IBERANI 2 - Ala Ane Wene Ket Mene Warogo Wo'ninapike Wene

“Ninebe telninapike wene atì, esin motok,” ìlùk yogoisasukwa wene

¹ Atì nenat, apùnì i so ba laganem i nen wogisek lagarek atì hak, nit ebe wene atì heraksamo wele'ma wo'nisek lanogo ìlùk, wene ninasuk holhugu mene atì ning hogo hesogo logouok o.

² Wene atì, nit ninapu ninopalak yogoisoagalùk, Ala nen it malaikat inayoko hìlìk laksa wagaikomo yogoisasukwa mene eberogoat haga'lagaike. Nen, it aike wene atì hologo higit hogo hagatì'lek mene, inebe lopok ùkùm higit hogoat inoba hìlìk weagarinapì lagaike atì.

³ Atì hak, nit yogotak telninabusak hùko wene atì ninobaken nene heraksogoin halok, weaga'ninabiginat o. Emakum he, wene at ninoe Etagepogot ebe nenat apùnì aike yogoisasikomo inasuk holhukwa mene nen sekek hogo yogonisasukwa mene eberogoat haga'lagaike.

⁴ Wene atì yogoisìlìk nikenem he, it apùnì aike nen, “Wene atì eberogoat,” ìlùk hùthoagalùk, Ala nen inane legerogo yì mene tì mene hagasusak lek mene elalin omamerogo hagatìk, at a'la walok meneat higit hogo inoabùt lopok Areagùn sùpùrogo wogisìgìk, isike mene atì, nit en ninobaken nene heraksogoin halok he, herakhinegein akegep a? Weaga'ninabiginat o.

Yesùt ebe apùnì telninabigìlùk, kwe wanhùkwe agaike wene

⁵ Nit en, “Hobuk kweang ket mene ba logogun,” ìlùk ìkì lago atì logolìk, Ala nen it malaikat mene inane hologo logouagalùk kain menhisasike hùk. Lek o.

⁶ Wene apùnì hesik Ala ane ba ap aike nen helal yì'nogo wanhikomo werek: “Egi! Ala nopase. Nit ninebe apùnì mene ta'lagagu meneat, hat en ninoba eberek welagìk, helokoma hinìgìk, egetek atì nìkì'nogo nen.

⁷ Ineki hamùlùgat oba elama hesik it malaikat mene inetagewerek esin hake werek kolek, nit ninetage lek mea negen hagarogo hinasigin meneat he,

⁸ yì mene tì mene obogat nit ninane hologo logolìk, hogo'ninapìk, agauge'ninapìk, ìkì logouagalùk menhinasigin atì,” ìlùk helal waganogo hesukwa. Yì mene tì mene aike pelakhìgì'lek obogat nit ninane hologo logouagalùk isike meneat he, yogotak yì mene tì mene obogat ninane holhì'lek oan werek hìkì lago.

⁹ Meneat he, at Yesùt enek he, arat kain menhesikomo werek hìkì lago. Ala oabùt hano nen, Yesùt apùnì obogat hesik wa'lasuagalùk malaikat inetagewerek esin negen werek kolek, at etage lek mea negen hagarogo hesikomo, ebe yì aik tì aik hìlìk hìlìk wa'lagaike atì ba, Ala nen at etagewerek kain menhesikomo werek atì.

¹⁰ At Ala atì re, yì mene tì mene at okawerek hesik, okawerek enat elalhike mene nen, apùnì at againapùrì logolegat hogorinapì logogunmo wogisek loagalùk, kwe wanhùkwe Yesùt at o. At enat apùnì elok telinabìk wogisek laga logouagalùk yì aik tì aik hìlìk hìlìk wa'lasuagalùk akasike atì re, elok akasak meneat higit hogo akasike.

¹¹ Yesùt ebe, nit apùnì weak hagatorek mene ho'ninapùkwe mene atì ho, nit apùnì ho'ninaperek mene ho, ninom lapuk hogo re, ninopase omakeat. Atì nen he, at Yesùt ekalì legat, “It apùnì atì an nerùgì nagaiya'lak,” ìlùk ikerek atì.

¹² At en Ala yogotì logolìk: “An nen hat hebe nerùgì nagaiya'lak yakùlisìgìk, hagainapùrì atogotarek mene amanogo ina'la logolìk, hogothapìk, ìkì logogin o,” ìlùk yogosikesik,

¹³ aike inom ap aike yogotì logolìk he: “An netaùken Ala oba hìpìrethìlìk logogin o,” ìlùk yogosikesik he: “Ala nen nagainapùrì wo'nesike mene amanogo ninom welago yì han,” ìlùk yogosike.

¹⁴ At en he, “Apùnì atì an nagainapùrì,” ìlùk isike atì re, nit apùnì wa'lagorek mene hesik isike atì nen he, at ebe wa'laga logolìk, nit apùnì wa'lagorek mene ero at Ibilit eki ba welagarek mene atì, at Yesùt en at Ibilit ebe mabenetsìgìk,

¹⁵ nit apùnì ninebe ta'lagoresik nineluk logolìk, wa'lasusak ninayùk en nineki hele warek negen welagagu mene hikalogo hinìgìk, igìlùk, nit wa'lagorek mene ninoabùt waganogo wa'lagaike atì.

¹⁶ Atì'nogo hagasike atì re, eberogoat malaikat mene elokoma hisìlìk etawìrinapike hùk. Lek o. Ala ane ba helal waganek werek higit hogoat, nit ap Aberaham en tagokwe mene yì elokoma hinìlìk, ninebe etawì'ninapike atì.

¹⁷ Atì'nogo hagasike atì re, yì'nogo ìlùk. Nit apùnì weak hagatorek mene, at en legetsagalùk, at ebe Ala esewerek kain logolìk, oabùt Ala hesik hùpùn hogo hagatìk, nit apùnì etawì'ninapìk, elogat ìkì logoigìlùk, at ebe nit apùnì erùgì agaiya'lak hakeat arìk, nit hagatorek mene obogat ninoabùt wanusak meneat wanhike atì.

¹⁸ Atì'nogo wanhikomo re, at weak hagasuagalùk a'la kagalhenem, yì aik tì aik arat hasikesi'mo nogo nen he, nit apùnì weak hagasuagalùk nina'la kagaligìlùk waganem, at en elogat lebe'nisasak werek o.