EPESÙT 5 - Ala Ane Wene Ket Mene Warogo Wo'ninapike Wene

“Hinebe Ala againapùrì o lìa ba logolìk, hagatì logoino,” ìlùk yogoisasike wene

¹ Hinebe Ala againapùrì at etawi mene welagep atì nen he, at oabùt wanino.

² Apùnì nen yì mene tì mene Ala hesik hisìlìk, ebe warogo etu loletenem, Ala a'la hanorogo apen hano mene lìagatì lagaukwa atì hak, at Karìsùt nit ninebe etawì'ninabìk he, “It hesik an nebe noasuak o,” ìlùk akasike ba ebe wasukwa atì ba Ala a'la hano agaike atì hak, nit-nit netawìhetawìrogo hagatì logouok o.

³ Hinebe Ala againapùrì logolìk hinoabùt hagatì logousak meneat hagatì logousak. Halok he, pailak haksìgìk, inekalì lek weak hagatìk, “Yì mene tì mene an enek wo'ne'lep,” ìlùk ina'la nen akìgìk, egarek atì mene, apùnì aike nen he, “It aike atì'nogo weak hagarì'lùgì,” ìlùkk, hinabok weak sagarasinogo ìlùk, weak aike hagatùp o.

⁴ Pailak haksagarek mene abok ìgìk, wene inetaùken lek egarek mene ìgìk, inekalìma mene hesik asegenabok ìgìk, usak lek mene atì ìgì'legat, Ala at hai watì logoino o.

⁵ It apùnì pailak haksagarek mene mel, inekalì lek weak hagatarek mene mel, “Yì mene tì mene an mene nek logoilep,” ìlùk ina'la nen akìlìk hagatarek atì, tùgì hareken oba hìpìrìk logolìk hagatarek hagat hagatarek halok, Karìsùt Ala eperak inawe a'ma hisikenem welagaikarek oba atoma esewerek asugun motok lek o, ìlùk, hanorogo hina'la akano.

⁶ It apùnì Ala ane higit hogo hagasùhùk mene nen, wene ìgì atì'nogo hagatare'ma, Ala a'mage lagalìk weagarinabigin atì nen he, it aike nen inane we tùlem at ìkì logolìk he, “Weak mene atì'nogo hagasumo hanoat,” ìlùk, lalhinabinogo.

⁷ Halok he, hit it atì hinom lapuk hogo atì mene hagatì logousak lek o.

⁸ Hit alebat he, o mùmmo welagagip meneat he, yogotak ninoe Etagepogot hinom hùnethìlìk, o lìa ba welagep atì nen he, hinoabùt o lìa ba logolìk hagatì logousak meneat higit hogo hagatì logoino o,

⁹ E ero hano mene nen eken hano meneat ìterek hak, apùnì o lìa ba logolìk yì mene tì mene hanorogo higit hogo inetaùken oba nen eberogoat hagatarek atì.

¹⁰ Hina'la nen he, “Ninoabùt nìkì'nogo hagatì logogun oba ninoe Etagepogot oba lìok igin,” ìlùk, hina'la hùthìlìk, hinoabùt atì meneat yakùlino.

¹¹ It o mùmmo logolìk he, hanorinabigin lek mene weak hagarì'lùgì mene atì re, hinom lapuk hogo hagatì logousak lek. At he, atì'nogo hagatenem hukalogo wenagisìkì logoino.

¹² It apùnì aike hinagasogo hagarì'lùgì mene atì inabok ìkì logou re, inekalì asusak atì nen he, inabok ìkì logousak lek.

¹³ Yì mene tì mene hukalogo o lìa ba hikenem, enagat agarek atì.

¹⁴ Atì'nogo lìa ba hikenem enagat arik he, lia agarek atì nen he, mel egarek atì: “Hat nogo ìkì lagen atì, hebe heluk ame o. Nen, warek hake welagen atì, heluk ame o. At Karisùt en lìathabigin o,” ìlùk agarek atì.

¹⁵ Atì nenat, hinoabùt hebelogo hagatì logoino o! Apùnì inetaùken abit mene nen hagatarek hak hagatì'lek, inetaùken kagauksek mene nen hagatarek haùk hagatì logoino o.

¹⁶ Yogotak ya apùnì inebe hùkokwe inoabùt weak hagarì'lùgì atì nen, hit hinoabùt we tùlemat alemarogo hagatì logoinogo ìlùk, hanoasuak hinoabùt hano mene atìat hagatì logoino o.

¹⁷ Hinetaùken abit logousak lek o. We, at ninoe Etagepogot a'la walok akikerek mene atiat ero herakìlìk higit hogo hagatì logoino.

¹⁸ Anggur eken amusu hùkorogo nikenem atì nen hinebe lùgùlùgì palìk weagathinabinogo nen he, nìkì logogùp o. At he, Ala Areagùn atìat hina'la peserogo wanino.

¹⁹ Hit-hit weneane ìkì logolìk, Ala hesik etawì watìk, wùnì watìk, silang ìgìk, egarek mene atì wanìk ìkì logoino. Hinetaùken oba nen etawì watìk, wùnì watìk, ìkì logolìk, ninoe Etagepogot ebe hogoratì logoino.

²⁰ Ninhùp-nanhùbat yì mene tì mene obogat hesik he, ninoe Etagepogot Yesùt Karìsùt etage palogo re, ninopase Ala hai watì logoino o.

Hìmìap waganek mene nen inoabùt hagatì logousak wene

²¹ Ala atì'nogo hai watì logolìk he, Karìsùt agaugeratì logolìk, hit-hit aike nen aike awe a'ma logolìk inane hologo hagatì logoino.

^22-23 Nit Ala againapùrì ninebe Karìsùt ebe hake were'ma, at en telninapikesik he, ebe ninoe kain welagarek hak, hìmì inogogì kaintek he, inagonìat atì nen he, hit hìmì re, ninoe Etagepogot awe a'ma logolìk ane hologo hagatesep atì hagat, hinagonì lopok inawe a'ma logolìk, inane hologo hagatì logoino o.

²⁴ Nen, nit Ala againapùrì Karìsùt awe a'ma logolìk ane hologo hagatorek hak, hit hìmì re, yì hesik tì hesik obogat hagasuogolùk he, hinagonìat inawe a'ma logolìk inane hologo hagatì logoino o.

²⁵ At Karìsùt en nit Ala againapùrì ninebe etawì'ninapikesik he, “It hesik noasuak,” ìlùk akasike ba ebe wasukwama wa'lagaike hak, hit ap he, hinagagwì atì'nogoat hinetawìrogo hagatì logoino o.

^26-27 At Karìsùt en atì'nogo hagasike atì re, nit Ala againapùrì obogat ninebe ninoba ninagapùt lek, ninogat pulongsek lek, hano logou hak, at eilhanem ùkùm ninoba lek, hano motok tegelek logouagalùk, ninebe ima pela'ninapenem, at ane a'nogo ba, sobalogo hinìlìk, at okawerek hesik hakagalùk ebe wa'lagaike atì.

²⁸ Atì hak, hit ap en he, hinokawerek hinebe hinetawì welagasep atì hak, hinagagwì lopok inebe, “An nokawerek nebe hakeat,” ìlùk, hinetawìrogo logoino. Ap he, inagagwì inetawìrogo welagaikarek mene atì, inokawerek inebeat inetawìrogo welagaikarek o.

^29-30 Apùnì aike nen inokawerek inebe inabìt aike welagaikarek nogo? Lek o. Ninokawerek ninapùrùk hano mene nìkìk, ninebe alelìgìk, ogorek hak, at Karìsùt en he, “Ala againapùrì an nokawerek nebe mene neki nesok hake,” ìlùk atì'nogo alelogo ha'nisek welagarek.

³¹ Atì hesik, Ala ane mel isike: “Ati nen he, ap en agosa opase hebisalùk, agwe eperak hano logolìk he, inebe pìre meneat he, omakeat haga'larik logouak o,” ìlùk, isikomo helal waganogo hesukwa atì.

³² Wene isike atì a'la hinago wene esin mene aike werek. Wene atì an na'la nen he, at Karìsùt nit Ala againapùrì ninom hano hutik logousak mene hesik isike akìgì.

³³ Mene re, hit hinebe hesik inomat isike. Hit ap he, hinokawerek hinebe hinetawìrogo welagasep hak, hinagagwì lopok hinetawìrogo welagìk, hit hìmì hinagonì lopok agaugerinapìk, ìkì logoino o.