùt Yesùt agoromì mene hùgì, ninoabùt ninesogat logolìk, yì walok tì walok akìkì lagagu mene atì, Karìsùt Yesùt ebe e ba menhìlìk wasukwa atì ba warogo hesugu.

²⁵ Ma re, yogotak Ala Areagùn nenat ninoabùt ket mene hagarogo hinikomo nineluk logolìk, at en yogonisikerek mene nek higit hogo hagatì logousak o.

²⁶ Atì'nogo hagatì logolìk, ninokawerek en hogorakìgì'legat, nit-nit aike nen aike ina'la weak asuagalùk hagatì'legat, nit-nit ua palogo aike nen aike ninabìt hisìgì'legat, hagatì logouok o.