IBERANI 1 - Ala Ane Wene Ket Mene Warogo Wo'ninapike Wene

At Ala nen ane at aput yogosikomo, at en nit yakùlnisasike wene

¹ O holoat, at Ala nen it ap at ane yogoisìkì lagaukwa mene amanogo eki ninhùkwe-nanhùkwe, wene at aike yogotìk, at aike yogotìk, hunik-hunigat yogoisikenem he, it en nit ninapu ninopalak yakùlisìkì lagaukwa.

² Meneat he, o elùgùn oba, nit yogotak welago ya ba re, Ala nen wene atì aput yogosikomo, at en nit yakùlnisa wagaike. Aput atì re, ero ba Ala nen yì mene tì mene obogat elalhike atì, ebe at aput enat elalhikomo, esewerek logouagalùk menhesikomo logogin atì.

³ Mo eileken tilelek-walelek lakhei wagarek hak, Ala ebe hogoratarek mene a'nogo nen, Yesùt ebe lakhei wagaikomo kweangma lìarogo logolìk, opase alìlùmo at hake welagarek. Ati'nogo logolìk, yì mene tì mene obogat welagarek atì, at ane omame ba welagarek. Were'ma, nit weak hagatì lagagu mene horogo legethìlìk he, Ala Etagepogot esin mene a'nogo oba lagasikesik era'lu kainat welagarek atì.

Malaikat mea negen meneat he, Ala aput enek he, esin welagarek wene

⁴ At Ala nen he, it malaikat amanogo inetage a'ma negen werek kolek, at Yesùt enek he, etage hesaksek kain esin logouagalùk salinapike hagat, it malaikat inebe a'ma negen werek kolek, Yesùt ebe hesaksek kain esin welagarek atì.

⁵ Ala nen at yogotì logolìk, “Hat an naput o. Hebe yogotak takhapì,” ìlùk, yogosike atì hak, it malaikat mene aike wene atì'nogo yogoisasike nogo? Lek o. Nen aike re, “An he, at opase asigin. Nen, at he, an naput asuak,” ìlùk it malaikat aike yogoisasike nogo? Legat o.

⁶ Atì nen he, Ala nen aput omakeat tago kweangma yoma pelakhei wagaike atì sat he, it malaikat yì'nogo yogoisasike: “Hit an nagoromì malaikat obogat he, at enek oba hìpìrìk logolìk hogorati logoino o,” ìlùk yogoisasike.

⁷ Nen, aike re, it malaikat hesik mel isike: “An nen it malaikat inebe o sogoi hake hagarogo hisìgìk, it yoko laksìgìrek mene inebe etu amulok hake hagarogo hisìgìk, ìgìrek,” ìlùk isike.

⁸ Meneat he, aput yogotì logolìk: “Hat hebe Ala at logolìk, yì apùnì ti apùnì hagisek motok logogin. Atì'nogo logolìk, wene higit hogo nek halisìkì logogin o.

⁹ Nen, hat hoabùt he, higit hogo nek hagatetek atì mene hagatì logolìk, kolo hagatì logousak hapsìrì atì nen he, hagaiya'lak hinom welagasep mene inawe a'ma negen werek kolek, hat enek he, hùkùl oba amusu kesalogo menhagasigi atì nen he, ha'la hai apik hakìkì logoino,” ìlùk yogosikesik,

¹⁰ wene aike yì'nogo yogosikeat: “Hat Hetagepogorat ma re, ero ba nen he, kweang tik watìk, pogot heki ba elalhìk, isigin atì.

¹¹ Obogat elalhigin mene atì, su hake momok arìk hobuk lek asigin meneat he, hat enek he, hesok motok logogin o.

¹² Kweang pogot atì, su ìkìlogo hagarek atì hak, hat en ìkìlogo hìlìk, hobuk ket mene hegein meneat he, hat hebe nek he, o mo lagagìk, pìgìk, iko kolek, hebe yaman agì'lek hesok motok logogin o,” ìlùk yogosike.

¹³ Atì'nogo yogosikesik, aike mel yogosikeat: “Apùnì hat haselei mene amanogo hesok en al lebelogo hisanok en an nen oan hoba hisa wagì'lek werek kolek, hat an nera'lu neki ebekwe hebe kain logoinok,” ìlùk, it malaikat mene amanogo aike yogosike nogo? Legat o.

¹⁴ Ala agoromì malaikat atì inebe re, nìkì'nogo hagatarek mene nogo. It inebe re, nit Ala nen telninabigin mene hùgì lebe'nisìkì logouagalùk, at en inayoko hìlìk laksa wagarek meneat o.