ABÌKAKAN 3 - Ala Ane Wene Ket Mene Warogo Wo'ninapike Wene

Wene Ala againapùrì o Saritit mene hesik yogosike wene

¹ Atì'nogo yogonetesik hobuk yogonetì logolìk: “Ala Areagùn ebe omakeat mene re, 7 salek a'nogo ese welagìk, hesagal ebe 7 nenat a'nogo nekim hesogo welagìk, ìgìrek mene a'nogo nen wene yì yogohesik: At Ala nen malaikat ayoko hìlìk lakhei wesu hak, at againapùrì o Saritit atogotarek mene inayoko hìlìk hisasikomo werek a'nogo, wene an nen it yogoisegein mene yì, hat en helal waganogo inoba lakheinok en, it mel yogoisak: Hit o Saritit mene apùnì nen hinabok ìkì logolìk, It ineluk werek, ìlùk, ìlì'lùgì meneat he, hinebe warek hake logolìk hinoabùt hagatì lagep mene atì an nelu o.

² An nen hit hinoabùt palhì lagì re, nopase Ala eilhanem hano katok hogo hagatì lagep lek. We, horogat wa'lasusak hinetaùken pasalùk welagep atem obaat, siak hogo melarìk he, hinekisok hapugurakalìk, hinomamo a'no o.

³ Hit atì'nogo siak hogo melarìk hinomamo agì'lek halok he, apùnì yogot wanuogolùk hinagasogo wagaikarek atì hak, an atì'nogoat, hit en, At tì sat wesigin, ìlùk hinokotma wesinogo nen he, wene emakum yakùlhisasukwama hinasuk holhigip mane hina'la ebethìlìk he, weak hagatì lagep mene hukalogo heraksìlìk hinoabùt hebelarìk, wene atìat hineki ning hogo hesogo logoino o.

⁴ Atì'nogo meneat he, hit apùnì o Saritit mene hinebe hamùlùgat aike, apùnì nen inasu sobalek mene muli mene oba labulasinogo ìlùk tegelogo welagaikarek atì hak, weak aike hagatì'lek werek atì, inasu kut mene labesusak obaat laberogo nen an ninom nìkì logogùn o.

⁵ “Sa nen omame asigin halok he, an kut mane labethegein o. Nen, an it apùnì inelugurinapìrek mane hùgì inetage sùesika ba helal waganek mene terogo laksegein lek. An nopase mel, malaikat yoko laksa wagarek mene mel, ineilhanem, It yì an nagainapùrì o, ìlùk inetage pak hogo yakùlisegein,

⁶ ìlùk, ìgì mene atì, Ala Areagùn nen Ala againapùrì o yì awì tì awì atogotarek mene yogoisìlì'logoat atì, hinasuk holusak halok he, hanorogo holino o, ìlùk yogoisìgì mene atì, helal waganogo inoba lakheino o,” ìlùk yogonete.

Wene Ala againapùrì o Pilalepia mene hesik yogosike wene

⁷ Atì'nogo yogonetesik hobuk yogonetì logolìk he: “An weak hagatì'lek, keksek logolìk, mene ebarogoat enek ìgìrek mene nen kwe hùtùkwe Taùt mene wolok kwe hùtì halok, apùnì aike nen yagasusak mea o. Nen, kwe yagatì halok, apùnì aike nen hususak meaat mene a'nogo nen wene yì yogohesik: At Ala nen malaikat ayoko hìlìk lakhei wesu hak, at againapùrì o Pilalepia atogotarek mene inayoko hìlìk hisasikomo werek a'nogo, wene an nen it yogoisegein mene yì, hat en helal waganogo inoba lakheinok en, it mel yogoisak:

⁸ Lakhani! Hit hinoabùt hagatesep he, hinomame motok hamùlùgat meneat he, an nane hologo higit hogo hagatìk, nabok labelhì'lek pak hogo yogoisigik, egesep atì an nelumo re, hit hesik he, kwe apùnì aike nen yagasusak motok mea mene hùrogo hikìgì o.

⁹ Lakhani! It apùnì Ibilit againapùrì atogotarek meneat he, inapeliagat, Nit ninebe Yahuri mene, ìlùk egarek mene atì, hit hinawe a'ma ki wìrìk, an hit netaùken hutik welagìrek atì inelu asuagalùk, it inebe hit hinoba hisa wesigin o, ìlùk eberogoat yogohisìgì.

¹⁰ Atì'nogo hisa wesigin atì re, an nen, Hinepe morogo logoino o, ìlùk yogohisasigi mene atì, nane hologo higit hogo hagatì lagep atì nen, o hobuk Ala nen apùnì kweangma yoma welagaikarek mene obogat yì aik tì aik inoba hegein atì hiko kolek, hit enek he, an nen nawe a'ma hano hakhisek logogin o.

¹¹ An heageagat wesigin o. Atì'nogo wìrìk, sa awewerek sa awewerek laga logolìk, inomame asugun mene oko kare-kare iksagarek atì hak, oko hit wokhisegein mene, it apùnì aike nen telogo helanogo ìlùk, hit ebe wanhigip mene atì, hineki ning hogo hesogo logoino o.

¹² “Nen, sa nen omame asigin mene halok, o atuli lìaparek atì hak, at atì'nogoat Ala okawerek awì wùrì'mo menogo hìlìk, nopase Ala etage mel, awì kota Yerusalem ket mene at enat pogot oba nen pelabi wesigin atì etage mel, an netage ket mene mel, an nen, at atì oba helal waganogo houmo re, at ebe o atoma nen wùlìbi wesigin motok lek o,

¹³ ìlùk ìgì mene atì, Ala Areagùn nen Ala againapùrì o yì awì tì awì atogotarek mene yogoisìlì'logoat atì, hit hinasuk holusak halok he, hanorogo holino o, ìlùk yogoisìgì mene atì, helal waganogo inoba lakheino o,” ìlùk yogonete.

Wene Ala againapùrì o Laolikia mene hesik yogosike wene

¹⁴ Atì'nogo yogonetesik, hobuk yogonetì logolìk he: “Ero ba nen, yì mene tì mene ero anat were'ma, Ala nen elalhike mene atì, at abok noabùt hùpùn hogo eberogoat enek ìgìrek mene, netage ebe asuak u hak, Amin a'nogo nen wene yì yogohesik: At Ala nen malaikat ayoko hìlìk lakhei wesu hak, at againapùrì o Laolikia atogotarek mene inayoko hìlìk hisasikomo werek a'nogo, wene an nen it yogoisegein mene yì, hat en helal waganogo inoba lakheinok en, it mel yogoisak:

¹⁵ Hit hinoabùt hagatì lagep mene atì, obogat an nelu o. Hit hinoabùt min hogo logolìk, hinobaken nene hagatì lagep legat, nen, agaken hogo logolìk, akiluk hogo hagatì lagep legat, we, hinoabùt min hinobaken nene logousak halok, atìat logousak. Nen, agaken akiluk hogo hagatì logousak halok, atìat logousak o.

¹⁶ Meneat he, hinoabùt min legat, agaken legat, we, min he a? Agaken he a, suam welagep atì nen he, i seram en inapema nen hemelogo wulaksagarek atì hak, an nen hinebe wulakhikegein o.

¹⁷ Hit he, hinelageigat, hineileken mùmat, hinalulukwaat, logolìgat he, Nit ninebe inetawì negen motok weagat welago, ìlùk hùthìgì'lek, hit en ìkì logolìk: Nit he, ninebe ninokawerek en kainerakogosik, yì mene tì mene ninelageik agì'lek, nineilmo wùlalhak welago, ìlùk ìkì lagep atì.

¹⁸ Atì'nogo welagep atì nen, hit kain hineilmo wùlalhak asuageip en he, emas etumo weragasogo hano hagarek mene noba oko palìgìk, hinalulukwa welagep mene atì, hinekalì asinogo nen he, laberùogolùk su kut mene noba oko palìgìk, hineileken mùm mene atì, hano aganem yì mene tì mene lakhìkì logouogolùk, amusu hineileken obakwe wasuageip en noba oko palìgìk, uageip en ìlùk hinasuk watì o.

¹⁹ Atì'nogo hinasuk watì atì re, it apùnì an netaùken hutik mene hùgì, inebe lopok inasuk warogo labìsake tùgì inoatìrek enek atì nen he, weak hagatì lagep mene atì heraksìlìk, hinoabùt hebelarìk he, akiluk hogo hagatì logoino o.

²⁰ Lakhani! An nebe kwe ba metek logolìk, kwe ane papagathìkì lagì o. Atì'nogo papagathikenem, sa nen nane asuk holìk he, kwe hù'neegein halok, an at oba ha kìlìk he, sùpùrùk niko nagaiyak-hagaiyak neperak hutik logogun o.

²¹ “An arat nomame agagimo, nopase kain welagarek obùlùk oba neperak welago yì hak, sa nen omame asigin halok, an kain welagìrek nobùlùk oba neperak logouogolùk menhegein o,

²² ìlùk ìgì mene atì, Ala Areagùn nen Ala againapùrì o yì awì tì awì atogotarek mene yogoisìlì'logoat atì, hinasuk holusak halok he, hanorogo holino o, ìlùk yogoisìgì mene atì, helal waganogo inoba lakheino o,” ìlùk yogonete.