ABÌKAKAN 22 - Ala Ane Wene Ket Mene Warogo Wo'ninapike Wene

¹ Atì'nogo yakùlnetomo hìgìrìk oba nen opolik he, Ala ho, Topa Eak ho, eperak kain welagaikarek inobùlùk oba nen, i inelugurinaperek mene elokoken muliak hano inapùnak hake mene elesi wùlogo re,

² O kota atì, kwe ebela esako heta-heta lagaikarek oba were'ma, i a'nogo tùlem lagare'ma hìgì. Atì'nogo laga kolek, i aik ìlì ba, yì ba, e awì yago were'ma hìgì. E atì eken nikenem inelugurinaperek mene a'nogo, tugi omakeat oba eken aike ìtìk, tugi aike ba eken aike ìtìk, iko kolek mo lagagìk, pìgìk, iko kolek tahun omakeat oba eken hùlì 12 nen ìterek mene welaga. Nen, eka ba re, yì apùnì tì apùnì inùkùl etage lopok hanorinaperek mene hìgì.

³ Nen, emakum Ala nen apùnì mel, yì mene tì mene mel, homan hisasike mene a'nogo nokolhìlì'mo nogo men he, hobuk o atì oba homan nokolek welaga hìgì. Ala ho, Topa Eak ho, eperak kain welagaikarek inobùlùk a'nogo, o kota atoma tùlem werek kolek, it apùnì Ala atitigeke mene inetaùken at oba hìpìrìk logolìk, at hesik hagato logogun isìgì.

⁴ Atì'nogo logolìk, Ala etage it ineilhaken oba helal wagane'ma re, it en at elokoken ineileken hìkì logogun.

⁵ Nen, Ala ebe apopok it inebe lìarinapo kolek nogo nen he, a hùako legat, nen esage mel, mo mel, yatì logousak legat, werek kolek, it kaintek inetagepogot logolìk, apùnì aike inawe a'ma hisìlìk hagisek moto'-motok logogun isìgì o.

Yesùt wesigin wene

⁶ Atì'nogo isìgìrìk were'ma, at malaikat a'nogo nen hobuk yogonetì logolìk: “Yì wene tì wene haga'laganem lakhìlìk wagen atì, apùnì nen he, Wene atì eberogoat, ìlùk hùthasak mene o. Wene atì re, eil omakeat welagì'lek heageagat haga'lasigin mene o. Ma re, ninopase Etagepogot Ala Areagùn it ap at ane yogoisagarek mene wogisikerek mene a'nogo nen, an malaikat en, at atitigeke mene yogoisoagalùk lakhani wagama wagì o,” ìlùk yogonete.

⁷ Atì'nogo yogonetenem, at Yesùt en he, mel yogonete: “Lakhan! An heageak wesigin o. Atì'nogo waganem sa nen yì wene tì wene helal waganek mene yì asuk hologo higit hogo hagatì logogin halok, Ala nen hanothikenem a'la hai hakegein o,” ìlùk yogonete.

⁸ Atì'nogo yogonetomo, yì wene tì wene obogat yì re, an Yohanet yogonetenem nasuk holhìk, neileken hìgìk, ìgì o. Atì'nogo nasuk holhìk, neileken hìgìk, ìgìrìk he, at malaikat wene atì an neileken lakhoagalùk yakùlnetì laga mene a'nogo, neitep awì yagasogo hogorasigìlùk ìgì.

⁹ Atì'nogo meneat he, at en mel yogonete: “Hùk. An atì'nogo hogo'nabusak lek a. An nebe re, hat mel, hagaiya'lak aike at Ala ane yogoisagarek mene mel, it aike inebe obogat wene helal waganek yì inasuk hologo higit hogo hagatì logogun mene mel, ninom higit, ninebe at Ala atitigeke ne'ma re, hetaùken at Ala oba hìpìrethìlìk, at enek hogorasusak o,” ìlùk yogonete.

¹⁰ Atì'nogo yogonetesik, hobuk yogonetì logolik: “Yì wene tì wene Ala nen ike mene yì hepogat haga'lasigin atì nen he, silo hagarek atì hak, Apùnì yogoisasak lek, ìlùk wene ha'la arìk kamo ìgì'lek yogoisìkì logoino o.

¹¹ Yogoisikenem, sa nen oabùt weak enek hagatì logogin akike halok he, weak enek hagarìkì logouak o. Nen, ea nen weak ina'meilo mene nek hagatì logogin akike halok he, atì meneat hagarìkì logouak o. Nen, sa nen Ala a'la akikerek mene nek hagatì logogin akike halok ho, atìat hagatì logouak o. Nen, ea nen ebe Ala hesik hisìlìk logogin akike halok he, ebe Ala hesik hisìlìk logouak o,” ìlùk yogonete.

^12-13 Atì'nogo yogonetomo, at Yesùt en yogonetì logolìk: “Ero mel, erepùl mel, anatma, emakum ero ba nen pìkìt hobuk elùgùn oba nesok motok logogin mene nen, apùnì inebe lopok inoabùt hagatarek mene higit hogoat oko wogisagalùk wolok heageak wesigin o.

¹⁴ Nen, it aike inasu hanorogo sobalogo hakìlìk logogun mene hùgì nek he, Ala nen hanorinapenem ina'la hai hakìlìk, e eken nikenem inelugurinaperek mene a'nogo eken nìkìk, nen o kota atoma kwe ape palekkwe nen wùlhìk-kìgìk, ìkì logouogolùk esewerek arìk logogun.

¹⁵ Atì'nogo meneat he, it apùnì aike weak ina'meilo mene hagatarek mene mel, it wesagùn akolek inoatarek mene mel, it pailak haksìgìk, haksoagalùk hagatìk, egarek mene mel, it apùnì inoare mene mel, it inetaùken tùgì hareken oba hìpìrìk logolìk hogoratarek mene mel, it inape ba nen lalinapìk, yì mene tì mene hagatì logolìk, lalinapìk, egarek mene inebe lopok mel, obogat o kota atì abel etakwe logogun o,” ìlùk yogonete.

¹⁶ Aìi'nogo yogonetesik, at Yesùt enat hobuk yogonetì logolìk he, “Yì wene tì wene yì abok, an nagot malaikat en hit nagainapùrì o yì awì tì awì atogotesep mene obogat yogohisoagalùk hinoba lakhei wagì atì re, an Yesùt enat o. Nen, e aku hulelherek atì hak, ap Taùt en tagokwe mene a'nogo re, an nebeat o. Nen, hesagal wap o mo yegelogo lagai wagarek higit en, lìabi wagarek mene apopok apik a'nogo re, anat o,” ìlùk yogonete.

¹⁷ Atì'nogo yogonetesik hobuk he, mel yogonete: “Sa nen i nele nen nasak walok halok he, i inelugurinaperek mene okolek welegat helìlìk noagalùk, Ala Areagùn mel, Topa Eak agwe negen ìkike mene a'nogo mel, eperak en ìkì logolìk, Na we'ni o, ìlùk yogoisikenem, it aike inebe lopok it eperak inane inasuk holì'lùgì mene nen, Na we'ni o, ìlùk ìkì logousagat o,” ìlùk ikenem holhì.

Wene elùgùn warogo yogosike wene

¹⁸ An Yohanet en hit aike wene hobuk haga'lasigin wene an yogonete mene atì hinasuk holugun mene hinebe lopok, wene aike yì yogohisak: “Sa nen wene helal wanhì mene yì werek kolegat, wene hùnogo mene oba labelhe halok he, Ala nen apùnì ùkùm inoba hìlìk weagarinabigin ìlùk ike mene helal waganogo hìgì mene yì higit hogoat, Ala nen at atì ùkùm aike inom oba labelogo oba hìlìk ebe weagathegeinat o.

¹⁹ Nen, sa nen yì wene tì wene hobuk haga'lasigin mene yogonete mene helal wanhì mene yì werek kolegat he, wene atì mene aike sebelogo pelape halok he, e eken nikenem inelugurinaperek mene atì eken aike at noagalùk werek meneat he, Ala nen he, Hat nasak lek, ìlùk, yogotìk, nen, o Ala okawerek awì kota a'nogo at atì esewerek arìk wùlhìk-kìgìk ìkì logouagalùk werek meneat he, Ala nen, Hat kusak lek, ìlùk, yogotìk, igin,” ìlùk yogohisìgì atì o.

²⁰ Nen, wene atì obogat he, eberogoat ìlùk ikerek mene, at Yesùt a'nogo nenat, “An heageak wesigin o,” ìlùk ìlì'logo. Atì'nogo ikenem, an nen he, “Yesùt noe. Hat heageak wesigin atì, ebe asuak u hak, Amin, we'no,” ìlùk ìgì.

²¹ Nen, hit Ala againapùrì o yì awì tì awì atogobesep mene obogat, nerùgì, nagaiya'lak. Ninoe Yesùt oabùt hano a'nogo nen hakhisek logouak o.