ABÌKAKAN 8 - Ala Ane Wene Ket Mene Warogo Wo'ninapike Wene

Ala asilo sùesika uan mene ba 6 oba arat hikalìk oba nen, aike hikalhike wene

¹ Atì'nogo yogonetesik oba nen, apolik he, sùesika uan mene silo hagarek atì hak ineki amusu ebe te'mek hogo hesukwa mene a'nogo, at Topa Eak a'nogo nen eki 6 oba hikalhesik oba nen aike hikalhenem he, pogot oba setengah jam o areng tiling-belengsek welaga hìgì.

² Atì'noga welagasik en, hobuk neileken lakhìgì hak he, malaikat inebe 7 nen Ala nen pìkon ane hake mene hake ebe 7 nenat wogosikomo, at elokoma metek were'ma isìgì.

³ Atì'nogo werek kolek, malaikat hunigat aike nen, lemesak emas mene hagarek mene wolok he, yì mene tì mene Ala loletarek oba emas mene hagarek atì ba wagasik metek welaga. Atì'nogo were'ma, Ala nen he, at againapùrì obogat en sapan egarek mene inane mel, kemenyan mel, inom-inom lolesuagalùk, kemenyan apik wogotomo, yì mene tì mene Ala loletarek oba atì, ebe at kain welagarek obùlùk a'nogo elokoma were'ma oba hei laganem lakhìgì.

⁴ Atì'nogo hei laganem he, Ala againapùrì sapan egarek mene inane kemenyan obasi inom malaikat a'nogo ekimo nen Ala elokoma lagakì laga hìgì.

⁵ Atì'nogo hagatesik, hobuk he, at malaikat a'nogo nen etu yì mene tì mene Ala warogo loletarek a'nogo mene wanhesik, lemesak a'nogo a'la kalogo re, kweangma wouk hogo pelaksa waga laga. Atì'nogo pelaksa waganem he, eilabùt hobugalep yararathìkì logolìk, okuku ane hùko pak ìlìk en ane lulu lagìk, lugul apik lang-langat hìgìk, ikenem hìgì o.

Pikon anethikenem haga'lagaike wene

⁶ Atì'nogo hìgìrìk oba nen, opolik he, malaikat inebe 7 nen amanogo pìkon hùko mene hake ebe 7 nen anethouogolùk hibik-hebek hogo hagatì lagaika isìgì.

⁷ Atì'nogo hebelhìlìk he, emakum malaikat aike apìkon anethikenem he, moso ligiken mel, etu mel, mep mel, inom ìpìkwe-apìkwe hagarogo kweangma po pelabi waganem he, kweang mel, e hakotek mel, ebe 3 ba mìkìlogo hìlìk pìre herakhìkì logolìk, aike halì lùk hogo nìkìk, eka heleka ket mene obogat nìkìk, ikenem lakhìgì.

^8-9 Atì hak, at malaikat emakum apikon anethikesik oba nen, hobuk at aike apikon anethikenem he, tom hake hùko mene aike etu amulok wùlùpenem he, po i laut yekele'ma pelabi waganem, i laut mel, Ala nen elalhike mene i laut a'la welagarek mene mel, so hùkotek mene etage kapal mel, ebe 3 ba mìkìlogo hìlìk, pìre herakhìkì logolìk, aike weagathikenem he, i elokoken mep agìk, yì mene tì mene ima mene aike wa'lagìk, kapal weak agìk, ikenem lakhìgì o.

^10-11 Atì'nogo it malaikat pìre inapikon anethagasik oba nen aike apikon anethikenem he, hesagal hùko mene pogot oba nen esage kìalek negen amulok kìoksek hake pi wagasik, i elesikwe mel, i ebe hùko asi wagarek mene mel, 3 ba mìkìlogo hìlìk, pìre herakhìkì logolìk, aike ale apik mene hagarogo hìkì laga hìgì. Hesagal atì etage re, Alealeka. At en atì'nogo i ale hagarogo hìlì'mo nogo nen he, apùnì i nikenem inebe apigat wa'laga lagaika isìgì.

¹² Atì'nogo malaikat inebe hìnagan inapikon anethagasik oba nen, aike apìkon anethikenem he, mo mel, tugi mel, hesagal mel, apùnì tùgì inoatenem inomame lek agarek atì hak, inabinak 3 ba mìkìlogo hìlìk, pìre herakhìkì logolìk, aike mùm arìk yatì'lek kamo ìkì logolìk, o like omakeat mene, hùkokwe mo yatì logopik en, hamùlùkkwe yatì'lek kamo ìgìk, o hùako omakeat mene, hùkokwe lìa logopik en, hamùlùkkwe mùm motok agìk, ìkì laga hìgì.

¹³ Atì'nogo ikesik oba nen, hobuk lakhìgì hak he, sùe pìm hake mene pogot halìaken oba ogolabi langsek purogo nìkì logolìk, ane hùkorogo mel ìkì laga: “Malaikat inebe 4 inapìkon anethagasik oba nen, hobuk malaikat inebe 3 nen inapikon anethikenem, apùnì obogat kweangma welagaikarek mene, motok weagarinabigin atì re, Eige! Ohùk! Netawìlak e!” ìlùk ìlìk nìkì laga nasuk holhì o.