IBERANI 10 - Ala Ane Wene Ket Mene Warogo Wo'ninapike Wene

¹ It apùnì Yahuri mene wene Ala nen ninasuk wasike wene atì higit hogo hagatì logolìk, ebe mene hagatì lagaukwa hùk. We, ebe hobuk hano'ninabigin mene werek kolek, oba lìrogo hagatìk, alìk waganogo hagatìk, ìkì lagaukwa. It atì'nogo hagatì logolìk, o mo lagagìk, pìgìk, iko kolek, yì tahun tì tahun wam Ala waretì lagaukwa mene atì mene nek wareto motok welagaukwa atì nen he, it apùnì wam Ala waresi waga lagaukwa mene hùgì atì ba nen katok hogo hanorinabusak mea aga lagaike atì.

² It katok hogo horinabilepma re, “Nit weak hagato,” ìlùk ina'la ekin logolìk, wenesùgì ebetì lagaukwa mene atì, lek arìk he, inako warogo Ala wogosi waga logoilep lek o.

^3-4 Apùnì weak hagatarek mene atì wam sapi mel, kambing mel, amep oba horinabusak mea atì nen he, ninhùkwe-nanhùkwe wam warogo Ala wogotì lagaukwa atì ba, apùnì weak hagatì lagaukwa mene ina'la eberisìkì lagaike atì.

⁵ Atì'nogo hagatì lagaukwa atì nen, at Karìsùt kweangma pi waga logolìk, Ala mel yogosike: “Hat he, apùnì nen wam wathetìk, yì mene tì mene wokhetìk, egarek atì mene wokhetì logousak he, habìt atì nen he, an nebe apùnì hake hagarogo hanhigin yì o.

⁶ Hat hesik wam warogo etu lolhetarek atì mel, weak hagatarek mene horinabinogolùk wam warogo wokhetarek atì mel, habìrat o.

⁷ Atì nen he, Ala nopase. An nen wene yogohesik. Hat hane ba re, wene an nen yogohesu hak, An nen hat ha'la walok mene hagasigìlùk wesigin, ìlùk wene an hesik helal waganogo hesukwama werek atì, ebe hagasigìlùk nebe wagarìk welagì yì o,” ìlùk yogosike.

⁸ At Karìsùt en wene alebagìk yogosike atì re, “Apùnì nen hat wam wathetìk, yì mene tì mene wokhetìk, etumo lolhetìk, weak hagatarek mene horinabinogolùk wam wathetìk, egarek atì, hat habìrat o,” isike atì, Ala nen ninasuk wasike wene atì higit hogo hagatì lagaukwa mene hesik isike.

⁹ Wene atì'nogo arat yogosikesik hobuk mel yogosike: “Ala nopase. An nen hat ha'la walok mene atìat hagasigìlùk nebe wagarìk welagì o,” ìlùk yogosike. Atì'nogo yogosike atì re, Ala nen it alep hagatì lagaukwa wene atì legetsìlìk, hobuk Karìsùt wa'lasigin atìat logouak isike atì nen atì'nogo yogosike.

¹⁰ Nen, at Yesùt Karìsùt Ala a'la walok mene atì hagatì logolìk, at ebe omake hesik wa'laga logolìk, Ala wogosike atì ba, nit ninebe Ala hesik motok hisikomo welago.

¹¹ It ap Ala esewerek inebe lopok en apùnì hesik hagatì logolìk he, ninhùkwe-nanhùkwe hobugalep wam waretì lagaukwa mene atì mene nek warogo Ala wogotì lagaukwa atì nen, Ala nen it weak hagatì lagaukwa mene korogo wokhasak he, motok mea agaike atì o.

¹² Atì'nogo meneat he, at Karìsùt enek he, nit apùnì nen weak hagatorek mene hesik eki omake hesik wa'laga logolìk, ebe moto'-motok Ala wogosikesik, era'lu asi lagaikesik kain werek atì.

¹³ Atì'nogo logolìk he, at aselei mene Ala nen awe a'ma atogorogo hisa waganem esok en al lebelinabigin atì nek oan nen, serogo werek o.

¹⁴ At Karìsùt omake hesik wa'laga logolìk, ebe Ala wogosike atì ba, nit apùnì ninebe Ala hesik hisikerek mene hùgì katok hogo motok ho'ninapike.

¹⁵ At Ala Areagùn nen, wene atì hesik abok yogonisìkì logolìk, wene alebagìk mel isike:

¹⁶ “At Ala nen, Hobuk, an nen it wene ket mene warogo woginabigin atì re, wene ebe yìat warogo woginabigin: Inasuk watìrek wene atì ina'la hisìgìk, inetaùkenma helal wanhìk, igin o,” ìlùk isikesik he,

¹⁷ “An nen it weak hagatìk, inasuk ware'lek kolo hagatìk, egarek mene atì arat lì'mathìlìk, na'la eberek logogin motok lek o,” ìlùk hobuk isikomo helal waganogo hesukwa atì.

¹⁸ Atì nen he, nit apùnì ninasuk ware'lek ninoabùt weak hagatorek mene, at Ala nen arat sagalogo legetsasike atì nen he, nit weak hagatorek mene ho'ninabuagalùk ninako Ala warogo hobuk hisasak motok lek o.

“Nit ninayùlek hogo Ala oba horok hogo kìkì logousa,” ìlùk yogoisasukwa wene

¹⁹ Nerùgì nagaiya'lak. At Yesùt amep wulagasogo wa'lagaike atì ba, nit Ala okawerek aua atoma ninayù'lek hogoat kuok o.

²⁰ Nit atì'nogo kusak atì re, o hùlù su mene ba hùlì warek atì, at Yesùt ebeat. Ma re, nit apùnì ninelugu'ninabiginmo kuagalùk, kwe at Yesùt ebe wa'lagaike atì ba, kwe ket mene nit hesik yasike.

²¹ Yasikesik, at ebe Ala aua atomaat esewerek nit hesik kain welagarek o.

²² At ebe atoma were'ma, nit nina'la nen he, “Nit weak hagato,” ìlùk nina'la wenesùgì ebetorek mene hano ho'ninapìk, ninogat obakwe i elokoken hano mene ba sobalninapìk, isike atì nen he, ninetaùken omakeat at oba hìpìrethìlìk ninayù'lek hogo, at oba horok hogo kìkì logouok o.

²³ At oabùt he, “Wokhisegein,” ìlùk abok yogonisikeresik, ebe wo'nisikeregat atì, nit en he, “Eberogoat tip hogo wo'nisegein,” ìlùk apùnì ineilhanem ninane pak hogo ogorek mene atì iko motok logolìk, ning hogo hesogo logouok o.

²⁴ Atì'nogo hesogo logolìk, nit-nit netawì-hetawìrogo logolìk, lebet-lebet hagatì logouogolùk, ninetaùken ago wat-wat ìkì logouok o.

²⁵ Ninoe eki welagì'legat wesigin ìlùk ninelu atì nen he, nit atogotenem it aike kamo egarek atì hak, nit kamo ìgì'lek he, oba eberek-eberek nit-nit ninetaùken ago warogo ninasuk wat-wat ìkì logouok o.

²⁶ Ebe wene Ala ane yogonisasukwa mene ninelu logolìgat he, nineram enat wene atì sagalogo heraksìlìk weak motogat hagatì logogun halok he, nit hobuk ninako Ala waresumo ho'ninabigin motok legat o.

²⁷ Ala a'mage lagalìk o elùgùn oba ùkùm inoba hìgìk, kotìk, igin atì ba, at aselei mene hùgì inebe etu aik oba inoatì logolìk, nit at ane heraksìlìk weak hagatì logogun halok, ninomat ninoasinogo ìlùk, nit en hùthìlìk ninayùk hogoat logouok o.

²⁸ Wene Ala nen ninasuk wasikomo, at Musa nen yogonisasike wene atì, it apùnì nen hologo higit hogo hagatì'lek sagalogo heraksiko halok, apùnì inebe pìre a, hinagan a, “Nit nineilhanem it en eberogoat wene atì sagalogo heraksaga o,” ìlùk pak hogo iko halok, inetawìrinapì'lek inebe motok inoatì lagaukwa akìgì.

²⁹ Atì hak, it apùnì nen Ala aput meneat he, inesok en sagalogo heraksìgìk, Ala nen nit ninom hùnesuogolùk Karìsùt wa'lagaike atì ba amep oba hano horinapike meneat he, hobuk ina'la meathìgìk, Ala oabùt hano mene Areagùn a'nogo inane sagan wokhìgìk, iko halok he, ùkùm motok ekin mene inoba hìlìk weagarinabigin o.

³⁰ “Ùkùmmo an nen inoatìk, oko an nen hìgìk, igin o,” ìlùk isike atì, sa nen isike nogo. Ala nenat isike ninelu. Nen, wene aike mel isike: “An inopase noba lopok en nagainapùrì ùkùm inoba hìgìk, kotìk, igin o,” ìlùk isikeat.

³¹ Ùkùm atì'nogo inoba hegein atì, nit weak hagatenem ninebe Ala eluk motok welagarek mene eki ba hinike halok, ninayùk motok asigin atì.

³² Nerùgì nagaiya'lak. Hit alep Ala nen hinebe lìathinapikomo were'ma yì aik tì aik wiik-weak hogo hagathinapo kolek, hinepe morogo ning hogo welagagip atì hina'la ebe'no o.

³³ Atì'nogo logolìk, hit aike apùnì logole'ma hinetage mìù'-meak hogo weak hagathinapenem, hit aike nen, “Nit ninom at weaga'ninabuak,” ìlùk inoba kikenem hinomat weak hagathinapìk,

³⁴ it aike hele warogo kelaksikenem hinetawìrinapìk, ìkì lagagip atì. Atì'nogo hagatì logolìk hina'la nen he, “Nit mene ningsek hano motok logogin mene werek o,” ìlùk akìkì logolìk he, hit mene yì mene tì mene helikenem hina'la weak agì'lek hai hakìkì lagagip atì.

³⁵ Halok he, alep weak hagathinapo kolek hina'la pùk welagagip mene atì kopok hogo heraksìgì'lek, yogotak ya atì'nogoat logogun halok, oko hùko mene wokhisegein atì nen he, ning hogo logoino o.

³⁶ Hit en Ala a'la walok akikerek mene hagatenem, at en, “Hit wokhisegein,” ìlùk abok yogohisasike mene atì wanuageip en he, hinepe morogo hagatì logousak o.

³⁷ Ala ane ba helal yì'nogo waganek werek: “At wesigin atì re, eil omake logopik en wesigin. Aregenma logopik en wesigin lek o. We, heageagat wesigin o.

³⁸ At wesigin atì, oan wagì'lek werek kolek, it an nagainapùrì ùkùm inoba korogo an ninom hùnogo hisìgì mene hùgì inebe lopok, inetaùken noba hìpìrethìlìk logogun oba ineluk logogun. Meneat he, apùnì it mene aike inapotkwe wùlùbugun mene hùgì inebe lopok, it an noba lìoksek lek. We, nabìrat o,” ìlùk isikomo helal waganogo hesukwa.

³⁹ Atì'nogo meneat he, nit he, it apùnì aike alema'lasuogolùk inapotkwe wùlùbugun mene atì hake welago hùk. Lek o. Nit he, ninebe telninabuagalùk ninetaùken at oba hìpìrìk welago mene welago o.