IBERANI 4 - Ala Ane Wene Ket Mene Warogo Wo'ninapike Wene

¹ Atì halok he, Ala nen againapùrì set waloagalùk abok yogoisasike mene atì lek agì'lek werek mene atì, hobuk nit set waloagalùk wo'nisegeinmo atoma hit aike kìgì'lek kamo inogo ìlùk hinayùk hogo logolìk higit hogo hagatì logoino o.

² Wene hano wane atì it alep yogoisasike atì hagat, nit atì'nogo yogonisasikeat. Mene re, wene yogoisasike mene atì, it inasuk holhukwasigat he, hùthìgì'lek hagatì lagaukwa atì ba, wene atì it hesik he, mea agaike atì.

³ It hesik atì'nogo men agaike meneat he, nit ninetaùken Ala oba hipìrethìkì lago mene hùgì, at en he, “Hit set walogoin,” ìlùk isike a'nogo nirat set walogoin o. Wene atì hesik he, Ala nen yì'nogo isike akìgì: “An na'mage lagalìk hopuk palogo wenagisìkì logolìk. An set walogo welagìrek atì hak, it set walogoin motok lek o,” ìlùk isike atì re, pogot kweang at elalhikesik set walogo logolìk isike.

⁴ O ineki sabìt oba welagaikarek a'nogo mene hesik, Ala ane ba yì'nogo helal waganek werek: “Ala nen yì mene tì mene obogat elalhì lagaikesik he, eki sabìt oba set walasike,” ìlùk helal waganogo hesukwama werek.

⁵ Wene atì hesik, Ala nen yì'nogo isikomo helal waganek weregat: “An set walogo welagìrek atì hak, it set walogoin motok lek o,” ìlùk isikomo helal waganogo hesukwa.

⁶ Emakum he, it en hano wene atì inasuk holhukwasigat he, hologo higit hogo hagatì'lek atì nen, Ala nen he, “It set walogoin,” isike atì, set ebe walìgì'lek. Atì halok he, it apùnì hunigat mene aike elok set walogoin, ìlùk hùthasak o.

⁷ Wene atì abok yogoisasikesik oba nen, o mo lagagìk, pìgìk, iko kolek tahun apigat welagaikesik en, hobuk, “Ti ba,” logogun ìlùk at Taùt yogotì logolìk, “Yagotak ya ba,” ìlùk yogosike mene alep ìgì hak helal yì'nogo waganek werek: “Yogotak ya ba Ala ane hinasuk holhep halok he, hinetaùken omame agùp o,” ìlùk isikomo helal waganogo hesukwa atì.

⁸ Ala nen, “Hit set walogoin,” ìlùk abok yogoisasike atì, at Yosua nen wogisek ki wagaike atì ba, arat ebe a'lepma re, it ki wagaukwasik oba nen hobuk Ala nen, “Ti ba, set walogoin,” iluk isike atì, ilep legat o.

^9-10 Ala nen yì mene tì mene elalhi lagaikesik en, hobuk katok hogo eki sabìt oba set walasike atì hak, nit at againapùrì set walogoin mene hùgì ninebe lopok yì mene tì mene ninokawerek hesik hagatì lago mene arat katok hogo set walogoin mene weregat o.

¹¹ It alep Ala ane hologo higit hogo hagatì'lek en, set walìgì'lek atì hak, nit aike it inomanem set walìgì'lek kamo inogo ìlùk, ninomamerogo hagatì logouok o.

¹² At Ala ane ikerek atì re, karok ela abel heta-heta mago atì hake re, lek o. We, at ane atì re, eluk mene omame apik ela motok melangsek logolìk, inoak ekalim elema kìgìk, inamokok elema kìgìk, u hak he, ina'la inetaùken oba hakha lagaresik he, ina'la akagarek mene mel, inetaùken nen walok akagarek mene mel, eileken elok peneterek.

¹³ Ala eilhanem he, yì mene tì mene at en elalhike mene aike hinago werek nogo? Motok lek o. We, at eilhanem he, yì mene tì mene obogat he, weinam hukalek motok welagarek atì nen, nit hagatì lago mene, at elumo re, ninoba lopogat ninom ugun o.

Yesùt ebe kain Ala esewerek welagarek wene

¹⁴ Nit ninoe kain Ala esewerek Ala aput Yesùt pogot pelakha wagìk, pogot abel pokwe Ala were'ma lagasikesik nit hesik werek atì nen he, nit ninetaùken at oba hìpìrethìlìk ninane pak hogo ìkì lago mene atì, nineki ning hogo hesogo logouok o.

¹⁵ Nit ninoe kain Ala esewerek welagarek atì re, nit ninomame lek mea atì, at okot hùk o. At nit ninoabùt wanhikesik were'ma, nit weak hagasuagalùk nina'la kagalherek atì hak, at atì'nogoat yì hesik tì hesik a'la kagali waga lagaike meneat he, at weak aike hagatì'lek logolìk ninoabùt elu o.

¹⁶ Atì nen he, nit weak asusak were'ma, hanoasuak, ninopase Ala oabùt hano nen etawì'ninapìk, lebe'nisigìk, uagalùk, at Ala kain welagarek oba logolìk oabùt hano oba heanerogo hagatarek atì nen, ninayù'legat oba horok hogo kuok o.