KALATIA 1 - Ala Ane Wene Ket Mene Warogo Wo'ninapike Wene

Hai warinapike wene

^1-2 Hit Ala againapùrì o Kalatìa atogotì lagep mene nerùgì nagaiya'lak. An Paùlùt nerùgì nagaiya'lak Ala againapùrì he'na o yoma ninom welago mene inebe obogat ninom en wene yì helal palogo hinoba lakhei wago atì. An nayoko hìlìk lakhani wagaikomo wagagi atì re, ero apùnì nen hùk. Ap aike wene oba warogo hìlìk lakhani wagaike hùgat o. We, at Yesùt Karìsùt ebe wa'lagaikomo opase Ala nen eluguthesike mene a'nogo eperak enat nayoko hìlìk lakhani wagaukwama wagagi atì.

³ Ninopase Ala mel, ninoe Etagepogot Yesùt Karìsùt mel, eperak inoabùt hano a'nogo nen hano mene wokhisìgìk, hinetaùken hapuk hogo hakhisek welagìk, ìkì logouak o.

⁴ Nit weak hagatorek atì nen ninopase Ala a'la nen he, “Tì'nogo hagasuak,” ìlùk a'la akasike ba, at Yesùt Karìsùt en nit apùnì kweangma mene telninabigìlùk, etaùken nenat nit ninoabùt weak motok hagatorek mene atì ùkùm at okawerek en oba hakìlìk wa'lagaike atì.

⁵ Ati hen he, at Ala at hogorato motok logouok. Atì'nogo ìgì atì, “Ebe asuak,” u hak, “Amin,” ìgì atì.

“Hano wene pìre lek. Omakeat o,” ìlùk, yogoisasike wene

⁶ At Ala nen he, hit Karìsùt oabùt hano mene a'nogo hinom hutik logouageip ìlùk hinayoko hesike meneat he, heraksalùk hepogat kwanìrogo hano wene salek hùnogoat mene oba ebesi laga lagep atì, an nayùk arì'logo.

⁷ Ebe re, wene hano wene hunigat aike welagarek le'maat o. Meneat he, it apùnì aike nen hano wene Karìsùt en hagasike wene atì mene hùnogoat hagarogo lalhinabuogolùk yogohisìlì'lùgì atì nenat ìgì o.

⁸ Mene re, sa nen, it ap atì nen a, nit en a, malaikat pogot oba mene nen a, hano wene nit en yogohisasugu mene atì, heraksìlìk hùnogo mene, yogohisogoin halok he, Ala nen homan hisoagat o.

⁹ Ati re, wene hageat yogohisasigi hak, hobuk aike yogohisak. Apùnì sanì nen wene hit wanhìgip mene a'nogo heraksìlìk hùnogo mene aike yogohisa wago halok he, Ala nen homan hisoagat o.

¹⁰ An nane ìgì atì re, apùnì nen, “Hat hano egen,” ìlùk yogonesuagalùk ìkì lagi a? At he, Ala nen, “Hat hano egen,” ìlùk, yogonesuagalùk ikì lagì a. Apùnì ina'la hanorogo ìkì lagì halok he, an nebe Karìsùt atitigeke usak legat o. Mene re, an Ala a'la hanorogo ìkì lagì o.

“An Karìsùt en tì'nogo nayoko hìlìk lakhanhike,” ìlùk yogoisasike wene

¹¹ Nerùgì nagaiya'lak. An nen hano wene yogoisìlìk nìkì lagì atì re, apùnì inane mene yogoisìlìk nìkì lagì lek atì, hit hinelu asusagat o.

¹² Wene atì, apùnì nen wo'netik, yakùlnetìk, isukwama wanhìgi hùk. We, wene atì, at Yesùt Karìsùt a'la hinago welagaike mene, at enat pak hogo yakùlnesikomo wanhìgi o.

¹³ An alep nit Yahuri mene ninawene ning hogo hesogo logolìk, apùnì Ala againapùrì mene yì aik tì aik hagarinapìk, inebe motok legetsagalùk ning hogoat hagatìk, ìkì lagagi mene atì, nabok hit hinasuk holhì lagagibat o.

¹⁴ Wena nit Yahuri mene ninopalak en yakùlnisasukwa mene a'nogo hesogo logolìk he, it an nagaiya'lak ninom higit mene nen wene ina'la seram hogo hagato kolek, an enek he, ekin hogoat hagatì lagagi atì.

¹⁵ Atì'nogo meneat he, Ala oabùt hano a'nogo nen hageat nagosa a'la nen oan ta'napì'lek werek kolegat he, nebe wena'napike.

¹⁶ Wena'napikesik he, hano wene aput Yesùt hagasike wene a'nogo apùnì etakwe mene yogoisìlìk nìkì logouagalùk aput ebe nelokoma melagaikomo re, wene apùnì aike inoba hinok wanhì'legat o.

¹⁷ Nen, it aike Yesùt en inayoko hìlìk laksasike mene amanogo, o Yerusalem were'ma inoba lagì'legat o. Meneat he, o apùnì Arap mene inaua a'loma lagagisik he, hobuk napotkwe o Tamìsìk wagagi.

¹⁸ Wagagisik, neki 3 tahun welagagisik en, hobuk Peterùt a'nogo ebe nelùrogo ìlùk, oba o Yerusalem lagi. Lìlìk he, at aua neki 15 nen neperak atoma welagagu.

¹⁹ Logolìk, it Yesùt en inayoko hìlìk laksasike mene amanogo inebe aike ninom apì agì'lek. We, ninoe Etagepogot agot Yakobùt a'nogo nek neperak apì agagu.

²⁰ Wene an nen helal waganogo hinoba lakhei wagì atì re, Ala eilhanemat eberogoat ìgì o. Napeliak ìgì lek.

²¹ Atoma welagagisik he, hobuk o Siria mel, Kilìkìa mel, wagagi atì.

²² Ati sat he, it Ala againapùrì Karìsùt inom hutik logolìk, o Yurea atogotì lagaukwa mene nen an nebe inokorat welagaukwa.

²³ Atì'nogo nebe inokorat logolìk, we it apùnì aike nen nabok enek mel ikenem inasuk holhì lagaukwa: “Ap alep nit yì aik tì aik haga'ninapìk, hano wene legetsagalùk hagatìk, ìkì lagaike mene a'nogo, yogotak apùnì hano wene a'nogo eberogoat ìlùk wanuagalùk yogoisìlìk niko,” ìlùk ikenem nabok inasuk holhì lagaukwa.

²⁴ Atì'nogo holhì logolìk, an hesik he, Ala hogoratì lagaukwa.