ABÌKAKAN 5 - Ala Ane Wene Ket Mene Warogo Wo'ninapike Wene

“Ala Atopa Eak en helal waganek ìkìlìk were'ma elok hikalusak,” ìlùk yogonesike wene

¹ Atì'nogo hagatenem neileken isìgìrìk oba nen, opolik he, at kain a'nogo ebe obùlùk welagarek oba logolìk, sùesika uan mene ba helal abel etakwe a'makwe waganek mene ìkìlìk were'ma, “It aike ineileken hìthasak lek,” ìlùk silo hagarek hak, amusu 7 ba te'mek hogo hesukwa mene ekimo hesogo were'ma neileken hìgì.

² Hìgìrìk were'ma, at malaikat omame apik mene aike nen ane hùkorogo ìkì logolìk he, “Sùesika uan mene ba helal waganek ìkìlìk yì, Hikalusak lek, ìlùk silo hagarek hak, amusu te'mek hogo hesukwa mene yi, sa esewerek logolìk elok wokhìlìk hikalusak akegep,” ìlùk hinok wanhe.

³ Hinok atì'nogo wanhomo, it aike pogot oba mene he a? Kweangma mene he a? At he, a'ma baga mene he a, sùesika uan mene ba helal waganek ìkìlìk atì, elok hikalhìlìk, a'la hìthasak esewerek aike heraginapa mene, inebe legat.

⁴ Atì'nogo ap aike esewerek logolìk en, sùesika uan mene ba helal waganek atì, elok hikalhìlìk eileken a'la hìthasak mene ebe motok lek atìl nen he, na'la kolo arìk, le apik agì o.

⁵ Atì'nogo le aganem he, ap inalùgetek amanogo mene aike nen he, “Le aga hùk o. E aku hulelherek atì hak, ap Taùt en tagokwe mene ùkùl etage Yehura mene ta'lagaikesik en, ebe yeke lo yeke hake etage singa a'nogo arat omame agasik esewerek agasi'mo re, sùesika uan mene ba helal waganek ìkìlìk atì, it aike ineileken hìthanogo ìlùk silo 7 nen werek a'nogo elok hikalusak o,” ìlùk yogonete.

⁶ Atì'nogo ìlùk yogonetesik oba nen, opolik he, it Ala nen elalinapikomo ineluk welagaikarek mene aike inebe 4 amanogo mel, ap inalùgetek inebe 24 en amanogo mel, at kain welagarek obùlùk era'lukwe werek kolek, ina'la tùlem he, Topa Eak arat wasukwa mene ùkùloa'ma aik 7 ba nen wùlìk, nen, eileken 7 ba nenat mene metek welaga. Eileken 7 nen atì ebe re, Ala nen Areagùn o yì awì tì awì laksikerek mene amanogoat o.

⁷ Hobuk he, Topa Eak a'nogo waga lagasik he, sùesika uan mene ba helal waganek ìkìlìk mene, at Ala kain walagarek obùlùk oba logolìk, eki obekwe nen hesogo were'ma wanhenem neilekan hìgì.

⁸ Atì'nogo ekimo wanhenem he, it Ala nen elalinapikomo ineluk welagaikarek mene aike inebe 4 en amanogo mel, ap inalùgetek inebe 24 en amanogo mel, Topa Eak a'nogo awe a'ma kìlìk ineitep awì yagasogo hogoratì lagaika. Atì'nogo hogoratì logolìk, it ap inalùgetek amanogo inebe lopok gitar hake meeo mel, kemenyan amusu isoak emas mene hagarek mene ha hinago mene mel, inekimo hesogo logolìk etawì watì lagaika. Kemenyan atì ebe re, Ala againapùrì sapan egarek atìat o.

⁹ Atì'nogo etawì ket mene helalogo watì logolìk: “Hat enek he, arat hoasukwama wa'lagagitik, u a e, Apùnì obogat inùkùl etage lopok, inane lopok, u a e, Inogat lopok, inawì lopok, u a e, Hat hamep oba Ala hesik oko palogo hisìlìk, u a e, Esewerek agagitik, u a e, Sùesika uan mene ba helal waganek ìkìlìk atì, u a e, Wìlìk he, silo hagarek atì hak, u a e, Amusu te'mek hogo hesukwa mene atì, u a e, Elok hikalusak, u a e.

¹⁰ It atì inoko palogo hisasigitik, u a e, Ninopase Ala heaik hagati logouagaluk, u a e. Inùkùl etage, Ala esewerek, saligin, u a e, Inebo kainat menhisasiginmo, u a e, it an apùnì kweangma mene, u a e, Inawe a'ma hisìlìk hagisek logogùn u a e,” ìlùk etawì watenem isìgì.

¹¹ Etawì atì'nogo watasik oba nen, hobuk aike yì'nogo lakhìgìat. At Ala kain welagarek obùlùk a'nogo ho, it Ala nen elalinapikomo ineluk welagaikarek mene amanogo ho, ap inalùgetek amanogo ho, inom tùlem werek kolek, inera'lukwe yìlìng-walìng he, it malaikat esa yì teng tì teng ineki wenasusak motok mea mene logolìk inane hùkorogoat mel ìkì lagaika:

¹² “Topa Eak wasukwa mene atì nek he, yì mene tì mene awe a'ma hisìgìk, eilmo wùlalhak welagìk, wene a'la kagalek enek welagìk, omame apik welagìk, ikerek o. Halok, at enek he, elok agaugeratìk, hogoratìk, hai watìk, ìkì logousak o,” ìlùk hogoratì lagaika.

¹³ Atì hak, it Ala nen elalhike mene obogat, pogot oba mene ho, kweangma mene ho, a'ma baga mene ho, i laut yekele'ma welagarek mene ho, obogat en ìkì logolìk: “At kain welagarek obùlùk oba werek atì, Topa Eak a'nogo eperagat, Irat inomame werek o, ìlùk hai warinapìk, agaugerinapìk, hogorinapìk, iko motok logouok o,” ìlùk ikenem holhì.

¹⁴ It atì'nogo ikenem he, it Ala nen elalinapikomo ineluk welagaikarek mene aike inebe 4 en amanogo nen mel ìkì lagaika: “Ebe asuak,” u hak, “Amin,” ìkì lagaika. Nen, it inalùgetek inebe 24 amanogo nen hogo re, at awe a'ma kìlìk ineitep awì yagasogo hogoratenem isìgìat o.