IBERANI 5 - Ala Ane Wene Ket Mene Warogo Wo'ninapike Wene

¹ It ap Ala esewerek inogogì kaintek inebe lopok atì re, apùnì Ala againapùrì nen, ap it mene aike Ala hesik hagatì logolìk, it mene yì mene tì mene hikenem, Ala wogotìk, weak hagatarek mene hesik inako wolok waganem, waretìk, ìkì logouagalùk weteberogo menhisagarek.

² Atì'nogo menhisikenem, it inomame lek mea meneat nogo nen he, it apùnì aike atì'nogoat wene inokot logolìk nong-hong hogo hagatarek atì, hùthìlìk he, inebe inetawìrinabìk it hesik inoba heanerogo elok hagatarek atì.

³ It inokawerek en weagat hagataresi'mo nogo nen he, it apùnì aike weak hagatarek mene hesik inako helalùk waganem, it en Ala waretarek atì hak, atì'nogoat it inokawerek hesik inako Ala waresusak higit hogoat waretarek atì.

⁴ It atì'nogo hagatì logouogolùk, “An nebe Ala esewerek kain logogin,” ìlùk inokawerek en menhakagarek lek o. We, at Ala nenat, ap Harun ayoko hesikomo menhesukwa atì hak, Ala nen inayoko hiko halogat menhisagarek.

⁵ At Karìsùt atì'nogoat, “An Ala esewerek kain logogin,” ìlùk okawerek en wenagasogo menhakìgì'lek. We, at Ala nenat wenagasogo menhìlìk wene mel yogosike: “Hat an naput o. Hebe yogotak takhapì,” ìlùk yogosike atì.

⁶ Nen, aike re, Ala ane helal waganek aike ba yì'nogo isikomo weregat: “Ap Melekiserek an Ala esewerek kain welagaike atì hak, hat an esewerek kain moto'-motok logoinogolùk menhagagì o,” ìlùk yogosikomo helal waganek werek.

⁷ At Yesùt ebe kweangma yoma were'ma apùnì nen wasinogo ìlùk, Ala nen elok telusak atì nen he, le aga logolìk, ane hùkorogo Ala etage palogo ayoko hìkì logolìk, opase ane ayùk hogo hologo welagaike atì nen, ane asuk holhike.

⁸ Atì'nogo yogosike atì re, at Yesùt Ala ebe aput meneat he, yì aik tì aik hìkì logolìk, Ala ane hologo hagasusak mene hesik yakùlhike atì.

⁹ Atì'nogo yakùlhì logolìk, elugùn warogo katok hogo hagasikomo, nit at ane hologo logogun mene hùgì ninebe obogat nineluk moto'-motok logouagalùk at ebe telninapùkwe mene ero hagarogo hesike atì.

¹⁰ Atì'nogo hagarogo hesikesik, at en he, “At Melekiserek hagatì lagaike atì hak, hat hebe an esewerek kain logoino,” ìlùk menhesike atì.

Apùnì nen Ala ane heraksalùk, inapotkwe wùlìbinogo ìlùk, ina'la eberogo yogoisasukwa wene

¹¹ Wene atì hesik he, nit en hit yogohisasak mene apigat werek meneat he, hit hinoabùt, wene hepok hùthasak mea atì nen, nit en tùkùm hogo yakùlhisasak mea o.

¹² Hit he, Ala ane alebat yakùlhigisipmo re, hit en it apùnì aike yakùlisasak elok meneat he, mea atì nen, wene emakum yakùlharek mene atì, it apùnì aikeagùn inoba yakùlusak o. It yekerùgì sùpùrùk haro mene nasak mea nen, inagosa ineilak enek niko welagaikarek atì hak, hit he, wene wurik mene yakùlusak mea nen he, wene alep yakùlisagarek mene atì mene nek yakùlhì logousak hinoabùt hisìkì lagì o.

¹³ Yekerùgì inagosa ineilak enek nekarek atì re, inebe yekerùgìatma, wene yì hano, yì weak, ìlùk penesusak inokot welagaikarek atì.

¹⁴ Mene re, it inalùgetek enek he, inetaùken wurik arìk nogo nen he, wene yì weak, yì hano, ìlùk penesusak inelu nogo nen he, sùpùrùk haro mene it inapùrùk o.