KALATIA 4 - Ala Ane Wene Ket Mene Warogo Wo'ninapike Wene

“Hinebe Ala againapùrì esewerek meneat welagep o,” ìlùk yogoisasike wene

¹ Nerùgì nagaiya'lak. Wene aike yì yogohisak. Inopaselak wa'laganem inamìnìngeke yì mene tì mene obogat he, inagainapùrì esewerek meneat he, yekerùgì inebe oan inalùge agì'lek halok he, ap aike nen ìkì logolìk he, “Yekerùgì inebe inalùge aganem hobuk wogisogoin,” ìlùk he, inatitigeke mene salek it inatitigeke welagaikarek hak welagaikarek atì.

² Ati'nogo were'ma, inopaselak inebe ineluk logolìk he, “Atì hùlì asi laga halok, wogo'no,” ìlùk nìnùngane egarek oba higit asi lagì'lek werek kolek he, inamìnìng amanogo it aike nen hagisek logolìk, inebe inom hagisek welagaikarek atì.

³ Ati hak he, nit ninetaùken akut were'ma, mokareke oabut weak mene kweangma yoma eki ba welagarek mene nen awe a'ma hinìlìk welagaike atì.

⁴ Were'ma re, at Ala nen aput ayoko hìlìk kweangma lakhei wesusak arat higit asi wagaikomo re, lakhei wagaikomo, he kweangma mene nenat tasike. Atì'nogo tasikomo, wene Ala nen ninasuk wasike wene a'nogo awe a'ma logolìk asuk hologo hagatì lagaike.

⁵ Atì'nogo lakhei wagaike atì re, nit Ala againapùrì haga'lasuagalùk, wene ninasuk wasike wene a'nogo nen awe a'ma ha'nisek were'ma, hele hikalninabi wesuagalùk lakhei wagaike atì.

⁶ Atì'nogo hele hikalogo hinasikomo, ninebe Ala againapùrì welago atì nen he, at aput Areagùn ninetaùkenma hina wagaikomo logolìk, at Ala hesik he, nit en, “Nopase, nopase e,” ìkì logouagalùk ikerek atì.

⁷ Ma re, it aike inatitigeke welagagip atì hak, welagep hùk. At Ala againapùrìat agagisip welagep o. Atì'nogo agagisip welagep atì nen, Ala nen he, “Hit an nebe nagainapùrì agep atì nen he, an nagainapùrì wogisagalùk hisìgì mene hit esewerek asugun o,” ìlùk ikerek atì.

“Hit hesik nayùk arì'logo,” ìlùk yogoisasike wene

⁸ Hit alebat he, Ala ebe hinokot welagagip atì nen, hùnogoat mene ebe Ala hake le'maat he, awe a'ma welagagip atì.

⁹ Mene re, an nen he, “At Ala hinebe elu welagarek,” ìlùk uem, “Hit yogotak en Ala ebe hinelu agep,” ìlùk ìgì atì. Halok he, hit hinokawerek en mokareke oabùt weak omame lek mene, eilmo lek mene, atì oba hobuk hinapotkwe awe a'ma kuogolùk ìkì lagep atì, nenahalok.

¹⁰ Hit en ìkì logolìk he, “Nineki tì ba tì'nogo hagasuok. Tugi tì ba tì'nogo hagasuok. Mo tì ba lagaike halok, tì ba pike halok, tì'nogo hagasuok. Tahun tì ba tì'nogo hagasuok,” ìlùk, atì mene esinethìlìk ìkì lagep atì.

¹¹ An hit hesik ning hogo mep lagai'-lagak hogo hagarìk nìkì lagì a'nogo we tùlemat asigin he a, ìlùk, nayùk arì'logo nen ìgì.

¹² Nerùgì nagaiya'lak. An nebe alep he, hit hakeat haga'lagagisik welagìrek yì hak, hit hogo re, an hakeat arìk noabùt wanino. Alep he, hit en aike weaga'napì'legat.

¹³ Emakum an noba ou wanhìgi atì nen hano wene yakùlhisasigi a'nogo hineluat o.

¹⁴ Yakùlhisikenem an noba ou hìkì lagagi atì ba hinabìt neasak higit meneat he, hinabìt nììgì'lek, hina'meilo niìgì'lek, malaikat Ala nen lakhei wesu mene wanu hak he a? At he, Karìsùt Yesùt ebe wanu hak he a, wo'napigip atì.

¹⁵ Hit alebat hinoabùt akiluk hogo hagatì lagagip a'nogo, yogotak hinoabùt nìkì'nogo haga'lagasip welagep. Ineileken hemelogo wogisagarek logoilepma re, hit hinoabùt he, hineileken hemelogo wo'ne'lebat ìlùk, hinabok pak hogoat usak welagì.

¹⁶ Yogotak wene eberogoat yogohisìgì atì nen, ninom weim palek mene negen neegep he a.

¹⁷ It apùnì aike aroma hinebe wokhinabuogolùk hina'la ning hogo kagalì'lùgì atì, inetaùken higit logolìk hagarì'lùgì hùk. An ninom hano welagorek mene herakhanìlùk lisogo wokhisek wùlìbìk, it werekweat ning hogo hagatì logouagalùk hina'la kagalì'lùgì atì.

¹⁸ Atì'nogo hagarì'lùgì atì re, an nebe ninom were'ma, le'ma, hit hano hagatì logouagalùk hina'la ning hogo kagalhì logoumo, hano nek.

¹⁹ Mene re, nagainapùrì hinebe netawìlak e. Hìmì nen omalik taginabuogolùk inapot heinet watarek hak, an nen hobuk takhinabumo, hit hinoabùt Karìsùt oabùt hake haga'la'lep e! ìlùk, hit hesik an noba ou heinet weak watì lagì.

²⁰ An hit hesik nìkì'nogo hagasu he, noake palarì'logo atì nen, an na'la nen he, yogotak ya hinoba wìrìk ninom logolìk wene hùnogoat negen aike yogohisele e, ìlùk, na'la akìgìrek atì.

He Hagat ho, Sara ho, inoba lìrogo yogoisasike wene

²¹ Hit en he, “Wene Ala nen ninasuk wasike wene a'nogo awe a'ma kìlìk hologo hagatì logogun,” ìlùk ìkì lagep mene yì, an nen wene Ala nen ninasuk wasike wene a'nogo ba helal waganek werek mene yogohisegein yì, hinasuk hanorogo holini o.

²² Wene helal waganogo hesukwa atì ba mel waganek werek. At Aberaham en againapùrì pìre taginapike atì. Aike re, he atitigeke mene wanhìkesik tasike. Nen, aike re, agwe ebe mene nen tasike.

²³ Mene re, he atitigeke mene nen tasike mene atì re, apùnì nen taginaparek hak tasike atì. Nen, agwe ebe mene nen tasike atì re, Ala nen abok yogosike a'nogo higit hogoat tasike atì.

²⁴ Ala nen nit apùnì ninom wene alep aike wasikesik en, hobuk aike wasike atì, hìmì inebe pìre, Hagat ho, Sara ho, atem inoba lìrogo yogohisak. Ala nen tom Sinai atoma nen wene wasike atì ebe re, he Hagat eagwi inatitigeke mene taginapike ìlùk, oba lìrogo ìgì atì.

²⁵ He Hagat atì, tom Sinai apùnì Arap mene inaua welagarek mene atì hesik ìgì atì. At Hagat ebe inom, eagwi inom, inatitigeke welagaukwa atì hak, yogotak apùnì o Yerusalem mene atì'nogoat welagaikarek atì.

²⁶ Mene re, he okawerek agwe ebe mene hake, o Yerusalem pogot oba mene atì, nit ninagosaat o.

²⁷ Atì hesik he, Ala ane ba wene mel ìlùk helal waganek werek: “He agùn werek mene nen eagwì inebe hamùlùgat taginapo kolegat he, aike agùn nen lologo heraksike mene nen, eagwì apigat taginaperek atì nen he, hat hebe abìlì heak takìgì'legat welagen mene atì, ha'la hai hakano. Omalik takagalùk hapot heinet watì'lek welagen mene atì, ha'la hai hakìlìk hane akiluk hogo ino,” ìlùk isikomo helal waganogo hesukwa atì.

²⁸ Nerùgì nagaiya'lak. Hit he, Ala nen Aberaham abok yogosike mene, ebe at Isak tasike hak, hit takhinapikomo welagep o.

²⁹ Mene re, at Aberaham aput aike apùnì nen taginaparek hak tasike mene atì nen he, aput aike Ala Areagùn oba tasike mene atì oba yì aik tì aik hìkì lagaike hak, nit yogotak atì'nogoat haga'ninabì'lùgì atì.

³⁰ Mene re, Ala ane helal waganek atì ba wene nena isike nogo. Mel isike akìgì: “He hagwe ebe mene eak atì nen hat hamìnìngeke ese asigin hak, at he hatitigeke mene eak atì nen, hamìnìngeke ese asigin lek o. Halok he, he hatìtigeke mene atì eak eperagat mùk hogo wulaksano!” ìlùk yogosikomo helal waganogo hesukwa.

³¹ Mene re, nerùgì nagaiya'lak. Nit he, he atitigeke mene atì eagwì welago hùk. Lek o. We, agwe ebe mene atì eagwi welago o.