IBERANI 11 - Ala Ane Wene Ket Mene Warogo Wo'ninapike Wene

Alep apùnì aike inetaùken Ala oba hìpìrìk logolìk, hagatì lagaukwa wene

¹ Inetaùken Ala oba hìpìrìk welagaikarek atì ebe re, yì'nogo. “Hano asigin,” ìlùk eberogoat akìgìk, “Yì mene tì mene nineileken hìgì'lek meneat he, eberogoat weregat o,” ìlùk hùthìgìk, egarek atìat o.

² It apùnì alebat inetaùken atì'nogo Ala oba hìpìrìk welagaukwa atì ba, Ala nen, “It hano,” ìlùk inebe oba lìoksek welagaike.

³ Ala ane ba nen pogot kweang yì mene tì mene obogat nineileken hìkì lago yoma re, nit en he, “Nineileken hogorek lek mene ba elalhikomo werek,” ìlùk, ninetaùken at oba hìpìrethìlìk hùthasak o.

⁴ At ap etage Kain nen, we mene Ala wogosike meneat he, at Habel atì nek he, etaùken Ala oba hìpìrethìlìk hano mene Ala wogosikomo, at en he, “Habel enek he, oabùt higit hano hìgì,” ìlùk isike. Atì'nogo isikesi'mo nen, at Habel ebe wa'lagaike meneat he, etaùken Ala oba hìpìrìk logolìk hagasike atì, at en, “An tì'nogo hagatì,” ìlùk yogonisiko negen motok werek o.

⁵ At ap Henok etaùken Ala oba hìpìrìk welagaike atì ba, ebe wa'lagì'lek. We, Ala nen elugat wanhikomo, it apùnì aike nen ebe herasukwa meneat he, ineileken hìgì'lek. At ebe atì'nogo oan wanhì'lek werek kolek, “At Henok Ala a'la hanorogo nek hagatì lagaike,” ìlùk isukwama Ala ane ba helal waganek werek.

⁶ Apùnì inetaùken Ala oba hìpìrethìgì'lek halok he, at a'la hanorogo hagasusak motok mea o. Nen, at oba wesuogolùk halok, it en he, “Ala eberogoat werek,” ìlùk akìgìk, “At ebe inelu asuogolùk hagasugun halok, at en oko ebe mene wogisikeregat,” ìlùk akìgìk, usak atì.

⁷ At ap Nu hogo re, etaùken Ala oba hìpìrethìlìk, yì wene tì wene hobuk haga'lasigin mene Ala nen hùsipi yogosikomo ebe eileken hìgì'lek meneat he, “Eberogoat haga'lasigin mene yogonete hìgì,” ìlùk Ala ane hologo logolìk, i so aike at againapùrì inom telinabusak hesik wùsike. Atì'nogo wùsikomo, Ala nen apùnì ùkùm inoba hìlìk inebe inoasike meneat he, at Nu aligat enek he, etaùken Ala oba hìpìrethesike atì ba, Ala nen, “At hano,” ìlùk telhike.

⁸ At Aberaham hogo re, Ala nen ayoko hìlìk, “Hat o aike ese logoinogolùk wokhesik en he, lano,” ìlùk abok yogosikomo, at en he, “Wene atì eberogoat,” ìlùk etaùken Ala oba hìpìrethìlìk o koma legein heat okot logolìgat wagaike.

^9-10 Wagaikesik, o abok yogosike mene atì arat wagaikesik logolìgat he, “O yì lek o. O hunigat aike Ala nen ìlìreke walhìlìk ningsek mene ba wùsike mene aike werek o,” ìlùk serogo motok logolìk, o su mene ya wùrogo nogo ìgìk, ta wùrogo nogo ìgìk, ap pok negen nìkì lagaike. Atì hagat, ap Isak mel, Yakùp mel, ina'la nen he, “Ala nen, Tì'nogo wokhisegein, ìlùk abok isike atì, nit ninomat yogonisasikomo ese asugun,” ìlùk atì'nogoat nìkì lagaukwa.

¹¹ Nen, at Aberaham ebe yaman agaikesik agwe Sara abìlì welagaike meneat he, at Aberaham a'la nen he, “Ala nen abok yogonisasike a'nogo eberogoat wo'nisegeinat o,” ìlùk etaùken Ala oba hìpìrethìlìk welagaike atì ba, aput Sara eak takasak elok agaikomo, takasike.

¹² Atì'nogo takasike atì nen, agùn Aberaham ebe yaman agaikesik wa'lasusak negen welagaike meneat he, at ebe omakeat mene nen tagokwe mene inebe hesagal pogot oba apik welagarek atì hak mel, i al i laut yekelek esakokwe welagarek atì hak mel, apik ineki wenasusak motok mea wìalagaukwa atì.

¹³ It apùnì inetage ìlìk waga lagì atì obogat en, “At Ala eberogoat,” ìlùk inetaùken at oba hìpìrethìlìk welagaukwa atì ba, Ala nen abok yogoisasike atì ebe wanhì'lek meneat he, apùnì nen yì mene tì mene walegat were'ma ineileken lakhìlìk, ina'la hai hakagarek atì hak, it inetaùken oba nen, “Eberogoat wanugun mene werek o, ìlùk akìkì lago atì nen, kweangma yoma it aikeagùn inauakwe pùgùlogo lìlìk ap pok negen welago,” ìlùk pak hogo ìkì logolìk inebe wa'larìk lagaukwa.

¹⁴ Atì'nogo ìkì lagaukwa atì ba, nit nina'la nen he, “It inawì ebe hano mene heratì lagaukwa,” ìlùk enagat hìkì lago atì.

¹⁵ It inawì alep welagaukwa ba heraksalùk wùlùpukwa ba atoma hesik oba ebetì logoilepma re, inapotkwe elok we'lep atì nen he, o it welagaukwa ba atì hesik oba ebetì lagaukwa lek o.

¹⁶ We, it ebetì lagaukwa atì re, inawì ebe hano motok pogot oba mene hesik walok akìkì lagaukwa ati nen he, Ala nen it hesik inawì arat tegelogo hisasikesi'mo nogo nen, at en he, “An it inopase,” ìlùk, ekalì legat ikerek atì.

^17-19 Alebat Ala nen Aberaham yogotì logolìk, “Hat en tagokwe mene wìalasugun ìlùk yogohesigi a'nogo ebe re, haput Isak yì nen tagokwe mene nen wìalasugun mene hesik yogohesigi o,” ìlùk, yogosike meneat he, hobuk oabùt paligìlùk, “Haput ebe yì an hesik wa'nom,” ìlùk yogosike. “Wa'nom,” ìlùk yogosikomo, at Aberaham etaùken Ala oba hìpìrethìlìk welagaike atì ba, “Isak wa'lasumo Ala nen hobuk elok elugurasigin,” ìlùk ebe warogo Ala wogosigìlùk isike atì nen he, inane lagak hogo re, Isak warek mene eluk agama Aberaham wanhe ìlùk usagat o.

²⁰ Nen, at lsak atì re, etaùken Ala oba hìpìrethìlìk welagaike atì ba, againapùrì Yakùp mel, Esau mel, yogoisìkì logolìk, apùnì nen it aike mokareke inoba hagarek atì hak, “Hobuk Ala nen hanothinapì logouak o,” ìlùk yogoisasike.

²¹ At Yakùp etaùken Ala oba hìpìrethìlìk welagaike atì ba, wa'lasigìlùk ìkì logolìk, ebe arìge lùk elùgùn oba hìpìrethìlìk Ala hai watì logolìk, apùnì nen it aike mokareke inoba hagarek atì hak, ap inebe pìre Yùsùp againapùrì yogoisìkì logolìk, “Ala nen hanothinapì logouak o,” ìlùk yogoisasikeat.

²² At Yùsùp hogo re, etaùken Ala oba hìpìrethìlìk welagaike atì ba, ebe horogat wa'lasigìlùk ìkì logolìk, againapùrì Isirael mene o Mesit en wùlùbugun mene hesik yogoisìgìk, nen, “An noak kilelek tì'nogo haga'no,” ìlùk yogoisìgìk, isike.

²³ At Musa hogo re, opase agosa inetaùken Ala oba hìpìrethìlìk welagaukwa atì ba, Musa ebe tasukwasik hìthasukwa re, elege ebe hano motok en, at ap kain atoma mene nen wene wulapike mene inayù'legat elege tago atì hinakhìlìk werek kolek he, tùgì hìnagan holelhike.

²⁴ Nen, at Musa atì ebe arat elege agaikesik en, etaùken Ala oba hìpìrethìlìk, mel akasike: “An ap kain Piraùn a'logo eak hake logousak he, motok nabìt o.

²⁵ An nebe hano logolìk, we elama hesik meneat he, akiluk hogo weak hagatì logousak atì nabìt. We, it Ala againapùrì ninom yì aik tì aik haga'ninapì logousak hano o,” ìlùk, a'la akasikesik he,

²⁶ “Hobuk Ala nen oko wo'nesigin mene werek o,” ìlùk akasikesik he, “Yì mene tì mene hano mene apùnì o Mesit inekimo mene yì esin lek o,” ìlùk, heraksalùk he, “Karìsùt hesik nineba horothinìkì logousak atìat esin a,” ìlùk akasike.

²⁷ Atì'nogo akìlìk wùlìpikesik he, etaùken Ala oba hìpìrethìlìk, “Ap kain Piraùn atì a'mage lagousak atì nayùk e,” ìlùk a'la akìgì'legat, Ala ebe nineileken hogorek lek mene atì eileken hìkì logolìk negen, “Netaùken at oba lakhìgìrì'mo re, wùlìbiginat o,” ìlùk o Mesit heraksalùk wùlìbi wagaike atì.

²⁸ Wùlìbi wagaikesik, etaùken atì'nogoat Ala oba hìpìrìk logolìk, at malaikat aike apùnì inebe inoaterek mene nen, apùnì o Mesit mene inagainapùrì makusa tago mene inoatì logolìk, apùnì Isirael mene inoasinogo ìlùk he, wam topa warogo etage paskah nìkì logolìk, amep o kwe bakwe lopok warìk loagalùk yogoisasike.

²⁹ Apùnì Isirael mene inetaùken atì'nogoat Ala ba hìpìrìk logolìk, apùnì kweang welelek obakwe lagaikarek atì hak, i yekelek etage Mera atì healekkwe wùlìbi wagaukwa atì. Atì'nogo wùlìbi wagaukwama, it apùnì Mesit mene nen, “Nit arì'nogoat wùlùbuok o,” ìlùk isukwasik wùlìbi waganem, i nen sebelinapike atì.

³⁰ It apùnì Isirael mene inetaùken Ala oba atì'nogo hìpìrìk logolìk, o Yeriko sili ineki 6 hari nen walìngìthìkì lagaukwasik, aike nen walìngìthikenem he, leget pa'leget wùrìk mene mesa'lapuk isike.

³¹ Atì'nogo mesa'lapuk ikenem, at he Arahap yanani nìkì lagaike mene atì hogo re, etaùken Ala oba hìpìrethìlìk, it ap Isirael mene ineil wani wagaukwa mene inebe hano woginapike atì nen he, it apùnì aike Ala ane wanusak inabìt mene inebe motok inoatì logolìk, at he atì nek he, watì'lek hebesukwa atì.

³² An nen ap Kileon mel, Parak mel, Simson mel, Yepta mel, Taùt mel, Samuel mel, it ap Ala ane yogoisìkì lagaukwa mene mel, inetaùken Ala oba hìpìrìk logolìk hagatì lagaukwa mene pìlìngìrogo yogohisasak meneat he, o al horok agasi'mo re, mea o.

³³ It atì obogat inetaùken Ala oba hìpìrìk welagaukwa atì ba, it o aike inom weim yapì logolìk, inogogì kaintek inetagepogot mene mabenetsìlìk inawì sebelhì lagaukwa. Inoabùt higit hogo hagatì lagaukwama, Ala nen he, “Hit hobuk hano mene wokhisegein,” ìlùk abok yogoisasike mene atì, ebe wanhì lagaukwaat. Lo yeke hake singa oabùt weak mene atì ape labetìk,

³⁴ etu amulok inayùk hake mene nogologo hìgìk, karok oba inoasusak mene inokawerek en inebe telìgìk, inomame lek meneat he, inomame agìk, weim yapì logolìk inomame arìk he, selei mene esa logolegat mùgisìgìk,

³⁵ it hìmì aike ineagwì warek mene hobuk inelugurinapenem woginapìk, hagarìk waga lagaukwa. Atì'nogo hagarìk wago kolek, it aike re, inebe hobuk hano logogun mene Ala nen inelugurinabuak en, apùnì aike nen inebe wiik-weak hogo hagarinapo kolek, inogat elele helìgì'lek welagaukwa.

³⁶ Nen, aike re, apùnì inane lì'nù tìng-taung hogo yogoisìgìk, tùgì inoatìk, ineki hele warogo kelaksìgìk,

³⁷ helep oba tamulogo pìkì inoatìk, kiik oba inoake tegethìgìk, karok oba inoatìk, yì aik tì aik hìkì logolìk, su re, wam topa mel, kambing mel, ogat nokologo ìtìk, yì mene tì mene lek en inelageigat welagìk, it apùnì aike nen wiik-weak hogo hagarinapìk, ìkì lagaukwa.

³⁸ It atì obogat inoabùt hano atì'nogo hagatì lagaukwa atì nen, apùnì inom kweangma yoma logousak he, mea o. It atì inawì wùrìk hake le'ma re, pùgùlogo o leimo apùnì le'ma mel, tom obakwe mel, nìkì logolìk, omoulakwe mel, kweang ako holelekkwe mel, welagaukwa.

^39-40 Ala nen, “Hanothinabigin,” ìlùk abok yogonisasike mene atì, it inebe obogat atì ebe wanhì'lek meneat he, inetaùken Ala ba hìpìrìk logolìk hano hagarìk waga lagaukwa atì nen, at Ala nen, “It hano,” ìlùk inebe oba lìok isike. Atì'nogo ebe wanhì'lek atì re, Ala nen holoat nit hesik hano mene wenago hinìkì logolìk, nit lek werek kolek it inaligat he, hano katok hogo hagarinapì'lek. We, nit hesik, “It inom apìnene katok hogo hagarinabigin,” ìlùk abok isikesi'mo nogo nen he, it en ebe wanhì'lek welagaukwa atì.