IBERANI 8 - Ala Ane Wene Ket Mene Warogo Wo'ninapike Wene

At Yesùt nit hesik Ala esewerek kain welagarek wene

¹ Nit wene ìkì lago atì, esin he, yì o: nit ninoe kain Ala esewerek ogo atì hagat werek. At ebe re, ninopase Etagepogot Ala welagarek oba era'lu kainat werek.

² Atì'nogo werek atì, Ala awì su mene apùnì nen elama hesik wusukwa ba werek hùk. Lek o. We, Ala okawerek awì ebe mene wùsike ba atoma logolìk nit hesik hagaterek o.

³ It ap Ala esewerek inogogì kaintek inebe lopok menhisagarek atì re, yì mene tì mene Ala wogotìk, inako waretìk, ìkì logouagalùk menhisagarek atì hak, nit ninoe Ala esewerek kain atì re, yì mene tì mene aike nit hesik Ala wogosusak werek o.

⁴ Wene Ala nen ninasuk wasike wene atì higit hogo re, yì mene tì mene Ala hesik wogotì logousak mene, it ap Ala esewerek mene inebe werek atì nen he, at Yesùt ebe kweangma yoma logoilepma re, Ala esewerek logoilep lek o.

⁵ Ala nen he, “Nawì su mene elama hesik wùthanino,” ìlùk Musa yogosikomo, ebe wusigìlùk ikenem he, hobuk mel yogosike: “An neperak tom oba logolìk, an nawì yì'nogo wùthanino, ìlùk ìlìreke walogo ìnùkhììgì a'nogo higit hogo motok wù'nok en he, ha'la eberek motok logoino o,” ìlùk yogosike atì hagat, it ap Ala esewerek kweangma yoma logolìk, ebe pogot oba werek mene oba lìtìk, alìk wanhìk, egarek atì.

⁶ Atì'nogo hagatì logolìk, it he, mea alìk waganek mene hagatarek meneat he, Ala nen, “Hit hano hagathinabigin,” ìlùk abok yogonisasike wene oba louksek, at Yesùt ebe Ala ho, nit apùnì ho, hùlìsanem logolìk, wene Ala nen ket mene warogo wo'ninapike higit hogo ebe meneat esin motok hagaterek atì.

⁷ Wene alep Ala nen, “Hano hagathinabigin,” ìlùk wene warogo wo'ninapike atì ba men agì'lek hano haga'ninabilepma re, wene atì obùlù'mo, “Hanothinabigin,” ìlùk hobuk ilep legat o.

⁸ Meneat he, Ala againapùrì wene atì hesogo logolìk, meaat hagatì lagaukwama mel yogoisasike: “Apùnì Isirael mene mel, Yehura mene mel, an nen wene ket mene warogo woginabigin oba weregat, ìlùk eberogoat yogohisìgì o.

⁹ An nen hit hinopalak o Mesit en wogisek wùlìbi wesigìlùk inogat hagisìkì logolìk, Tì'nogo hagathinabigin, ìlùk wene warisasigi atì hak hùk. Hunigat o. An nen it wene warisasigi mene atì hologo higit hogo hagatì'lek atì nen he, it inebe nabìt, ìlùk kobologo hisasigi atì.

¹⁰ Hobuk apùnì Isirael wene ket mene warogo woginabigin ìlùk ìgì atì, ebe yìat: An nen wene inasuk watìrek wene atì ina'la eberek motok logouagalùk, wogisìgìk, inetaùkenma helal waganogo hisìgìk, ìlìk he, an it inopase logogin. Nen, it an nagainapùrìat logogun o.

¹¹ It inalùgetek mel, yekerùgì mel, obogat inopase an nebe inelu logogun atì nen he, it inogogì inagaikùgì mel, inerùgì inagaiya'lak mel, yogoisìkì logolìk, Hinopase Ala atì hinelu a'ni o, ìlùk yakùlisasak lek o. We, inokawerek inabusak enat, nebe inelu aga logogun o.

¹² It weak hagatarek mene atì, an nen sagalogo legetsìlìk, hobuk na'la eberek logogin lek o,” ìlùk yogoisasikomo helal waganek werek.

¹³ At en he, “Wene ket mene warogo woginabigin,” ìlùk isike atì re, wene hageat mene legetheigìlùk isike. Yì mene tì mene hageat mene eil somong aganem hepok heraksagarek atì hak, wene alep mene legetheigìlùk isike atì.