EPESÙT 3 - Ala Ane Wene Ket Mene Warogo Wo'ninapike Wene

Wene Ala a'la hinago welagaike mene Paùlùt en apùnì etakwe mene yogoisoagalùk ayoko hesike wene

¹ Atì nen he, an Paùlùt hit apùni etakwe mene Karìsùt Yesùt en telhinabuagalùk, at hesik neki hele warogo hanhama welagì.

² Apùnì nen he, “Ala oabùt hano a'nogo nen, it apùnì o Epesùt mene hano asuagalùk, at Paùlùt ayoko hesikomo hano wene yogoisìlìk niko,” ìlùk ikenem hinasuk arat holhigip akìgì.

³ Wene at Ala a'la hinago welagaike mene atì, an pak hogo yakùlnesike, ìlùk, helal kasuk hogo waganogo yakùlhisìgì atì.

⁴ Hit en wene atì etage salhì logolìk he, “Wene Karìsùt hesik hinago welagaike mene atì, at Paùlùt elu agasik werek o,” ìlùk, enagat hùthogoin atì.

⁵ Hageat he, wene atì apùnì aike pak hogo yogoisìgì'le'ma, inokorat welagaukwama re, yogotak en Ala Areagùn nen, it ap Ala againapùrì Yesùt en inayoko hìlìk laksasike mene amanogo mel, Ala ane yogoisìlì'lùgì mene amanogo mel, hukalogo yakùlisasikomo inelu agaukwa atì, wene ebe re, yì'nogo.

⁶ Hano wane atì ba, it apùnì etakwe mene mel, Yahuri mene mel, inom higit hogoat esewerek haga'lagìk, Karìsùt ebe omakeat mene ninom higit hogo hùnogo hinìgìk, ikomo welago. Wene hageat Ala nen, “Tì'nogo hagathinabigin,” ìlùk, abok yogonisasike a'nogo ba, “Apùnì etakwe mene Karìsùt Yesùt inom hutik were'ma, hano wene atì ba ninom higit hogo haga'ninabigin,” ìlùk, ninelu aga atì.

⁷ An apùnì inatitigeke negen logolìk, wene atì sùpùrisìkì logouagalùk, Ala oabùt hano nen omamerogo haga'ninaperek higit hogoat nayoko hesike atì.

⁸ Ala againapùrì mene obogat inetagewerek werek kolegat he, an netage lek, mea mene, at Ala oabùt hano nen, hano wene pìlìngìrogo usak mea mene, Karìsùt en wogisikerek a'nogo apùnì etakwe mene yogoisìlìk nìkì logouagalùk nayoko hìlìk neyabu atì wo'nesikomo welagì.

^9-10 At Ala yì mene tì mene obogat elalhike mene a'nogo nen akìkì logolìk, Ebe tì'nogo haga'lasigin, ìlùk, wene a'la hinago welagaike mene, apùnì obogat weinam hogo yogoisìlìk nìkì logouagalùk nayoko hesike atì. Nen, it ap malaikat pogot obakwe yoko negarek mene amanogo inogogì kaintek mel, inane hologo welagaikarek mene mel, nit Ala againapùrì nen he, “At Ala yì hesik tì hesik a'la motok kagauksek,” ìlùk he, yogoisikenem yogotak ya inelu asuagalùk, hageat en wene atì Ala a'la hinago motok welagaike.

¹¹ Ero ba nen, at Ala nen atì'nogo haga'ninabigìlùk a'la akasike mene atì, at ninoe Etagepogot Karisùt Yesùt en hagasuagalùk lakhei wagaikomo, ebe hagasike atì.

¹² Nit ninetaùken at oba hìpìrethìlìk, at ninom hutik logolìk, ninayù'lek hogo ninetaùken hapuk hogo Ala oba kusak atì.

¹³ Atì nen he, an yogotak ya hit hesik weaga'nabì'lùgì atì nen hina'la pùk agì'lek logogun halok, hogothinabugun atì nen, hinasuk warogo yogohisìgì atì.

At Paùlùt en Ala ayoko hìgìk, ebe hogoratìk, yogoisasike wene

¹⁴ Ati nenat, an Ninopase eilhanem neitep awì yagasogo ayoko hìkì lagì.

¹⁵ It pogot oba welagaikarek mene mel, nit kweangma yoma welagorek mene mel, ninopaselak lopok yogoisìkì logolìk, “Nopase,” ìlùk, ogorek atì, ninopase ero Ala mene oba lìrogo ogorek atì.

¹⁶ At Ala yì mene tì mene eilmo motok wùlalhak ìlùk u hak, hogorato welagaikarek a'nogo nen, Areagùn oba hinomamerogo hinetaùken wurigethinabuagalùk ayoko hìkì lagiat.

¹⁷ Hinetaùken at Karìsùt oba hìpìrethoumo, at ebe hina'la awì wùrogo were'ma re, yì mene tì mene awì yatenem omaken yatìk, o tik ning hogo watìk, egarek hak, hinoabùt he, apùnì aike inebe inetawìrogo welagaikarek atì mene ba hinomaken yakhìlìk ning hago logouageip ìlùk, Ala ayoko hìkì lagiat o.

^18-19 Apùnì nen o wusuogolùk, hùlì uankwe tì ba, horokwe tì ba, wùroak lìabugun tì ba, tik pelabugun tì ba, ìlùk walhagarek meneat he, ninebe Karisùt en etawìrogo welagarek atì mene, “Hùlì tì ba,” ìlùk walhasak he, mea. Hùkoat o. Walhasak mea meneat he, Ala againapùrì aike obogat hinom higit hogo hùthoageip en, Ala nen hinetaùken wurigethikenem, at ebe abireke hina'la motok katok hogo peserogo logouagalùk ayoko hìkì lagìat o.

²⁰ At Ala at hogoratì logouok. At ebe nina'la logolìk omamerogo haga'ninaperek atì re, motok hùko atì nen, nit en nina'la ebetìk, kìno yogotìk, ogorek mene higit hogo hagatì'lek, tagan hogo hagaterek atì.

²¹ Nit Ala againapùrì atogotorek mene obogat Karìsùt Yesùt ninom hutik logolìk inebe aike hobuk mene ket ta'larìk laga kolek, Ala eberogoat hogorato motok logouok, ìlùk, “Amin,” ìgì atì.