ABÌKAKAN 4 - Ala Ane Wene Ket Mene Warogo Wo'ninapike Wene

Pogot oba Ala hogoratenem eileken hasike wene

¹ Atì'nogo yogonetenem hìgìrìk oba nen opolik he, nabìkakan oba aike yì'nogo lakhìgì. Pogot oba re, kwe aike hùrìk were'ma, at alep ane pìkon ane hùko mene hake ba yogonetenem nasuk holhì mene a'nogo nen hobuk mel yogonete: “Wene ya logopik en hobuk haga'lasigin mene heileken lakhanogolùk, yakùlhesik en he, lagai me o,” ìlùk yogonete.

² Atì'nogo yogoneto kolek aremnogoat, Ala Areagùn noba louk i wagama neileken lakhìgì hak he, pogot oba at kain welagarek oba obùlùk were'ma lakhìgì. Atì'nogo were'ma re, at ebe obùlùk atì ba hurek were'ma lakhìgì.

³ At atì elokoken he, helep amùlìreak oko apik palharek mane etage pailuri pandan mel, lelima mel, hake mene were'ma, uare elokoken kereka palek hake mene at kain welagarek obùlùk oba a'nogo yìlìng-walìng were'ma lakhìgì.

⁴ At kain welagarek obùlùk tùlem werek kolek, it aike kain welagaikarek inobùlùk 24 en were'ma, ap inalùgetek inebe 24 enat inasu kut mene laberek, nen, kare-kare emas mene misago ap inetagepogot ugu welagaikarek atì hak ugu mene inebe inobùlùk atì bakwe hùrek welagaika.

⁵ Atì'nogo were'ma, at kain welagarek obùlùk atì ba nen eilabùt hobugalep yararathìgìk, okuku ane hùko pak ìlìk en ane lulu lagìk, iko kolek, at kain welagarek obùlùk a'nogo elokoma re, esage kìalek esok telik ebe 7 nen welaga. Atì ebe re, Ala Areagùn motok katoksek u hak ebe 7 nen a'nogoat o.

⁶ Nen, at kain welagarek obùlùk a'nogo elokoma re, aike inapùnak elokoken muli i laut yekelek hake mene welaga. Atì'nogo were'ma, at kain welagarek obùlùk tùlem were'ma, abel heta-heta, it Ala nen elalinapikomo ineluk welagaikarek mene aike inebe 4 en ineileken inelokokwe inapotkwe apik mene welagaika.

⁷ Atì'nogo welagaika atì, aike re, lo yeke hake etage singa atì hake, nen, aike re, wam sapi oalì mene hake, nen, aike re, elokoken apùnì inelokoken hake, nen aike re, sùe loine purogo niko kolek lakhagarek hake, were'ma lakhìgì.

⁸ It atì inebe 4 mene re, inebe lopok inogolabì 6 en ma re, inomak abel etakwe mel, a'makwe mel, ineileken motok apik mene inane kamo ìgì'lek, likene motok, hùako motok, Ala apnù wanhì logolìk he, “Ninopase Ala Etagepogot omame apik, u a e, Halo keksek welagaike, u a e, Yogotak keksegat werek, u a e, Hobuk keksegat motok logogin, u a e,” ìlùk hogorato motok welagaika.

⁹ Atì'nogo ìkì logolìk, ninhùkwe-nanhùkwe at kain eluk motok welagarek mene a'nogo ebe obùlùk oba were'ma hogoratì logolìk, “Ninopase kain welagatek mene harat hai wathapìk, hogothapìk, esinethapìk, ìkì logogun o,” ikenem he,

¹⁰ it ap inalùgetek inebe 24 amanogo nen, at kain eluk motok welagarek a'nogo ineitep awì yagasogo hogoratì logolìk, kare-kare inùkùlmo ugu mene kìrìk-korok hogo, at kain welagarek obùlùk a'nogo elokoma lakhìkì logolìk he, mel ìkì lagaika:

¹¹ “Ninopase Ala Hetagepogot, u a e, Yì mene tì mene obogat, u a e, Hat ha'la akasigitik en elalhigin, u a e, Elalogo hesiginmo werek atì, u a e, Harat kain homame apik halok, u a e, Hogothapìk, agaugethapìk, ìkì logousak, u a e,” ìlùk apnù waganogo hogoratì lagaika isìgì.