IBERANI 6 - Ala Ane Wene Ket Mene Warogo Wo'ninapike Wene

¹ Atì nen he, Karìsùt agoromi arìk hagatì logousak mene wene emakum yakùlharek atì mene yakùlhugu mene atì werek kolek, inalùge arìk hagatì logousak mene yakùlhì logouok o. O tik hano warìk ineki etenharek lek atì hak, nit alep weak hagatì lagagu mene hukalogo heraksìlìk ninoabùt hebelarìk ninetaùken Ala oba hìpìrethesugu mene atì hobuk etenuok lek o.

² Ima pagarek wene atì yakùlhìk, inùkùl sebelharek wene atì yakùlhìk, wa'larì'mo Ala nen ninelugu'ninabigin wene atì yakùlhìk, elùgùn oba ùkùm ninoba hìgìk, kotìk, ikenem moto'-motok logogun wene atì yakùlhìk, isugu mene atì ninane etenogo hobuk yakùluok legat o.

³ We, Ala nen hano akike halok, hobuk yakùlusak mene atìat yakùlìk laga logouok o.

^4-6 It apùnì aike, Ala nen ina'la lìarinapo kolek, yì mene tì mene etuk mìkhìlìk hano mene wanharek atì hak, Ala pogot oba nen oko lek welegat wo'nisikerek mene atì wanhìk, Areagùn sùpù'nisikerek mene atì aike wanhìk, Ala ane atì hano motok ìlùk ineluat welagìk, Ala oabùt hano nen hobuk omamerogo hano motok haga'ninabigin atì oan haga'ninapì'lek werek kolek, yogotak ya yì mene tì mene lilu nekarek hak, wogisikenem helìgìk, egaresik enat he, hobuk it en he, “Ala ninabìt,” ìlùk ane heraksalùk inapotkwe wùlìbi lìlìk logolìk, Yesùt Ala aput ebe e ba menhìlìk watì logolìk inane sagan wokhasukwa atì hagat hobuk hagarì'lùgì atì. Atì'nogo motok hagarìk laga logolìk, hobuk, it en he, “Nit weak hagato,” ìlùk inoabùt hebeluagalùk, inapotkwe nìkì'nogo wogisek wesu heat. Mea o.

⁷ Ala nen ninhùkwe-nanhùkwe o moso kweangma pelabi waganem he, kweang hano sako ikenem apùnì nen yabu waganogo yì mene tì mene awì yatarek mene nen ebe hano nikenem he, Ala nen, “Kweang atì hano,” ìlùk hanothikeregat o.

⁸ Atì'nogo meneat he, kweang atì yì ka tì ka weak mene mel, pakì alok mene mel, hulelhe halok he, “Kweang yì, we tùlemat alemarogo werek atì weak nabìt,” ìlùk homan hìlìk he, hobuk etu lolumo heleleng hogo negein o.

⁹ Atì'nogo ìgì meneat he, nerùgì nagaiya'lak. Hinebe netawì e. Ala nen weagathinabigin, ìlùk nina'la akìkì lago lek. At he, hanothinabigin ìlùk hùthìkì lago o.

¹⁰ At Ala oabùt he, kolo hagaterek mene hùk. At higit hogo nek hagaterek atì nen he, hit en at hesik hagatì logolìk hinerùgì hinagaiya'lak Ala againapùrì mene aike hinetawì nen alep leberisìgìk, hobuk leberisìgìk, ìkì lagep mene atì, at en hit hinoba lì'mathikegein lek o.

¹¹ Nerùgì nagaiya'lak. Nit nina'la walok he, hit hina'la nen he, “Ala nen nit hano'ninabigin,” ìlùk hina'la hai hakìkì lagep mene atìat akìkì logopik, hùlì elùgùn oba ese asuageip en he, hagatì lagep atì hagat hinebe lopok hinomamerogo hagato motok logousak walok akìkì lago o.

¹² Hit hinaberalì weak hagatì logousak he, ninabìt o. It apùnì alep inetaùken Ala oba hìpìrethìlìk inaberalì agì'lek, it en he, “Eberogoat wanugun,” ìlùk akìkì lagaukwa ba, Ala nen he, “Hit wokhisegein,” ìlùk abok yogoisasike mene ebe wanhukwa atì hak, hit atì'nogoat it inoabùt waganogo hagatì logoino o.

“Ala nen abok yogoisikerek mene sùge agarek lek,” ìlùk yogoisasukwa wene

^13-14 At Ala nen he, Aberaham yogotì logolìk, “Hat hobuk yì'nogo hagathabigin,” ìlùk abok yogotì logolìk: “Hat hebe hanì-hanorogo hagathapìk, hagainapùrì nen tagokwe mene motok apik seikpeik hogo wokhetìk, igin o,” ìlùk, ap hùnogoat mene etagepogot le'ma re, Ala okawerek etage ba hopuk palogo yogosike.

¹⁵ Atì'nogo yogosikomo, Aberaham a'la pùk agì'lek serogo welagaike atì ba, wene abok yogosike mene atì, amt ebe agaike atì.

¹⁶ Mene re, it apùnì nen hopuk paluogolùk halok he, inokawerek inetage men negen nen he, inokawerek inetage ba hopuk palhì'lek. We, it aike inetagewerek esin mene inetage ba hopuk palharek atì. Atì'nogo palhenem he, it aike nen wene palhì logogun mene inane lek agarek atì.

¹⁷ Atì'nogo haga'lagarek atì hak, Ala nen he, “Apuni an na'la akìlìk abok yogoisìgìrek mene hùgì, nane etenogo hobuk hunigat mene aike yogoisìgìrek lek o,” ìlùk, it abok yogoisasike mene hùgì nek eberogoat akoagalùk he, hopuk palogo yogoisasike atì.

¹⁸ Wene hopuk palogo yogoisasike atì re, nit Ala awe a'ma ki wago mene hùgì nina'la nen, “Hano'ninabigin,” ìlùk eberek welago mene ninetaùken hapuk hogo logouagalùk nirat yogonisasike. Abok ìgìk, hopuk palhìk, wene pìre isike atì, nit en he, Ala apeliak ikerek motok lek, ìlùk ninetaùken hapuk hogo logouagalùk yogonisasike atì.

¹⁹ At en he, “Hanothinabigin,” ìlùk isike atì sùge asigin lek. “Ebe asigin,” ìlùk akìkì lago mene hùgì, i so age kweangma ning hogo telhìlìk welagaikarek atì hak, ninetaùken pogot oba o hùlù ti'mokwe sekelek Ala were'ma atoma hùnethìlìk hapuk hogo logouok o.

²⁰ At Yesùt nit hesik kwe ebela yarìk, o atoma kisikesik, ap Melekiserek Ala esewerek logolìk hagatì lagaike atì hak, moto'-motok hagatì logogin mene Ala esewerek kain agaikesik welagarek atì.