IBERANI 7 - Ala Ane Wene Ket Mene Warogo Wo'ninapike Wene

Ap Melekiserek Ala esewerek logolìk hagatì lagaike wene

^1-3 Ap Melekiserek atì ebe re, apùnì o Salem mene inoe kain logolìk, Ala Etagepogot esewerek welagaike. Ap Melekiserek atì etage nit ninane ba re, “Kain etagepogot oabùt higit hogo nek hagaterek mene,” ìlùk u hak, etage Melekiserek sale'ma ìkì lagaukwa atì. Nen, aike re, “Kain etagepogot hogot walherek mene,” ìlùk u hak, apùnì o Salem mene inoe kain etagepogot ìlùk ìkì lagaukwaat. At Melekiserek atì hesik he, at agosa opase tì nen tago mene ìgìk, opa apu tì nen tagokwe mene ìgìk, at tì hùlì ta'lagaike ìgìk, tì hùlì wa'lagaike ìgìk, sekek hogo aike ìgì'legat. Atì nen he, at Ala ebe aput eperak higit logolìk, at ebe Ala esewerek motok welagarek hakeat o. Were'ma, ap Aberaham ap kaintek mene inoa'lùk apotkwe waganem he, at Melekiserek atì nen eileken ha wùlìpikesik he, apùnì nen mokareke it aike inoba hagarek atì hak, at en he, “Ala nen hebe hanothabuak,” ìlùk ane agauk hogo yogosike. Atì'nogo yogosikomo, at Aberaham en, weim atì yapì logolìk, yì mene tì mene hùgùleke wanhike mene obogat eki wenagasogo hetakwe mìkìlogo 10 ba lagai wagaike mene, Ala hesik hisìlìk, at Melekiserek wogosike.

⁴ Nit apùnì Isirael mene ninapu Aberaham en weim atì yapì logolìk, yì mene tì mene hùgùleke wanhike mene eki wenagasogo hetakwe mìkìlogo 10 nen lagai wagaike mene, Ala hisìlìk, at Melekiserek wogosike atì nen he, nit nina'la nen, “At Melekiserek atì ebe kain motok,” ìlùk akasak atì hani!

⁵ Nit apùnì Isirael mene wene Ala nen ninasuk wasike wene a'nogo ba yogonisìkì logolìk, aike mel isike: “Yì mene tì mene ineki wenagasogo hetakwe mìkìlogo 10 ba lagai wesigin mene an hanhenem he, ap an esewerek it Lewi nen tagokwe mene nek wanhì logouak o,” ìlùk inasuk wasikomo helal waganek werek. It inebe omakeat mene ap Aberaham en tagokwe mene inerùgì inagaiya'lak enat hikenem wanhì logouak o, ìlùk isike atì.

⁶ Atì'nogo isike meneat he, at Melekiserek atì, ebe ap Lewi nen tagokwe mene hùk. At ebe welek mene logolìgat he, at Aberaham Ala nen, “Hanothabigin,” ìlùk abok yogosike mene a'nogo nen, yì mene tì mene eki wenagasogo hetakwe mìkìlogo 10 nen lagai wagaike mene Ala hisìlìk Melekiserek wogosikomo wanhikesik he, apùnì nen mokareke it aike inoba hagarek atì hak, “Ala nen hanothabuak,” ìlùk ane agauk hogo yogosike atì.

⁷ Atì'nogo yogosike atì re, it apùnì inebe kaintek enat inagoromì inawe a'ma mene inane agauk hogo yogoisagarek atì, nit obogat atì'nogo hagatarek ninelu nogo nen he, wene atì hesik inane sagalusak lek.

⁸ It ap Ala esewerek logolìk, it apùnì aike nen yì mene tì mene ineki wenagasogo hetakwe mìkìlogo 10 ba lagai waganem, Ala hisikenem inebe apùnì wa'lagaikarek mene nen wanhì lagaukwa meneat he, ap Melekiserek atì nek he, eluk welagarek mene nen atì'nogo wanhike, ìlùk Ala ane ba helal waganek werek o.

^9-10 At wanhike atì hesik he, it apùnì Isirael mene nen yì mene tì mene ineki wenagasogo hetakwe mìkìlogo 10 ba lagai waganem Ala hisikenem he, ap Lewi nen tagokwe mene wanhì logouagalùk isike a'nogo meneat he, at Aberaham at Melekiserek eperak apì agaukwasik, yì mene tì mene eki wenagasogo hetakwe mìkìlogo 10 ba lagai wagaike mene Ala hisìlìk, at Lewi oan ta'lagì'lek werek kolek Melekiserek wogosike atì. At Aberaham en wogosike meneat he, it ap inùkùl etage Lewi mene Aberaham en tagokwe mene nogo nen he, it en wogosukwa umo re, elogat o.

¹¹ It ap inùkùl etage Lewi nen tagokwe mene Ala esewerek esin were'ma, wene Ala nen ninasuk wasike wene a'nogo wogisasike. Atì'nogo wogisasike meneat he, it en apùnì Isirael mene katok hogo hano hagarinapì logoilepma re, Ala nen he, “Ap Harun nen tagokwe mene lek. We, an esewerek Melekiserek hagatì lagaike atì hak, ap hunigat mene aike menhegein,” ìlùk ilep legat o.

¹² It ap Ala esewerek alep mene heraksìlìk, ket hunigat mene menhisagalùk halok he, wene Ala nen ninasuk wasike wene atì obùlù'mo wene elùgùn hunigat mene ìlìk en menhisasak o.

Ala esewerek at Melekiserek hake lek; hùnogoat mene menhesike wene

^13-14 Wene yì ninoe Etagepogot Yesùt ùkùl etage Yehura mene hesigat o. At ùkùl etage Yehura mene ìlùk apùnì obogat inelu mene re, at Musa nen it ap Ala esewerek hesik ìkì logolìk, it ap Yehura mene inabok ìkì lagaike motok lek. Atì nen he, it ap inùkùl etage Yehura mene aike Ala esewerek logolìk Ala ako waretì logouagalùk menhisìkì lagaukwa motok legat o.

¹⁵ Ap Ala esewerek at Melekiserek hake aike melagaikesik werek atì hesik he, wene weinam motok werek o.

^16-17 At atì, Ala esewerek melagaikesik werek atì re, apùnì nen, “Ap inùkùl etage tì mene menhisagaresi'mo re, ati meneat hano logouak,” ìlùk menhisagarek atì hak, menhesikomo werek hùk. Lek o. We, at hesik wene yì'nogo helal waganek werek. Ala nen he, “Ap Melekiserek an esewerek welagaike atì hak, hat an esewerek moto'-motok logoinogolùk menhagagì o,” ìlùk isikomo helal waganogo hesukwa atì hak, at Yesùt hobuk wa'lagì'lek eluk omame motok welagarek atì ba menhesikomo werek.

^18-19 Atì'nogo were'ma, Ala nen wene alep ninasuk wasike atì mea nen katok hogo hano hagarinapì'lek, we, alemarogo logoinogo ìlùk, legetsìlìk he, hobuk wene elùgùn ket mene wulapikomo re, ninebe katok hogo hano haga'ninabigin ìlùk Ala oba horok hogo ki waga lago.

²⁰ Nen, wene atì Ala nen hopuk palogoat wulapike o. It apùnì aike nen he, it ap Ala esewerek logouagalùk hopuk palhì'lek menhisagarek meneat he,

²¹ at Yesùt enek he, Ala nen hopuk palogo menhìkì logolìk he, mel yogosike: “An Netagepogot en hat an esewerek moto'-motok logoinogolùk hopuk palogo menhagagì atì, hobuk nane etenogo wene hunigat mene aike napeliak igin lek o,” ìlùk yogosike.

²² Ala nen, “Tì'nogo katok hogo hano hagathinabigin,” ìlùk wene ket mene warogo wo'ninapike atì, ebe asigin ìlùk at Yesùt ebeat menhìlìk wo'nisasike atìat o.

²³ Nen, wene omakeat aike weregat o. It ap Ala esewerek logolìk hagatarek mene pìkìt motok hagatì'le'ma inebe oake ba wa'laganem he, inobùlù'mo menhisìgìk, ìlìk waganem inebe apigat welagaikarek atì.

²⁴ Atì'nogo meneat he, at Yesùt enek he, Ala esewerek eluk motok logogin atì nen he, Ala nen, it apùnì aike at obùlù'mo menhisegein lek o. We, at aligat motok logogin o.

²⁵ Atì'nogo eluk motok logolìk, nit apùnì hesik Ala kìno yogoto motok welagarek atì nen he, nit Ala were'ma kuogolùk at oba ha'larìk kikenem elok telninabìk katok hogo hano haga'ninabigin atì.

²⁶ Nit nina'la nen he, “Ap aike Ala esewerek nit hesik hano katok hogo yì'nogo kain logolìk hagatì logoilep e,” ìlùk akogorek mene, Ala nen ninoe Yesùt atìat menhesikomo werek o. At oabùt he, weak kolo aike hagatì'lek, hano tegelek motok were'ma, apùnì weak hagatarek mene ina'la nen tegelogo pogot abel pokwe po a'loma lìakhesikomo nit hesik werek o.

²⁷ It ap Ala esewerek kaintek atì re, ninhùkwe-nanhùkwe inokawerek weak hagatarek hesik tak inako Ala waretaresik en hobuk apùnì aike weak hagatarek hesik inako Ala warogo wogotarek meneat he, at Yesùt enek he, nit weak hagatorek mene hesik ninako Ala waresu hak, at ebe omake hesik wa'laga logolìk, ebe Ala wogosike atì.

²⁸ Alep wene Ala nen ninasuk wasike wene atì ba re, ap mea mene, maben mene Ala esewerek menhisìkì lagaukwa meneat he, hobuk Ala nen hopuk palhike atì ba re, at ebe aput nit telninapùkwe mene elùgùn warogo katok hogo menhesikomo, at esewerek kain motok werek o.