KALATIA 3 - Ala Ane Wene Ket Mene Warogo Wo'ninapike Wene

Ninetaùken Ala oba hìpìrethikenem he, ùkù, ninoba mene korogo wokhìlìk hobuk at nìnom hùnogo hiaikerek wene

¹ Hit apùnì o Kalatìa mene hinetaùken lek hagati lagep atì rì! Yesùt Karìsùt ebe e ba menhìlìk wasukwa wene a'nogo hineilhanemat sekek hogo yakùlhisasugu meneat he, wene hobuk sa nen hina'la kagalhomo atì'nogo hagatì lagep.

² Wene Ala nen ninasuk wasike wene a'nogo higit hogo hagatì lagagip atì ba Ala Areagùn wokhisasike a? At he, nit en hano wene yakùlhisasugumo holhigisip he, “Eberogoat,” ìlùk hinetaùken Karìsùt oba hìpìrethesigip atì ba wokhisasike a. Wene omakeat atìat yogone'ni ta.

³ Yabu emakum hakagarek hak, Ala Areagùn oba hakasigisip meneat he, yogotak ya hinetaùken motok lek arìk hinokawerek hinomame ba katok hogo haga'lasi logoin nogo? Mea o.

⁴ Ala nen obogat atì'nogo hagathinapenem hasigip mene atì, we tùlemat alema'lasusak nogo? Mea o.

⁵ Halok he, nìkì'nogo ugun. Hit en wene Ala nen ninasuk wasike wene a'nogo higit hogo hagatì lagagip oba, at Areagùn hùkorogo wokhisìgìk, hagasusak lek mene elalinat hagathinapìk, ìlì'logo nogo a? At he, nit en hano wene yakùlhisasugumo holhigisip, eberogoat ìlùk, hinetaùken Karisùt oba hìpìrethesigip atì ba wokhisìlì'logo nogo a.

⁶ Wene atì hake, at Aberaham etaùken Ala oba hìpìrethesikomo re, at Ala nen he, “Hat hoabùt higit hogo hagatì logou hak, hetaùken noba hìpìrethegenma, ùkùm hoba mene korogo wokhìgìrik hapotkwe neperak hùnogo hagagì atìat o,” ìlùk yogosike.

⁷ Atì nenat, hit hina'la nen he, Aberaham againapùrì ebe mene re, it apùnì inetaùken Ala oba hìpìrethìlìk welagaikarek mene atìat o, ìlùk, hùthasak.

⁸ Hageat wene ebe atì'nogo oan haga'lagì'lek werek kolegat, it apùnì etakwe mene inetaùken Ala oba hìpìrethìkenem, at an he, “Ùkùm hinoba mene korogo wokhìlìk ninom hobuk hinapotkwe hùnogo hikegein o,” ìlùk, wene hano wene oan yogoisìgì'lek logolìk, Aberaham tak wene abok mel ìlùk yogosike: “Yì apùnì tì apùnì obogat an nen hanorinabigin atì, ero harat o,” ìlùk isikomo, helal waganogo hesukwa.

⁹ Aberaham etaùken Ala oba hìpìrethesikomo, at en hanothesike hak, it apùnì aike inetaùken Ala oba hìpìrethagarek mene hùgì inom higit hogoat hanorinaperegat o.

¹⁰ Nen, Ala nen mel isikomo helal waganogo hesukwa: “Wene an nen inasuk wasigimo helal waganek werek atì obogat apùnì inasuk holìk he, higit hogo hagatarek lek halok, inebe lopok homan hisegein werek o,” ìlùk isikomo, helal waganogo hesukwa hak, it apùnì aike nen wene Ala nen ninasuk wasike wene a'nogo higit hogo hagasuogolùk, inetaùken atì ba hìpìrethìlìk welagaikerek mene hùgì, Ala nen homan hisegein weregat o.

¹¹ Ala nen he, “Hinetaùken an noba hìpìrìk logogun atì ba, an nen ùkùm hinoba mene korogo wokhìlìk ninom hobuk hinapotkwe hùnogo hikegein mene hùgì hineluk motok logogun o,” ìlùk, isikomo helal waganogo hesukwa atì nen, wene Ala nen ninasuk wasike wene atì ba nit obogat ùkùm ninoba mene korogo wokhìlìk hobuk ninom hùnogo hinasak legat o, ìlùk, enagat agaike.

¹² Apùnì nen, wene Ala nen ninasuk wasike wene a'nogo hesogo welagaikarek atì, ero hesik he, helal mel waganek werek: “Wene atì hologo logolìk, higit hogo hagatì logogun mene hùgì hinebe lopok, wene atì ba hineluk motok logogun o,” ìlùk isikomo, helal waganogo hesukwa atì. Ma re, inetaùken Ala oba hìpìrethagarek atì, hanogoat o.

¹³ Ala ane ba helal waganogo hìkì logolìk he, mel isukwa: “Inebe e ba menhisìlìk inoasumo, it inebe wa'lasugun mene atì, Ala nen homan hisegein werek o,” ìlùk, helal waganogo hesukwa hagat, wene Ala nen ninasuk wasike wene atì ba re, homan hinasak higit were'ma, at Karìsùt en ninoko palogo telninabìgìlùk ùkùm nit ninoba mene korogo at oba hakasike atì.

¹⁴ At Ala nen he, Aberaham hanothesike hak, yì apùnì tì apùnì obogat Karìsùt Yesùt inom hùnetenem hanorinabuagalùk, Yesùt wa'lagaike atì. At atì'nogo wa'lagaikesik oba nen, Ala Areagùn wokhisegein ìlùk abok tak yogonisasike a'nogo, ninetaùken at oba hìpìrethikenem wo'nisikerek atì.

Ala nen Aberaham tak abok yogorik ninasuk wasike wene

¹⁵ Nerùgì nagaiya'lak. Nit apùnì hagatorek mene aike oba lìrogo yogohisak. Apùnì inebe pìre nen, “Tì'nogo hagasuok,” ìlùk hopuk palogo iko halok, it aike nen munenhìk, wene hùnogoat mene aike oba labelhìk, egarek motok lek o.

¹⁶ Wene atì hak he, at Ala nen Aberaham yogotì logolìk he, “Hat tì'nogo wokhetìk, nen, hat en tagokwe mene aike tì'nogo wogotik, ìgìn o,” ìlùk, abok yogosike atì. Inebe apigat hesik u hak he, “Hat en tagokwe mene aike tì'nogo wogisegein,” ìlùk, ìgì'lek. We, ap ebe omakeat mene hesik, “Hat en tagokwe mene aike tì'nogo wogosigin,” ìlùk, abok yogosike atì ebe re, Karìsùt mene hesik isike.

¹⁷ Wene atì mel hesik ìgì. Ala nen he, “Tì'nogo wokhesigin,” ìlùk, abok tek hogo isikesik, 430 tahun welagaikesik en, wene ninasuk hobuk en wasike atì ba, wene alep mene atì munenogo legethìgì'lek.

¹⁸ “Tì'nogo wokhesigin,” ìlùk, Aberaham abok tak yogosike mene atì, at en wene Ala nen ninasuk wasike wene a'nogo higit hogo hagatì lagaike ba wogo'lepma re, abok yogosike a'nogo, we oko legat wogosike ìlùk ilep hùk. Mene re, Ala oabùt hano nen Aberaham abok yogosike atì nenat, ebe we oko legat wogosike atì.

¹⁹ Halok he, wene Ala nen ninasuk wasike atì nenahalok. Atì re, nit apùnì weagat hagato welagagu mene atì hukalasuagalùk, ninasuk hobuk wasike atì. Mene re, wene atì Aberaham en tagokwe mene aike wogosigin ìlùk, abok yogosike a'nogo, ebe oan ta'lagì'lek werek kolek elama hesik wene ninasuk wasike wene a'nogo, malaikat en Musa yogotenem at ebe hùlìsanem logolìk, apùnì yakùlisoagalùk he, malaikat inayoko hìlìk laksa wagaike atì.

²⁰ Apùnì pìre mìkìlogo hùlì warek were'ma re, ap aike hùlìsanem logousagat o. Atì'nogo meneat he, at Ala okawerek en wene abok yogonisikerek atì nen he, at en wene oko lek o'moko negat yogonisikerek atì.

“Nenahalok wene Ala nen ninasuk wasike,” ìlùk yogoisasike wene

²¹ Halok he, wene Ala nen Aberaham, “Wokhesigin,” ìlùk, abok yogosikesik en, hobuk ninasuk wasike atì re, apùnì aike inom lìmamìt palharek hak haga'lasigin usak nogo? Motok lek o. Wene ninasuk wasike wene a'nogo ba ninelugu'ninabigìlùk wo'niselepma re, wene atì baat ùkùm ninoba mene korogo wokhìlìk, Ala ninom hobuk ninapotkwe hùnogo hinanilep atì.

²² Ala ane ba helal waganogo hìkì logolìk he, “Apùnì hinebe obogat weak hagatì lagep mene atì ba, hineki hele homago hake welagep,” ìlùk, yogonisasike atì, nit ninetaùken Yesùt Karìsùt oba hìpìrethoumo, Ala nen abok isike mene a'nogo re, nit ninetaùken at oba hìpìrethogoin mene hùgì wo'nisagalùk isike atì.

²³ Ninetaùken Karìsùt oba hìpìrethousak higit asi lagì'lek werek kolek, hobuk wene atì weinamethegein atì higit hogo ninetaùken at oba hìpìrethouagalùk, apùnì hele warogo hagisek welagaikarek hak, wene ninasuk wasike wene a'nogo nen hele warogo ha'nisek welagaike.

²⁴ Nit ninetaùken Yesùt oba hìpìrethikenem, ùkùm ninoba mene korogo wokhìlìk, Ala ninom hobuk ninapotkwe hùnogo hinagalùk he, Karisùt oan ta'lagì'lek werek kolek, wane ninasuk wasike wene a'nogo nen ha'nisek logouagalùk isike atì.

²⁵ Ma re, yogotak ninetaùken Yesùt oba hìpìrethousak arat higit asi wagaikesi'mo nogo nen he, wene ninasuk wasike wene atì nen hobuk ha'nisek were'lek.

²⁶ Hit hinetaùken Karìsùt Yesùt oba hìpìrìk welagep atì nen hinebe obogat he, Ala againapùrì welagep atì.

²⁷ Nen, Karìsùt hinom hùnesuogolùk ima pisigip mene hinebe obogat, su labetarek hak Karìsùt oabùt wanhìgip atì.

²⁸ Wìlìk, hobuk en he, hit obogat he, Karìsùt Yesùt hinom hutik logolìk hinebe omakeat mene welagep atì nen he, hit o'moko Yahuri mene, o'moko Yunani mene ìgìk, o'moko inatitigeke mene, o'moko inalepma mene ìgìk, o'moko hìmì, o'moko ap ìgìk, ìkì logousak lek.

²⁹ Hit hinebe Karìsùt mene halok he, hinebe Aberaham en tagokwe mene welagep. Halok, Ala nen Aberaham abok yogosike mene a'nogo, hit wokhisasak higirat o.