ABÌKAKAN 9 - Ala Ane Wene Ket Mene Warogo Wo'ninapike Wene

¹ Atì'nogo malaikat inebe 4 en inapìkon anethagasik oba nen, aike apìkon anethikenem he, hesagal aike nen a'ma baga ma'loma pagarek oba, kwe husuagalùk kwe hùtùkwe etage kunci wogotama pogot oba nen kweangma pi waganem lakhìgì.

² Pi wagasik, a'ma baga ma'loma kwe hùtenem he, etu so'le lei hikenem apik lagaikerek atì hak, kwe hùrìkkwe atì nen, so'le lagakì logolìk he, mo mel, pogot mel, mùm hagarogo hìkì laga lakhìgì.

³ So'le atì a'la nen he, yì pulue tì pulue lìlìm aik en lìbìlinaperek atì hak, apùnì aik en lìbìlinapi logouagalùk, esewerek hisagama, so'le a'lakwe nen lagai waga laga.

⁴ It pulue atì yogoisìkì logolìk he, “E ebe mel, eka mel, yì mene tì mene awì yago hunigat mene aike mel, obogat weagathousak motok lek o. We, apùnì Ala asilo ineilha ba helal wagane'lek mene halok weagarinabino,” ìlùk lìaksa wagaikama isìgì.

⁵ Atì'nogo lìaksa waga logolìk, “Apùnì inebe motok pìkì inoasusak lek. We, lìlìm aik en lìbìlinapenem heinet weak watarek atì hak, tugi 5 ba logolìk, heinet liko-kaniko watì logouak o,” ìlùk yogoisagama isìgì o.

⁶ Atì'nogo hagarinapenem ou en liko-kaniko logolìk, “Ninebe kasuk hogo wa'la'lo e,” ìlùk wa'lasuogolùk, inokawerek en yì walhìgìk, tì walhìgìk, ugun mene re, inebe kasuk hogo wa'lasusak lek, ìlùk ìlì'mo nogo nen he, wa'lagì'lek heinet enek wato motok logogun o.

⁷ Nen, it pulue atì inebe re, wam kuda, apùnì nen apot oba hù'larìk weim yabi lùogolùk esa hologo hagare'ma welagaikarek atì hak welagaika. It atì inelokoken he, apùnì inelokoken hake mene, inùkùlmo re, kare-kare hake emas mene ugu.

⁸ Nen, inesi re, hìmì inesi hake. Nen, inaik he, yeke lo yeke etage singa atì mene aik hake.

⁹ Nen, inamigeken oba re, sìng ìtarek atì hak, posie omaken mene ugu. Nen, inogolabì ane re, ap weim yabi lùogolùk wam kuda esa apik en oto hake alma hùn-hùn mene etage kereta nen lisogo wogisek laganem, esok amì'mìt ane apik ikerek atì bake.

¹⁰ Nen, inagakùm he, lìlìm agakùm aik werek mene hake were'ma re, tugi 5 ba logolìk inaik en apùnì lìbìlinapì logouagalùk esewerek hisagama lìbìlinapi lagaika isìgì.

¹¹ Nen, it atì inoe kain etagepogot hagisek welagarek mene re, at malaikat Ala nen a'ma baga pelaksa wagaikomo welagarek mene a'nogoat. At atì etage, nit ninane ba re, weagarinapùkwe u hak, it apùnì Iberani mene inane ba re, etage Abalon ìgìk, nen, it apùnì Yunani mene inane ba re, Apolion ìgìk, egarek mene lakhìgì.

¹² Atì'nogo weagarinabigin mene re, aike weagarinapesik, hobuk eki pìre ba aike weagarinabigin mene oan werek o.

¹³ Malaikat inebe 5 inapìkon atì'nogo anethagasik oba nen, aike apìkon anethikenem he, yì mene tì mene obasi hano mene Ala hesik loletarek mene obùlùk, ebe emas mene hagarek mane, nen, okut heta-heta 4 oba wam sapi aik hake hagarek mene, Ala elokoma were'ma atoma nen apùnì inane hake ikenem holhì.

¹⁴ At ane atì nen he, at malaikat aike apìkon anethike mene a'nogo, atì'nogo anethìlìk, ekimo hesogo were'ma mel yogote: “Malaikat inebe 4 oba i hùko etage Eperat era'lu hele warek werek amanaga hele hikalinabi lan o,” ìlùk yogote.

¹⁵ Atì'nogo yogote atì re, it malaikat atì nen apùnì inebe 3 oba mìkìlogo hisìlìk, pìre heraksìkì logolìk, aike tahun atì ba, tugi atì ba, ineki atì ba, jam atì ba, inebe motok inoarìk lasak o, ìlùk hageat Ala nen inayoko hesikomo kagalek were'ma, hele hikalinapenem neileken isìgì.

¹⁶ Atì'nogo isìgìrìk oba nen, hobuk yogonetì logolìk he, “Ap tentara logolek wam inakuda lopok apot oba hùrek were'ma isegen atì, inebe obogat he, 200 juta nen werek,” ìlùk yakùlnetenem nasuk holhì.

¹⁷ Atì'nogo holhìrìk oba nen, hobuk wam kuda mel, apùnì apot oba hùrek mene mel, nabìkakan oba lakhìgì. It atì inamigeken oba su sìng ìtarek atì hak ugu were'ma isìgì. Atì'nogo isìgì atì re, it aike inasu elokoken etu amulok hake mene ugu, nen, it aike, inasu pogot elokoken muli hake mene ugu, nen, it aike inasu elokoken weik aborok hake mene ugu, nen, inakuda amanogo ùkùloak he, yeke lo yeke etage singa atì mene ùkùloak hake. Nen, inapelema nen he, etu mel, so'le mel, hetalì al hake obasi weak mene etage belerang atì mene mel, wùlìbi waga laga.

¹⁸ Atì'nogo etu mel, so'le mel, belerang obasi weak mene atì mel, ebe 3 weagarinaperek mene atì, inapelema nen wùlìbi waga logolìk he, apùnì inebe 3 ba mìkìlogo hisìlìk, pìre heraksìkì logolìk, aike inebe pìkì motok inoarìk lagaika isìgì.

¹⁹ It inapelema nen atì'nogo inoatìk, nen, inagakum walo ùkùloak werek mene hakema re, atì'nogo inoatìk, ìkì lagaika isìgì. It wam kuda atì inomame re, inape mel, inagakùm mel, atìatma, apùnì inebe atì'nogo yì aik tì aik inoba hìlìk inoatì lagaika atì.

²⁰ Atì'nogo meneat he, it apùnì hetakwe inoatì'lek mene atì nen, mokareke oabùt weak mene oba hipìrìk logolìk, ineki nen tùgì hareken emas mene ho, perak mene ho, tembaga mene ho, helep mene ho, e mene ho, wùrogo hagarek atì. Atì'nogo wùrogo hagarek atì, it tùgì atì nen, ineileken isagarek legat, inesako holharek legat, kwe lagaikarek legat, meneat he, atì'nogo wùrogo hìlìk,

²¹ apùnì aike inebe akowerek inoatìk, akolek inoatìk, pailak haksìgìk, inekiabusak wanhìk, ìkì lagaika mene heraksìlìk inoabùt hebelagì'lek logolìk he, weak hutigat motok hagatì lagaika isìgì o.