IBERANI 3 - Ala Ane Wene Ket Mene Warogo Wo'ninapike Wene

“At Musa ebe abel negen meneat he, Yesùt enek he, ebe esin,” ìlùk yogoisasukwa wene

¹ Atì nen, Ala againapùrì nerùgì nagaiya'lak. At Ala pogot oba nenat hit ninomat ninayoko hesikomo wene wanhugusik pak hogo ìkì lago atì hesik, at Yesùt ebe Ala esewerek kain logouagalùk, Ala nenat lakhei wagaikomo werek atì halok, hit hinetaùken oba nenat hùthìkì logoino o.

² At Musa nen he, Ala againapùrì inebe re, Ala awì wùrìk negen, ìlùk it hesik oabùt hùpùn hogo hagatì lagaike atì hak, Ala nen Yesùt atì'nogoat hagasuagalùk menhesikomo oabùt hùpùn hogo hagaterek atì.

³ It apùnì aike nen o wùrìk mene hamùlùgat negen hogoratì logolìk, it ap o wùtarek mene atì nek he, hùkorogo hogorinaparek atì hak, at Musa hamùlùgat negen hogoratì logolìk, at Yesùt enek he, hùkorogo hogoratì logousak o.

⁴ O wùrìk ebe lopok he, it ap o wùtarek mene inebe werek meneat he, yì mene tì mene obogat he, Ala aligat en o wusu hak elalhike o.

⁵ At Musa ebe Ala atitigeke logolìk, Ala againapùrì inebe at awì wùrìk negen ìlùk, it hesik oabùt hùpùn hogo hagatì logolìk, mel ìkì lagaike: “Ala nen yì wene tì wene hobuk yì'nogo yogonisegein mene werek,” ìlùk abok yogoisìkì lagaike.

⁶ Meneat he, at Yesùt enek he, Ala ebe aput nogo nen he, at esewerek enat hagaterek. Nit hano'ninabigin wene atì hesik ninetaùken ning hogo oba hìpìrìk motok logogun halok he, Ala awì wùrìk atì, nit ninebeat o.

“Apùnì Ala againapùrì mene hùgì, hobuk set walagoin,” ìlùk yogoisasukwa wene

⁷ Atì nen he, Ala Areagùn nen mel yogonisikerek: “O yogotak ya ba Ala ane hinasuk holhep halok he,

⁸ hinapu hinopalak o leimo apùnì le'ma nìkì logolìk, inetaùken omame arìk, it en he, Ala ninabìt, ìlùk, Omame werek a? Lek a, ìlùk oabùt palìk nìkì lagaukwa atì hak, hit atì'nogo hagatùp o.

^9-10 Ala nen he, O atoma nen o mo lagagìk, pìgìk, iko kolek 40 tahun logolìk, an nen hit hinopalak hagarinapenem ineileken nen tomok hìkì lagaukwa meneat he, At omame werek a? Lek a, ìlùk lalnapìk, noabùt palhìk, ìkì lagaukwa. Atì'nogo hagatì lagaukwa atì nen, an na'mage inoba hìkì logolìk he, mel yogoisasigi: Hinoabùt kùn-kansek logolìk nane loporogo wanusak hinabìt atì nen,

¹¹ an na'mage lagalìk hopuk palogo wenagisìkì logolìk, An nen, Hit set walogoin, ìlùk abok yogohisasigi a'nogo, set ebe walogoin motok lek o, ìlùk yogoisasigi,” ìlùk isikomo Ala Areagùn nen yogoisasikomo helal waganogo hesukwa.

¹² Halok he, nerùgì nagaiya'lak. Hit aike hinoabùt weak arìk, hinetaùken Ala eluk motok welagarek mene oba hìpìrethìgì'lek logolìk, at ebe heraksalùk hinapotkwe wùlìbi lanogo ìlùk, hinoabùt hebelogo logoino o.

¹³ Hit aike weak hagatì logolìk hinokawerek lalogo hinetaùken omame asinogo ìlùk Ala ane ba, “O yogotak ya ba,” ìlùk isike atì lek agì'lek werek kolek, hit-hit ninhùkwe-nanhùkwe hinetaùken ago wat-wat ìkì logoino o.

¹⁴ Atì'nogo ìkì logolìk, emakum ninetaùken at oba hìpìrethesugu mene atìat nineki nomok hogo hùlì elùgùn oba hesogo logogun halok he, nit Karìsùt erùgì agaiya'lak agosik welago o.

¹⁵ Ala ane ba helal yì'nogo waganek werek: “O yogotak ya ba, hit Ala ane hinasuk holhep halok he, hinapu hinopalak en, Ala ebe ninabìt, ìlùk ìkì lagaukwa atì hak, hit en, At ninabìt, ìlùk hinetaùken omame agùp o,” ìlùk helal waganogo hesukwa.

¹⁶ Apùnì Ala ane inasuk holhì lagaukwasik enat he, “At ebe ninabìt,” ìlùk ìkì lagaukwa atì sanì nogo. It atì re, at Musa nen o Mesit en wogisek wùlìbi wagaike mene inebe obogat amanogo akìgì.

¹⁷ Nen, o mo lagagìk, pìgìk, iko kolek, 40 tahun oba logolìk, Ala a'mage sanì inoba hìkì lagaike nogo. It atì re, weak hagatì lagaukwama, o leimo apùnì le'ma motok wa'larìk wagaukwa amanogo akìgì.

¹⁸ Ala nen wenagisìkì logolìk hopuk yì'nogo palhike: “An nen, Hit set walogoin, ìlùk abok yogohisasigi a'nogo, set walogoin motok lek o,” ìlùk yogoisasike atì sanì nogo. Atì re, it apùnì Ala ane hologo higit hogo hagatì'lek heraksìkì lagaukwa mene amanogo akìgì.

¹⁹ It atì inetaùken Ala oba hìpìrethìgì'lek hagatì lagaukwa atì nen, set wala kusak motok mea agaike, ìlùk nit yogotak hùthìkì lago o.