KALATIA 2 - Ala Ane Wene Ket Mene Warogo Wo'ninapike Wene

Peterùt lak en he, “Paùlùt Karìsùt en ayoko hìlìk lakhei wagaikomo,” ìlùk yogosukwa wene

¹ Atì'nogo isukwama, neki 14 tahun welagagisik en hobuk Parenapat neperak en at Titut ebe wolok he, o Yerusalem lagagu.

² Atì'nogo lagagu atì re, Ala nen, “Hat o Yerusalem at lagousagat o,” ìlùk na'la yogonesike atì nen lagagisik he, hano wene atì it apùnì etakwe mene yogoisìlìk nìgìrek atì. “Wene ebe tì'nogo,” ìlùk sekek hogo yogoisagalùk he, an hageat en, yogotak ya nen, ning hogo hagatì lagì mene atì, we tùlemat haga'lasinogo ìlùk he, it inogogì mene inebe inalepma hisìlìk yogoisasìgì.

³ At Titut atì re, ebe Yunani mene ninom lagagu meneat he, it inogogì kaintek amanogo nen, “Hogat hekalìma mene palusak,” ìlùk ning hogo yogotì'lek.

⁴ Atì'nogo meneat he, it aike meneat he, ninagaiya'lak Ala againapùrì mene negen haga'larìk hinagasogo ki wìrìk he, ogat ekalìma mene paluagalùk isukwaat. Atì'nogo hinagasogo ki wìrìk he, nit Karìsùt ninom omakeat arìk ninalepma logolìk ninoabùt hagatorek mene atì, it en he, “Ero nìkì'nogo nen haga'lagaikasik hagarì'lùgì,” ìlùk ero herasuogolùk ki wagaukwa atì. Atì'nogo herakìlìk inawe a'ma hinìlìk, it hagatarek mene atì hagatì logouagalùk ineileken nisa ki wagaukwa atì.

⁵ Mene re, wene hano wene atì hit hesik hanorogo elele palogo hakhisek logouogolùk, it en atì'nogo ikenem, nit en it inane hologo nineki omakeat oba aike, “Ì o,” ìlùk, ìgì'legat.

⁶ It aike ina'la nen he, “Inetagewerek he, it atem,” egarek mene atì nen wene an yogoisìlìk nìgìrek mene a'nogo hobuk hùnogoat yogoisìlìk nìkì logouak en ìlùk yogonetì'legat. Ala nen apùnì inogat etakwe nek eileken isìlìk he, “Yì weak. Yì hano,” ìlùk ikerek lek atì nen, an it atì hesik alebat inetagewerek welagaika mene he a? Lek mene he a, ìlùk, wenesùgì ebetì lagagi lek atì.

^7-8 At Ala nen, at Peterùt apùnì Yahuri inogat inekalìma mene palek mene inoba elok loagalùk ayoko hìlìk lakhìgìk, nen an he, apùnì etakwe mene inoba elok loagalùk nayoko hìlìk lakhanhìk, isike atì nen he, it ap inetagewerek atì ina'la nen he, “Ala nen, at Peterùt en hano wene nit apùnì ninogat ninekalìma mene palek mene yakùlisoagalùk ayoko hesike hak, at Paùlùt en hano wene it apùnì inogat inekalìma mene atì'nogo pale'lek mene yakùlisoagalùk ayoko hesikomo hogo,” ìlùk enagat hùthinasukwa atì.

⁹ Atì'nogo hùthinasukwasik he, it Yakobùt mel, Peterùt mel, Yohanet mel, Ala againapùrì nen he, “Nit ninogogì it werek,” ìlùk egarek mene nen he, “Hit en he, wene apùnì etakwe mene yogoisìlìk lano. Nen, nit en he, apùnì inogat inekalìma mene palek mene hesik yogoisìlìk logoin. Ninom hutigat hagatì logouok,” ìlùk he, Parenapat neperak nineki hak-hak hai wa'ninapukwa.

¹⁰ Hai wa'ninapukwasik he, ninasuk warogo negen wene mel enek yogonisasukwa: “Apùnì nit mene aike inelageik mene yoma inoba eberek logolìk, leberisìkì logoino,” ìlùk, yogonisasukwa atì, an nen atì'nogo na'la hai hakìkì logolìk hagatìrek meneat yogonisasukwa.

At Paùlùt en Peterùt hagatì lagaike mene hesik pak hogo wenagasike wene

¹¹ Mene re, at Peterùt o Atiokia wagaikesik kolo hagatì lagaikomo, an nen he, “Hat hagatì lagen atì weak o,” ìlùk, pak hogoat wenagasìgì.

¹² Atì re, mel hagatì lagaike ba wenagasìgì. Alebat, at Yakobùt en agoromì laksa wagaike mene oan wagì'lek werek kolek, at Peterùt a'nogo it apùnì etakwe mene inom sùpùrùk lapuk hogo nìkì lagaukwa. Mene re, it wagaukwasik oba nen, at Peterùt a'la nen he, “Nit ninogat ninekalìma mene palek mene aike nen nena yogonesugun,” ìlùk, ayùk en, it inom sùpùrùk nìkì'lek kamo ìlìk hek hogo wùlìpike atì.

¹³ At ane pìre logolìk hek hogo wùlìpike hak, it apùnì Yahuri mene he'nakìt inebe obogat inom wùlìpì logolìk he, at Parenapat a'nogo a'la kagalogo hobuk it inane pìre mene atì lapo ìlùk wùlìpikeat.

¹⁴ Atì'nogo wùlùpukwama re, an na'la nen, “Wene eberogoat, hano wene yì meneat he, it inoabùt he, hano wene yakùlisìkì logolìk hagasusak mene hagarì'lùgì lek hìgì,” ìlùk, apùnì obogat ineilhanem Peterùt wene mel ìlùk yogosigi: “Hat hebe Yahuri meneat he, apùnì Yahuri mene hagatarek hak hagatì'lek, apùnì etakwe mene nen hagatarek hak hagatì logolìgat, it etakwe mene yogoisìkì logolìk he, Hit hinoabùt apùnì Yahuri mene hagatarek hak, inoabùt waganogo hagatì logoino, ìlùk ning hogo yakùlisìkì lagen atì nenahalok,” ìlùk, pak hogo wenagasigi.

“Apùnì Yahuri mene lek, etakwe mene lek, inetaùken Karìsùt oba hìpìrethikenem he, telinabusak enek o,” ìlùk yogoisasike wene

¹⁵ Nit ninebe Yahuri meneat ta'lagagu. It etakwe weak hagatarek mene atì hake ta'lagagu hùk.

¹⁶ Mene re, apùnì wene Ala nen ninasuk wasike wene a'nogo higit hogo hagatenem he, Ala nen ùkùm inoba mene korogo wokhìlìk inom hobuk inapotkwe hùnogo hisikerek lek. We, inetaùken Yesùt Karìsùt oba hìpìrethikenem enek, hùnogo hisikerek ìlùk hineluat o. Wene atì hesik, Ala ane ba helal mel waganek werek: “Apùnì aike nen higit hogo hagatenem, ùkùm inoba mene korogo wokhìlìk, inom hobuk inapotkwe hùnogo hisikerek lek,” ìlùk helal waganogo hesukwa atì nen, nit en wene Ala nen ninasuk wasike wene a'nogo higit hogo hagatenem hùk. We, ninetaùken Karìsùt oba hììrethikenem ùkùm ninoba mene korogo wokhìlìk, at ninom ninapotkwe hùnogo hinoagalùk, ninetaùken Karisùt Yesùt oba hìpìrethesugu atì.

¹⁷ Nit Karìsùt ninom hùnetenem, Ala nen ùkùm ninoba mene korogo wokhìlìk, ninom hobuk ninapotkwe hùnogo hinoagalùk, ninomamerogo walhìkì logolìgat he, ninoabùt apùnì etakwe inoabùt hagatarek hak ninom higirat welago, ìlùk enagat arì'logo atì nen, nit weak hagatorek mene atì, ero at Karìsùt ìlùk usak nogo? Motok lek o.

¹⁸ O mesalhìlìk hobuk wùtarek hak, an nen nit apùnì Yahuri hagatorek mene arat hebisasigi mene hobuk hagatì logoilema re, Ala ane heraksìlìk sagalogo hagatìrek mene ìlùk enagat a'lep.

¹⁹ Mene re, wene Ala nen ninasuk wasike wene atì nen nebe warek mene hake haga'napikomo re, an nebe neluk logolìk Ala hesik hagatì logoigìlùk, wene atì hesik warek negen welagì. Atì re, Karìsùt ebe e ba menhìlìk wasukwa atì neperagat ninoasukwa atì.

²⁰ Nen, yogotak nebe neluk welagì yì re, nokawerek nomame ba welagì hùk. We, at Karìsùt at na'la logolìk eluk welagarek o. At ebe Ala apurat logolìk, nebe etawì nen an hesigat, “Noasuak,” ìlùk akasike ba ebe wasukwa atì. Nen, an netaùken at oba hìpìrìk were'ma re, at ebe na'la were'ma, neluk welagìrek atì.

²¹ Ala oabùt hano nen hano'ninaperek wene atì an nen sagalogo heraksìgìrek lek. Wene Ala nen ninasuk wasike wene a'nogo ba, ùkùm ninoba mene korogo wokhìlìk ninom ninapotkwe hùnogo hinanilepma re, Karisùt wa'lagaike atì we tùlemat alemarogo wa'la'lep o.