ABÌKAKAN 6 - Ala Ane Wene Ket Mene Warogo Wo'ninapike Wene

Silo hagarek atì hak amusu te'mek hogo hesukwa mene Topa Eak en hikalhike wene

¹ Atì'nogo hìgìrìk oba nen hobuk, silo hagarek atì hak, sùesika uan mene amusu ebe 7 ba te'mek hogo hesukwa mene a'nogo, Topa Eak a'nogo nen, aike emakum hikalhenem he, it Ala nen elalinapikomo ineluk welagaikarek mene inebe 4 en amanogo mene aike nen he, “Eme o,” ìlùk ane okuku ane hake ikenem nasuk holhì.

² Atì'nogo ikenem, neileken lakhìgì hak he, ap aike sike wolok kare-kare ap inetagepogot iksagarek mene ùkùlmo ìkhagama, wam kuda esi mola kut mene apot oba hùrek logolìk, o sebeligìlùk sebelìk nikenem lakhìgì o.

³ Nen, silo hagarek atì hak, sùesika uan mene ba amusu te'mek hogo hesukwa mene a'nogo mene, at Topa Eak a'nogo nen aike emakum hikalhesik en, opolik aike hikalhenem he, it Ala nen elalinapikomo ineluk welagaikarek mene amanogo aike emakum ane ìlìk oba nen opolik aike nen ìkì logolìk: “Eme o,” ìlùk ikenem holhì.

⁴ Atì'nogo ikenem he, wam kuda esi mep hake mene laganem lakhìgì. Ap aike wam kuda atì apot oba hùrek nikenem mel yogotama holhì: “Apùnì kweangma mene inoba lìoksek hano logousak lek. At he, apùnì aike nen aike watìk, wat-wat ìkì logouagalùk, hat esewerek hagago,” ìlùk karok hùko mene wogotama wam kuda a'nogo apot oba hùrek nikenem lakhìgì o.

⁵ Nen, silo hagarek atì hak, sùesika uan mene ba amusu te'mek hogo hesukwa mene a'nogo, Topa Eak a'nogo nen pìre hikalhesik en aike hikalhenem he, it Ala nen elalinapikomo ineluk welagaikarek mene amanogo, inebe pìre arat inane egasik oba nen, aike nen he, “Eme o,” ìlùk ikenem holhìrìk, lakhìgì hak he, wam kuda esi muli mene aike laganem lakhìgì. Nen, ap aike ekin walhùgùkwe ekimo wolok wam atì apot oba hùrek nikenem lakhìgì o.

⁶ Atì'nogo nikenem lakhìgìrìk, nasuk holhì hak he, it Ala nen elalinapikomo ineluk welagaikarek mene inebe 4 en amanogo ina'la nen apùnì inane hake mene mel ike: “Beras hake gandum eken atì mene ìlìreke sogoloak omakeat enek kalogo re, oko yabu ineki omake hesik hagatenem ineki oko wogisagarek atì hak obogat housak o. Nen, hùpak eken hake etage jelai atì mene ìlìreke sogoloak 3 nek kalogo re, oko yabu ineki omakeat hesik hagatenem ineki oko wogisegarek atì hak obogat housagat o. Atì'nogo meneat he, minyak e saitun amusu mel, anggur amusu mel, atì nek he, weagathousak lek o,” ìlùk ikenem holhì.

⁷ Nen, silo hagarek atì hak, sùesika uan mene ba amusu te'mek hogo hesukwa mene a'nogo, Topa Eak a'nogo nen, 3 oba arat hikalhesik en, aike hikalhenem he, it Ala nen elalinapikomo ineluk welagaikarek mene amanogo inebe 3 ba inane arat egasik oba nen, aike nen he, “Eme o,” ìlùk ikenem nasuk holhì.

⁸ Holhìrìk, lakhìgì hak he, wam kuda esi apùnì wa'lasuogolùk inelokoken kùl haga'lagarek atì hak mene nikenem lakhìgì o. Nen, inebe wa'lagaikarek atì, apùnì hake arìk he, wam atì apot oba hùrek nìkì laga. Atì'nogo nikenem, at opolik he, a'ma baga pagarek atì, apùnì hakeat arìk he, eperak nikenem lagisìgì. Atì'nogo nìkì logolìk, apùnì kweangma mene obogat inebe 4 oba nen mìkìlogo hisìlìk, 3 ba inoatì'lek heraksìlìk, aike nek apùnì aike nen karok oba inoatenem wa'lagìk, sùpùrùk no nen wa'lagìk, on em hake mene ba wa'lagìk, yeke lo yeke mel en, wam maro mene mel en, aik en lìbìlinapenem wa'lagìk, ìkì logouagalùk esewerek hisagama nikenem lagisìgì o.

⁹ Atì'nogo isìgìrìk oba nen, opolik he, silo hagarek atì hak, sùesika uan mene ba amusu te'mek hogo hesukwa mene a'nogo mene, Topa Eak a'nogo nen 4 oba arat hikalhesik en, aike hikalhenem he, apùnì Ala ane ning hogo wanhukwasik, it aike yogoisìkì lagaukwa atì hesik inoasukwa mene inareagun Ala ako warogo etu loletarek oba a'ma were'ma lagisìgì o.

¹⁰ It atì'nogo logolìk, inane hùkorogo mel ikenem holhì: “Ninopase Ala homame apik keksek motok logolìk, higit hogo nek hagatetek mene ninopase. Heki mìren logopik en apùnì kweangma mene nen nit ninoasukwa a'nogo ninùkùlmo ùkùm inoba hìlìk inoasigin nogo,” ìlùk yogotì lagaikama,

¹¹ at en he, “Hinerùgì hinagaiya'lak hetakwe hinom an hesik hagatì lagagip mene, hit hinoasukwa atì hak, inoasugun mene oan werek atì re, it serisek set walogo eil omake logoino,” ìlùk yogoisikesik, inasu kut mene inebe lopok ìksikenem lagisìgì o.

¹² Atì'nogo lagisìgìrìk oba nen, opolik lakhìgì hak he, sùesika uan mene ba silo hagarek atì hak, amusu te'mek hogo hesukwa mene a'nogo mene Topa Eak a'nogo nen 5 ba arat hikalhesik en, aike hikalhenem he, lugul hùkorogo lang-langat hìgìk, o mo elokoken mùm so'labukwa warek hake haga'lagìk, tugi elokoken apùnì inamep hake agìk,

¹³ hesagal atì, e ara eken akutmo sogoi aninirogo hunha waganem, kweangma lologo pi wagarek atì hak, atì'nogoat pogot oba nen lologo kweangma pi wagìk,

¹⁴ pogot atì, helal waganek mene ìkìlogo hagarek atì hak, ìkìlogo lek agìk, tom ùkùl mel, i ekenkwe mel, welagarek obakwe lopok en welekkwe lakhìgìk, ikenem lakhìgì o.

¹⁵ Atì'nogo hagatenem he, apùnì kweangma mene, ap inetagepogot mene mel, kaintek mene mel, inogogì kabelek mene mel, ineilmo wùlalhak mene mel, inetagewerek mene mel, apùnì inebetek, inatitigeke inebe obogat inom he, omoulakwe hina'lagìk, tom oba helep ako holelekkwe hina'lagìk, ìkì lagaika isìgì o.

^16-17 Atì'nogo hinago logolìk, tom mel, helep mel, mel yogoisìkì lagaika: “Ala anini ninoba hegein a'nogo arat hakok i waga yoma re, sa hak en a'la pùk etaùken sebethìlìk kamo igin akegep? Mea o. Atì nen he, hit en, at kain welagarek obùlùk oba werek atì nen elokoken age ninoatìk, Topa Eak atì a'mage ninoba hìlìk ninoatìk, ugun yì re, tukwak hogo ninebe sebelninabìk he, hina'ma hinakhinanini o,” ìlùk kìno yogoisikenem nasuk holhì o.