EPESÙT 6 - Ala Ane Wene Ket Mene Warogo Wo'ninapike Wene

Yekerùgì inagosa inopaselak inom logolìk inoabùt hagatì logousak wene

¹ Hit yekerùgì hinoabùt he, ninoe Etagepogot hinom hutik logolìk, hinagosa hinopaselak, inane hologo hagatì logousak atì nen he, atì'nogoat hagatì logoino o.

² Wene Ala nen ninasuk wasike a'nogo ba, wene alebagìk ninasuk watì logolìk he, “Hit en yì'nogo hagasusak, tì'nogo hagasusak,” ìlùk ìkì logolìk, “Hobuk hanothinabigin,” ìlùk, abok aike inom ìgì'lek. We, “Hinopase hinagosalak agaugerinapì logoino o,” ìlùk, isikesik he,

³ abok mel yogoisasike: “Atì'nogo hagatì logoumo, hinebe hano welagìk, kweangma yoma hineluk aike inom hogo welagìk, logogun o,” ìlùk, yogoisasike atìat o.

⁴ Nen, hit inopaselak en hogo re, yì hake tì hake hinagainapùrì ina'mage lagousak mene hagatùp. At he, ninoe Etagepogot en ninasuk watìk, ninetaùken sebelhìk, ikerek hak, hit en hinagainapùrì atì'nogoat hagarogo inebe kùlinapì logoino o.

Inatitigeke mene inogogi inom en, inoabùt hagatì logousak wene

⁵ Hit apùnì inatitigeke mene nen he, Karìsùt ane hologo hinetaùken omakeat hinayùk hogo logolìk hagatesep hak, hinogogì kaintek inane hologo agauk hogo hagarinapì logoino.

⁶ It en sethisek werek kolek enek apùnì mene ina'la hanorogo hagatì logogùp. We, hina'la nen he, “Karìsùt atìtigeke logolìk, Ala a'la walok akikerek mene atìat hagatì logouok,” ìlùk, hina'la ebethìlìk en hagatì logoino.

⁷ Hina'la nen he, “An apùnì mene nek inawe a'ma welagì hùk. We, ninoe Etagepogot awe a'ma welag'ì,” ìlùk, hina'la akiluk hogo hagatì logoino o.

⁸ Hinoabùt hano hagatì logogun halok, ninoe Etagepogot en, hit inatitigeke mene, hinalepma welagep mene hinomat, hinebe lopok oko wokhisegein o.

⁹ Nen, hit inogogì kaintek en hogo re, hinatitigeke mene hesik he, atì'nogoat hagatì logoino. “Hoasigin,” ìlùk inabisak sagalhì logogùp. Hina'la nen he, “An natitigeke mene ninomat he, ninoe Etagepogot pogot oba werek mene a'nogo nen, nit hesik he, At atì kain. Nen, at atì kepù, ìlùk, ikerek lek. Ninom higit hogoat haga'ninaperek,” ìlùk, hina'la eberek logoino o.

At Ibilit ninom weim yapì logouok en ìlùk yì mene tì mene ninogat labesusak wene

¹⁰ Wùrep oba re, wene yì yogohisak. Ninoe Etagepogot hinom hutik logolìk he, at omame apik a'nogo ba, hinomame haga'larik logoino.

¹¹ At Ibilit oabùt lagaksek mene a'nogo nen weagathinabigìlùk waganem, weim yabuogolùk sìng ìtarek hak, hit hinebe metegat logouogolùk he, at Ala nen yì mene tì mene wo'nisikerek mene atì obogat hinogat laberogo logoino o.

¹² Nit weim negen yapì lago atì re, apùnì mene ninom yapì iago hùk. Lek o. At he, kain mene, inane werek mene, o mùmmo kweangma yoma hagisek welagaikarek mene, mokareke inoabùt weak mene pogot oba hokolek kweangma hokolek were'ma ninom yapì lago.

¹³ Halok he, weak mene nen weagathinabi waganem weim hineil haroweak metegat logopik, arat yabìk metek logouogolùk, sìng ìtarek hak Ala nen yì mene tì mene wo'nisikerek atì mene ì'no.

¹⁴ Hinom yabuageip en ìkìlìk metek logousak he, ebe re, yì: mùl pagaluk isu hak, wene ebe wene atìat ìtìk, hinamik oba labesu hak, Ala a'la walok mene nek hagatarek atì mene ìtìk,

¹⁵ hinesok sepatu isu hak, Ala nen ninebe lapuk hogo hiaikerek ìlùk, hano wene atì wolok lùogolùk, inoabùt, “I o. An legein,” ìlùk egarek atì mene itik, ino.

¹⁶ Tok pìsìngìrisikenem pong hogo loagalùk, e sabelek inekim wolok lagaikarek hak, inetaùken Ala ba hìpìrìk welagaikarek atì mene ninhùp-nanhùbat wolok nìkì logoino. Wolok nikenem, Ibilit oabùt weak mene a'nogo nen etu tok wùrep oba hùnogo pìsìngìthisikenem, hinetaùken Ala ba hìpìrìk logogun atì ba elok nogolhì logousagat o.

¹⁷ Inùkùloa'ma inoasinogo ìlùk, inùkùlasu haro mene salharek hak, Ala nen telninaperek atì meneat wanìk salino. Atì'nogo salìk he, weim yabuogolùk karok inekim wolok lagaikarek hùk, Ala ane, Areagùn nen wo'nisikerek atì mene wolok laga logoino o.

¹⁸ Atì'nogo obogat hagatì logolìk he, Ala nen lebethikoagalùk sapan ìkì logoino. At Areagùn hina'la logolìk hina'la kagaligin hagat, ninhùp-nanhùp sapan Ala ayoko hìgìk, kìno yogotìk, iko motogat logoino. Atì'nogo ìkì logolìk he, hina'la pùk agì'lek, hinoabùt hebelek motok logoino. Atì'nogo logolìk he, Ala againapùrì obogat hesik sapan Ala ayoko hìkì logoinoat o.

¹⁹ Ayoko atì'nogo hìkì logolìk, an nen hano wene Ala a'la hinago welagaike mene atì, at en yakùlneto kolek, nane pak hogo yogoisìkì logoik en he, hit en ayoko hìkì logoinoat o.

²⁰ Wene atì yogoisìkì logouagalùk at Karìsùt en nayoko hìlìk lakhani wagaikomo an wìrìk yogoisìkì lagì atì hesik neki hele warogo hanhama welagì. Atì'nogo logolìk, an nayù'lek hogo hano wene atì yogoisìkì logousak higit hogoat yogoisìkì logoik en, sapan ìkì logoinoat o.

Wene elùgùn warogo hai warinapike wene

²¹ Wene an nebe yoma welagì mene mel, hagatì lagì mene mel, hit hinelùrogo, ninagaiyak Tìkìkùt netawì mene, ninoe Etagepogot hesik etaùken hùpùn hogo hagato welagarek mene a'nogo nen obogat yogohisa wesigin atì.

²² Nit ya logolìk hagatì lago mene hinelu arìk he, hinetaùken sebelogo logouageip ìlùk hinoba lakhei wagì atì.

²³ Ninopase Ala mel, ninoe Etagepogot Yesùt Karìsùt mel, eperak enat, hit nerùgì nagaiya'lak Ala againapùrì obogat hano lapuk hogo hikìgìk, apùnì inetawìrogo welagaikarek mene atì wokhisìgìk, inetaùken at oba hìpìrìk welagaikarek mene atì inomat wokhisìgìk, uak o.

²⁴ Hit ninoe Etagepogot Yesùt Karìsùt kopologo hebìgì'lek, hinetawì motok logogun mene hùgì obogat, Ala oabùt hano a'nogo nen hakhisek logouak o.