ABÌKAKAN 7 - Ala Ane Wene Ket Mene Warogo Wo'ninapike Wene

Apùnì Isirael mene inùkùl etage lopok silo ineilha ba hisasukwa wene

¹ Atì'nogo neileken isìgìrìk oba nen, opolik he, ap malaikat inebe 4 en pogot erokwe-erokwe poyùkwe-mayùkwe ìlìkwe-yìkwe sogoi hunha wagarekkwe, kwe elùgùn sebelek metek logolìk, sogoi 4 enat kweangkwe hunha waga logolìk eka abologothìgìk, i laut yekelek obakwe hunha wagìk, inogo ìlùk ineki hesogo were'ma lagisìgì o.

² It atì'nogo werek kolek, malaikat hunigat aike o mo yegelogo lìabi wagare'ma a'loma nen Ala eluk motok welagarek mene asilo wolok wùlìbi wagasik, Ala nen it malaikat inebe 4 en kweang mel, i laut yekelek mel, weagathouagalùk esewerek hisasike mene amanogo mel yogoisikenem holhì:

³ “Nit en, it ninopase Ala atitigeke mene ninetaùken wekelogo Ala asilo ineilha ba oan hisìgì'lek welago atì re, kweang mel, e ero mel, i laut yekelek mel, weagathousak lek o,” ìlùk yogoisike.

⁴ Atì'nogo yogoisikesik he, apùnì Isirael en tagokwe mene inùkùl etage lopok obogat inetaùken wekelogo Ala asilo ineilha ba hisìlìk lagaikasik, “Inebe hùlì 144.000 nen silo hisìlìk lagoma,” ìlùk ikenem holhì o.

^5-8 It ineilha ba silo hisega atì inebe re, it apùnì inùkùl etage Yehura mene re, 12.000 nen, it apùnì inùkùl etage Ùrùben mene re, 12.000 nen, it apùnì inùkùl etage Kat mene re, 12.000 nen, it apùnì inùkùl etage Aset mene re, 12.000 nen, it apuni inùkùl etage Naptali mene re, 12.000 nen, it apùnì inùkùl etage Manase mene re, 12.000 nen, it apùnì inùkùl etage Simeon mene re, 12.000 nen, it apùnì inùkùl etage Lewi mene re, 12.000 nen, it apùnì inùkùl etage Isakat mene re, 12.000 nen, it apùnì inùkùl etage Sepulon mene re, 12.000 nen, it apùnì inùkùl etage Yùsùp mene re, 12.000 nen, it apùnì inùkùl etage Penyamin mene re, 12.000 nen, Ala asilo inebe lopok atì'nogo ineilha ba hisagasik he, “Hùlì tì hùlì hisogoma werek,” ìlùk ikenem holhì o.

Apuni inebe apik ineki wenasusak mea atogorek were'ma eileken isasike wene

⁹ Atì'nogo hìgìrìk oba nen, opolik neileken isìgì re, yì apùnì tì apùnì inùkùl etage lopok, inogat lopok, inawì lopok, inane lopok, su kut uatek laberek mene, apùnì nen etawì watì logolìk, yapeka hukalogo inekimokwe wanharek atì hak, e eka mene inekimokwe wolok, Ala kain welagarek obùlùk oba atoma Topa Eak eperak were'ma ineilhanem atogorek inebe hùlì yì ba ìlùk, ineki wenasusak motok mea logolìk, inane hùkorogo mel ìkì lagaika:

¹⁰ “Ninopase Ala kain obùlùk oba welagatek mene, u a e, Topa Eak heperak, u a e, Telninapùkwe ero hirat welagasep, u a e,” ìlùk etawì watì lagaika isìgì.

¹¹ Atì hak he, Ala kain welagarek obùlùk ebe tùlem werek kolek, it ap inalùgetek amanogo mel, it Ala nen elalinapikomo ineluk welagaikarek mene aike inebe 4 en amanogo mel, era'lukwe yìlìng-walìng hogo werek kolek, it malaikat inebe obogat inabel epakwe yìlìng-walìng hogo logolìk, inelokwe sogoum Ala awe a'ma kìlìk hogoratì lagaika.

¹² Atì'nogo hogoratì logolìk, mel ìkì lagaika: “Ebe asuak u hak, Amin, u a e, Ninopase Ala haligat hùko, u a e, Yì wene tì wene helu motok logolìk, u a e, Hat homame ba ha'nisek were'ma, u a e, Hai wathapìk, hogothapìk, u a e, Agaugethapìk, esinethapìk, u a e, Iko motok logogun atì, u a e, Ebe asuak u hak, Amin, u a e,” ìlùk etawì watì lagaika isìgì.

¹³ Atì'nogo iko kolek, it ap inalùgetek amanogo mene aike nen hinok wo'nììkì logolìk: “It apùnì inasu kut uatek mene laberek yoma re, sani. Nen, o koma nen wagaika,” ìlùk hinok wo'niike.

¹⁴ Hinok atì'nogo wo'niikenem, an nen he, “Noe, an nokot. Hat enek he, helu welagen o,” ìlùk yogotenem, at en he, mel yogonete: “It apùnì yoma re, o kweangma were'ma apùnì aike nen yì aik tì aik apik hagarinapenem, Ala nen telinapikomo, inasu Topa Eak amep oba arat kut motok sobalega mene o.

¹⁵ Atì'nogo hagatasi'mo nogo nen he, Ala kain welagarek obùlùk oba ebe were'ma eilhanem metek logolìk, at awì wùrì'mo at hesik likene hùako hagato were'ma, at kain welagarek obùlùk oba werek a'nogo nen, apùnì nen mo aik inoasinogo ìlùk, o wùtarek atì hak, at ebe nen it salogo hagisek logogin o.

^16-17 Atì'nogo hisamo were'ma, Topa Eak a'nogo Ala kain welagarek obùlùk oba ebe tùlem logolìk, apùnì nen wam konharek atì hak, it serisek motok logolìk, i apùnì inebe inelugurinaperek mene noagalùk, elesimo wogisek lagìk, Ala nen ineil amusu tetìk, ìkì logogun atì nen he, sùpùrùk mel, i mel, nele aga logogun motok lek o. Nen, mo nen mel, etu nen mel, aik en yagalinapì logogin motok legat o,” ìlùk yogonete.