IBERANI 9 - Ala Ane Wene Ket Mene Warogo Wo'ninapike Wene

Apùnì kweangma inako warogo amep Ala wogotì lagaukwa atì hak, Yesùt ebe amep Ala wogosike wene

¹ Alep he, Ala nen wene warogo againapùrì woginapike wene atì higit hogo, it en at a'la hanorogo hagatì logouagalùk yakùlisasikomo, “Yì'nogo hagatì logousak, tì'nogo hagatì logousak,” ìlùk wene inelu welagaukwa. Nen, o su mene elama hesik hagatì logousak oba apùnì nen wusukwama welagaikeat.

² O atì hùlù etakwe sekelek etage re, o hùlù wesama u hak, Ala awì wùrìk ìkì lagaukwa. Atoma esage kìalhùkwe mel, e meja talek sùpùrùk Ala hesik hisagarek oba mel, welagaike.

³ Nen, o hùlù tì'mokwe su ba hùlì warek atì etage re, o hùlù motok ebe wesama u hak, Ala okawerek awì ìkì lagaukwa.

⁴ O atoma amusu obasi hano mene Ala loletì lagaukwa oba emas mene hagarek mel, peti Ala ninom hutik welago ìlùk ogat obogat emas mene laberek mel, welagaike. Peti atì a'la re, manna nìkì lagaukwa mene sogoloak emas mene a'la kalek atì mel, ap Harun arìge lùk aku hulelhì lagaike mene atì mel, wene Ala nen ninasuk wasike wene helal helep oba waganek atì mel, welagaike.

⁵ Peti atì apol oba it malaikat hake inebe pìre, inogolabì werek mene Ala ebe werek ìlùk alìk waganogo hagasukwa mene welagaukwa. It atì, apùnì weak hagatarek mene Ala nen sagalogo legetsìlìk, at inom hano lapulogo hisìkì lagaike ba, inogolabì nen sebelogo hìlìk welagaukwa. Atì'nogo welagaukwa meneat he, wene atì obogat hesik yogotak ya omakìtek-omakìtek pìlìng-palang hogo usak mea o.

⁶ Yì mene tì mene atì obogat obùlùk lopok tegelek were'ma, it ap Ala esewerek inebe obogat ninhùp-nanhùp Ala a'la hanorogo hagasuogolùk o hùlù kwe bakwe sekelek atì, kìkì lagaukwa.

⁷ Atì'nogo kìkì lagaukwa meneat he, o hùlù ti'mokwe sekelek atì nek he, at Ala esewerek inoe kain mene atì nek okawerek weak hagatì lagaike mene hesik mel, againapùrì Isirael mene inoabùt hebele'lek nonghongsek oba weak hagatì lagaukwa mene hesik mel, inako warogo amep wolok, o mo lagagìk, pìgìk, iko kolek tahun ebe lopok eki omake hesik kìkì lagaike.

⁸ Atì'nogo hagatì logousak ìlùk wene inasuk warek welagaike atì oba lìrogo, nit tùkùm hogo hùthoagalùk Ala Areagùn nen, mel yakùlnisikerek: “O hùlù kwe ba sekelek atì werek kolek, Ala okawerek awì ebe mene kwe hùtì'lek yagarek welagaike,” ìlùk yakùlnisìlì'logo.

^9-10 Wene atì, ebe yogotak haga'larì'logo mene hesik alìk waganek welagaike. Wene alìk waganek mene atì higit hogo hagatì logouagalùk, sùpùrùk mel, i mel, yì'nogo nìkì logolìk, yì mene tì mene oba yì'nogo horatì logousak, ìlùk Ala nen yakùlisasike mene higit hogo hagatì logolìk, inako Ala waretì lagaukwa atì, Ala nen wene ket ebe mene oan hagatì'lek werek kolek, kweangma elama hesik logolìk, alìk waganogo hagatì lagaukwa atì nen he, ùkùm inoba lek ìlùk ina'la katok hogo selegethousak mea welagaike.

^11-12 It atì'nogo hagatì lagaukwa meneat he, Ala nen he, “Yì mene tì mene hobuk tì'nogo hano haga'lasigin,” ìlùk abok isike atì ebe re, at Yesùt Ala esewerek inoe kain wagaike atì. Atì'nogo wagaikesik he, it alep yì mene tì mene Ala nen elalhike mene kìgìlogo o wusukwa ba atì kisike hùk. Lek o. We, o ebe mene hùko hano wùrì'mo eki omake hesik kisikesik, o hùlù kwema herakhùlùk pìkìt o hùlù ti'mokwe motok ebe wesama ìlùk u hak, Ala okawerek aua atoma kisike. Atì'nogo kisike atì re, kambing mel, sapi mel, amep wolok kisike hùk. Lek o. We, nit hele warek hake were'ma hikalek motok logouagalùk, ninoko palogo wa'lagaikesik, okawerek amep wolok atoma kisikesik, nit hesik werek o.

¹³ Nen, it apùnì alep hagatì lagaukwa atì ba hagatì logolìk, apùnì nen wesa mene ineki hakìlìk, inerabùl horinaparek atì hak, it ap Yahuri mene nen wesa mene ineki hakasak lek mene hakiko halok, hano asuagalùk kambing amep mel, sapi amep mel, sapi ebe warogo Ala hesik etu loletarek mene oak etu nìlìk, wul agarek mene mel, waganogo inogat etakwe mene hesik horinapì lagaukwa atì.

¹⁴ It inogat etakwe mene hesik wam amep mea mene ba elok hano horinapì lagaukwa. Halok, nit Karìsùt amep esin mene ba, “Ùkùm hinoba lek,” ìlùk nina'la selek hogo elok motok hinikerek o. Nit Ala eluk welagarek mene a'la hanorogo hagatì logouagalùk, wam esi hano mene Ala waretì lagaukwa atì hak, at Karìsùt Ala Areagùn esok motok welagarek mene omame ba, wa'laga logolìk, ebe Ala wogosike atì ba, nit alebat lek asigin mene tùlemat hagatì lagagu mene, at en, “Ùkùm inoba lek,” ìlùk, at amep oba nina'la selek hogo hinikomo welago.

¹⁵ Atì nen he, wene warogo alep wo'ninapike mene atì ba logolìk, nit ninasuk ware'lek weak hagatì lagagu atì ba ninebe hele warek hake welagagu. Atì'nogo were'ma, at Ala nen Karìsùt wa'lagaike atì ba hele hikalninapikesik he, nit at en wanisasike mene hùgì ninom hùnerìk, hano mene esok logogin mene wo'nisagalùk, wene ket mene warogo wo'ninabìk, Karìsùt ebe hùlìsanem menhesike.

^16-17 Ap aike nen, “An namìnìngeke tì'nogo sùpùrogo a'no,” ìlùk ikerek mene ebe eluk werek kolek, amìnìngeke agaikarek hùk. We, at ebe wa'laga halogat, “At arat wa'laga,” ìlùk sele'ma iko halogat, amìnìngeke agaikarek o.

¹⁸ Atì'nogo iko halok, inamìnìngeke helagarek atì hak, Ala nen wene alep mene warogo woginapike atì, mep warogo nenat ameli ba te'mek hogo isike.

¹⁹ Ala nen, “Yì'nogo hagasusak, tì'nogo hagasusak,” ìlùk, ninasuk wasike wene atì obogat, at Musa nen it apùnì Isirael mene yogoisasikesik he, hobuk sapi amep mel, kambing amep mel, i inom mulelogo ìpìkwe-apìkwe hìlìk en, topa esi elokoken mep hake mene sìbat elùgùn oba holok hogo hìlìk, musan eka mep watarek atì hak, mep yùgùlogo Ala nen wene ninasuk wasike wene helal waganek atì ba wathìgìk, apùnì Isirael mene inebenakwe hesagathìgìk, warisìgìk, isike.

²⁰ Atì'nogo warisìkì logolìk, mel yogoisasike: “Wene Ala nen ninasuk wate mene higit hogo hagatì logouagalùk, at en he, Hit wene arat warogo wokhinapì, ìlùk, mep wathinike yì o,” ìlùk yogoisasike.

²¹ Atì'nogo yogoisasikesik he, Ala awì su mene wùrìk atì mel, yì mene tì mene Ala awìla atoma at hesik hagatì lagaukwa mene obogat mel, ebenakwe mep warìk lagaike.

²² Ala nen wene ninasuk wasike wene atì higit hogo hagatì logolìk, yì mene tì mene obogat hake mep oba nek hotaresi'mo nogo nen he, mep wulapì'lek halok he, apùnì weak hagatarek mene sagalogo legetsasak mea atì nen he, mep wasike atì.

“At Karìsùt wa'lagaike atì ba nek he, nit apùnì weak hagatorek mene legetsasike,” ìlùk isukwa wene

²³ Kweangma yì mene tì mene obogat horasusak mene horatì lagaukwa atì, ebe pogot oba werek mene oba lìrogo hagatì lagaukwa. Meneat he, ebe mene pogot oba mene atì, wam atì mene warogo amep oba horasusak mea atì nen he,

²⁴ at Karìsùt o Ala okawerek awì ìlùk apùnì nen oba lìrogo wusukwa ba atì kisike hùk. Lek o. We, pogot ebe ba kisikesik Ala were'ma atoma nit hesik werek o.

²⁵ It ap Yahuri mene Ala esewerek inoe Kain Ala aua atì kìkì logolìk he, okawerek amep wolok kìkì lagaike hùk. Lek o. We, wam sapi mel, topa mel, amep wolok o mo lagagìk, pìgìk, iko kolek tahun ebe lopok eki omake hesik kìkì lagaike. Atì'nogo meneat he, at Karìsùt enek he, okawerek amep wolok eki hobugalep lek. We, eki omake hesik kisike atì.

²⁶ At en he, it alep hagatì lagaukwa atì hak haga'lepma re, kweang elalhike hùlì nen pìkìt yogotak hùlì, eki hobugalep yì aik tì aik hìkì logolìk wa'laga logoilep. Atì'nogo meneat he, o elùgùn oba nit weak hagatorek mene legetsagalùk eki omake hesigat warn Ala waresu hak, okawerek ebe wa'lasi wagaike atì.

²⁷ Nit apùnì omake hesik wa'larì'mo nen, hobuk ùkùm ninoba hìgìk, kotìk, igin ìlùk, at Ala nenat isike atì hak,

²⁸ at Karìsùt hogo re, nit apùnì weak hagatorek mene legetsagalùk eki omake hesik wam Ala waretì lagaukwa atì hak, at ebe wa'lagaikesik, hobuk wesigin atì, nit weak hagatorek mene legetsagalùk wesigin hùk. Lek o. We, nit apùnì, at waganem elokoma serogo welagorek mene hùgì, hano'ninabigìlùk wesigin o.