IBERANI 12 - Ala Ane Wene Ket Mene Warogo Wo'ninapike Wene

Inetaùken Ala oba hìpìrethìlìk inepe morogo logouagalùk inasuk wasukwa wene

¹ It apùnì alep hagarìk wagaukwa mene inabok ìlìk wago atì, inebe esa logolek ninera'lukwe yìlìng-walìng ineileken la'nisek werek atì nen he, sa awewerek sa awewerek lùogolùk yì mene tì mene inoba ekin mene korogo hùlùk lagaikarek atì hak, nit ninoba ekin yìlùk-malùk welagarek mene atì mel, ninoabùt weak hagatorek mene ninoba te'meksek motok welagarek mene atì mel, obogat korogo heraksalùk, Ala nen, “Hùlì tì hùlì lano,” ìlùk yogonisasike atì, nina'la nen he, “Ninelokoma pìkìt hùlì atì baat lùok,” ìlùk, ninomamerogo laga logouok o.

² Atì'nogo laga logolìk, emakum ninetaùken Yesùt oba hìpìrethouagalùk, at enat nina'la kagalhìk, hùlì elùgù oba hano katok hogo motok asi loagalùk, at enat se'nisek welagìk, ikerek atì nen he, arat nit nineileken nen wolok musok laga logouok o. At a'la nen he, “Inekalì warogo inebe e ba menhisìlìk inoatarek atì hak, an atì'nogo noasu nekalì,” ìlùk akìgì'lek, we, “An hobuk na'la hai hakegein,” ìlùk at ebe wato kolek epe morogo wa'lagaikesik en, hobuk eluk agaikesik yogotak Ala kain welagarek oba atoma era'lu kainat werek.

³ Hit hina'la pùk arìk hinomame lek asinogo ìlùk, it apùnì weak hagatarek mene nen at Yesùt ina'la nen meathìlìk, ebe weagathiko kolek halolotsìlìk epe morogo welagaike atì, hit en he, “At nìkì'nogo hagasike nogo,” ìlùk hina'la nen hùthìkì logoino o.

⁴ Hit enek he, weak hagasu hinabìt en, weim inomamerogo yaparek atì hak hagatenem, hinamep wulagasogo hinoatì'lek mene welagep o.

^5-6 Inopaselak en inagainapùrì inasuk watarek atì hak, hit Ala againapùrì mene, at an hinasuk watarek wene atì lì'mathegeaip welagep a? At en ìkì logolìk: “Apùnì an netaùken hutik mene hùgì inebe lopok inasuk watìk, it an nagainapùrì mene ìlùk, pak hogo ìgìrek mene hùgì inebe lopok tùgì inoatìk, ìgìrek atì nen he, naput e. Hat en he, nopase Etagepogot Ala nen nasuk wate, ìlùk ha'la nen seramethìlìk heraksagùn o. An nen, Weak hagaten, ìlùk yogohetì halok, ha'la pùk agì'lek logoino,” ìlùk isikomo helal waganogo hesukwa.

⁷ It yekerùgì inopaselak en inasuk watì'lek aike welagaikarek nogo? Inasuk watarek enek atì nen he, Ala nen hinasuk watenem he, hit en he, “Nit at againapùrì welago atì nen ninasuk wate,” ìlùk hinepe morogo logoino o.

⁸ Yekerùgì inebe obogat inasuk watarek enek atì hak, hit aike hinasuk watì'lek halok he, hit at againapùrì ebe mene hùk o. We, yùgùnat en tago mene o.

⁹ Nen, nit ninopaselak ninebe ta'ninapukwa mene nen ninasuk watenem, inane hologo agauk hogo hagarinaporek atì hak, nineluk logouagalùk ninopase nen nina'la ket ta'ninabì'logo mene ane hologo agauk hogo hagasusak lek nogo? At ane hologo hagasusagat o.

¹⁰ It en he, “Hano hagasusak mene yì hìgì,” ìlùk elama hesik we hamùlùgat inasuk watarek meneat he, ninopase Ala nek he, at weak hagatì'lek tegelek welagarek atì hak, nit ninom atì'nogoat tegelek logouagalùk ninasuk waterek.

¹¹ Ninasuk wato kolek atemat nina'la hano agarek lek. We, nina'la weak agarek meneat he, hobuk ninasuk watarek atì ba, ninasuk warek welagorek mene hùgì, yì mene tì mene eken ìterek atì hak, ninoabùt hano lìoksek logolìk higit hogo nek hagatì logogun atì.

Ina'la eberek logolìk hagatì logouagalùk yogoisasukwa wene

¹² Atì nen he, hineki omama lek mene omamethìgìk, hineitep abolok ìlì'logo mene hapuguthìgìk, ino o.

¹³ Atì'nogo hanothìlìk, hinesok abel etenek mene hobuk hinomaken hùnetì'lek hano asuagalùk, kwe higit hogo yagasogo laga logoino o.

¹⁴ Hit hinebe tegelogo Ala mene hisìgì'lek logogun halok he, at ebe hineileken hogoin motok lek atì nen he, apùnì obogat hinom hano lapuk hogo logolìk, hinebe at hesik hisìlìk weak hagatì'lek hano tegelek motok logouogolùk hinomamerogo hagatì logoino o.

¹⁵ Apùnì hit mene aike Ala oabùt hano nen wo'nisikerek mene atì heraksalùk wùlùpenem he, alealeka hulelek were'ma, hano mene oba arìk alethikerek atì hak, at atì nen apùnì obogat weagarinabinogo ìlùk hineileken hanorogo logoino o.

¹⁶ At Esau sùpùrùk nele nen, mel isike: “Makusa tago re, an atma, an ese asigin mene atì esin he, lek. Nagot ese asuak,” ìlùk sùpùrùk eka omakeat earek mene hesik, agot oba oko wanhike atì hak, hit aike pailak haksìgìk, ebe mene esinethìgì'lek hina'la seram hagatìk, ìkì logogùp o.

¹⁷ At Esau hagasike atì, hit hinelu o. At a'la nen he, “Apùnì nen it aike mokareke wogisagarek atì hak, nopase nen yogonetì logolìk, Ala nen hanothapì logouak, ìlùk yogonesuak,” ìlùk hobuk yogosuagalùk le aga logolìk kìno yogosike meneat he, agot arat yogosikesi'mo nogo nen he, hobuk oak waganogo yogosusak mea agaike atì.

¹⁸ Nerùgì nagaiya'lak. Alep it apùnì Isirael mene tom Sinai ineki elok hakasak mene ba wagaukwa atì hak, hit tom atì hake mene ba wagì'lek. Tom Sinai atì ba ebe yì'nogo hagatenem wagaukwa. Etu amulok lagagìk, o hi'mak ìlìk mùm agìk, sogoi aninirogo hunha wagìk,

^19-20 ane pìkon hùko menu ane hake ìgìk, ikenem Ala ane hùkorogo ìkì logolìk, wene yì'nogo isike: “Apùnì mel, wam mel, tom yì ineki hakha wago halok he, inebe helep oba pìkì motok inoa'no o,” ìlùk inasuk watenem holhukwasik, inasuk hologo logousak mea agaikomo, it en he, “At ane atì hobuk aike inom yogonisaaak lek o,” ìlùk inane ning hogo isukwa.

²¹ Motok inayùk mene ineileken hasukwasik inane ning hogo atì'nogo Musa yogosukwama re, at en he, mel yogoisasike: “An hogo re, nayùk en noagelekwe abolok ikeat o,” ìlùk yogoisasike.

²² It atì hake mene ba wagaukwa meneat, hit enek he, tom Sion Ala eluk welagarek mene awì sili o kota Yerusalem pogot oba mene ba wagep atì. Atoma re, malaikat esa yì logolek tì logolek mel,

²³ Ala againapùrì makusa mene inetage pogot oba helal waganek werek mene atogorek ina'la hai hakiko mel, it apùnì hano hagatì lagaukwama Ala nen katok hogo hanorinapike mene inareagùn mel, Ala ebe, apùnì obogat ùkùm inoba hìgìk, kotìk, ikerek mene a'nogo mel, inom were'ma oba wagep o.

²⁴ Yogotak Ala nen nit ninom hùnesuogolùk wene ket mene warogo wo'ninapikesik, Yesùt ebe wo'nisasikomo hùlìsanem werek atì inom were'ma wagep o. Atì re, Habel oe nen wasikomo amep wene weak mene haga'lagaike mene atì oba wagep hùk. We, Yesùt ebe wasukwama amep oba hesagathìgìk warogo hano wene haga'lagaike mene oba wagep o.

²⁵ It apùnì Ala ane kweangma yogoisikenem inasuk holusak inabìt welagaukwa mene, inebe ineluk herakìgì'lek inoatì lagaike atì. Halok he, nit yìrogo re, wene pogot oba nen yogonisikenem ninasuk holusak ninabìt logogun halok he, ninoatì'lek herakhinegein akegep a? Lek o. Motok ninoasigin atì nen he, at ane iko kolek hinasuk holhì'lek, “Ninabìt,” ìlùk heraksanogo ìlùk, hinepe hebelogo logoino o.

²⁶ Atì sat, at Ala ane isike atì ba kweang abologothesike meneat he, yogotak, at en he, “An hobuk tì'nogo hagasigin,” ìlùk abok isike mene helal yìnogo waganek werek: “An hobuk omake hesik kweang yì nek abologothegein hùk. Lek o. Pogot inomat abologothegein o,” ìlùk isikomo helal waganek werek.

²⁷ Atì'nogo “Omake hesik abologothegein,” ìlùk isike atì re, abolok usak lek ningsek mene logouagalùk herakhìlìk he, kweang, pogot at en elalhike mene obogat abologotheigìlùk isike atì.

^28-29 Atì'nogo abologothegein meneat he, nit enek he, Ala awe a'ma hinikere'ma abolok igin motok lek mene wo'nisasikomo ese agosik welago atì nen he, “Ala nopase,” ìlùk hai watì lo gouok o. Nen, at Ala ebe re, etu nen yì mene tì mene nikerek atì hagatma, nit atì'nogo weaga'ninabinogo ìlùk, at ebe ninayùk hogo hagatìk, agauk hogo hagatìk, ìkì logolìk, at ane hologo a'la walok mene hagatì logolìk, hogoratì logouok o.