ABÌKAKAN 21 - Ala Ane Wene Ket Mene Warogo Wo'ninapike Wene

Ala nen pogot mel, kweang mel, ket mene hagasigin wene

¹ Atì'nogo hìgìrìk oba nen, opolik he, Ala nen pogot mel, kweang mel, alep mene legethìgìk, i laut yekelek legethìgìk, ikesik, obùlù'mo re, pogot mel, kweang mel, ket mene hagarogo hikomo were'ma hìgì.

² Atì'nogo hagarogo hikesik, at okawerek awì sili o kota Yerusalem ket mene, hìmì inagonì helùogolùk inalìlìke lì'lùk hogo wanharek atì hak, at were'ma pogot oba nen pelabi waganem hìgì.

³ Atì'nogo hìgìrìk oba nen, hobuk nasuk holhì hak he, at Ala kain welagarek obùlùk oba a'nogo nen, at aike ane hùkorogo ìkì logolìk: “Lakhani! Ala apùnì inom motok logogin mene, awì a'lì lakhani! Atì'nogo logolìk, it at againapùrìat logogun, nen, at Ala it inopase oba hìpìrìk logogun meneat logolìk, inom motok logogun o.

⁴ Atì'nogo logolìk, yì wene tì wene alep mene legetsìlìk, at en it ineil amusu arat terogo hìlì'mo nogo nen he, inebe wa'laga logogun legat, ina'la weak aga logogun legat, le aga logogun legat, heinet watì logogun legat o,” ìlùk ikenem holhì.

⁵ Nen, at Ala ebe kain welagarek obùlùk a'nogo ba logolìk, mel ike: “Yì mene tì mene obogat ket mene elalogo hìgì yoma lakhani,” ìlùk ikesik, an mel yogonete: “Wene yì hesik, apùnì nen he, Wene atì eberogoat, ìlùk hùthasak mene atì nen he, helal wanino o,” ìlùk yogonete.

⁶ Atì'nogo yogonetesik, hobuk aike mel yogonete: “Ero mel, erepùl mel, anatma, an nebe re, ero ba nen pìkìt, erepùl oba nesok motok logogin mene nen, i nele mene i inelugurinaperek mene elesimo nen hinagasogo oko lek welegat wogisìkì logogin o.

⁷ At sa nen omame asigin mene halok, wene obogat ìgì atì, at esewerek logogin o. Atì'nogo esewerek logolìk, an Ala at opase noba hìpìrìk logogin meneat logogin, nen at an napurat logogin o.

⁸ Atì'nogo meneat he, it apùnì aike inayùk hoporek mene mel, Ala ane wanharesik en heraksagarek mene mel, Ala a'meilo mene hagatarek mene mel, apùnì inoare mene mel, pailak haksìgìk haksoagalùk hagatìk, egarek mene mel, wesagùn akolek inoatarek mene mel, tùgì hareken oba hìpìrìk logolìk, hogoratarek meme mel, inapeliak egarek mene obogat mel, i laut etu mene yekelek were'ma, hetalì al hake obasi weak mene etage belerang inom-inom amulok nike motok welagare'ma atoma laksegein o. Laksegein atì re, inebe alep elama hesik wa'larìk oba nen hobuk wa'lasugun atìat o,” ìlùk yogonete.

O Yerusalem ket mene eileken lakhasike wene

⁹ Atì'nogo yogonetesik oba nen opolik he, Ala nen elùgùn kobok apùnì weagarinabuagalùk, it malaikat inebe 7 nen Ala a'mage i negen hinago wolok kesali wagaika mene amanogo mene aike wagasik mel yogonete: “Topa Eak en agwe negen ìkike mene atì ebe yakùlhesumo heileken lakhanok en eme o,” ìlùk yogonete.

¹⁰ Atì'nogo yogoneto kolek, Ala Areagùn noba louk i wagama re, at malaikat a'nogo nen wo'narek tom hùko uan oba lagaikesik, Ala okawerek awì o kota Yerusalem pogot oba Ala nen pelabi waga mene a'nogo yakùlnetomo lakhìgì.

¹¹ O kota atì re, Ala ebe apipin hogoratarek hagatma re, apipin helep amùlìreak oko apik palharek mene etage pailuri pandan elokoken muliak hano inapùnak hake mene hìgì.

¹² Nen, leget pa'leget hùko uan wùrì'mo re, kwe ape 12 nen palek. Nen, kwe ape palek ebe lopok oba, apùnì Isirael mene inùkùl etage 12 nenat helal wagane'ma re, it malaikat inebe 12 nenat kwe lopok oba kagalek welagaika.

¹³ Nen, o kota atì, abel mo yegelogo lìabi wagarek higit he, kwe ape 3 ba palek welaga. Nen, abel pokwe higit he, kwe ape 3 baat palek welaga. Nen, abel makwe higit he, kwe ape 3 baat palek welaga. Nen, abel mo korok hogo kikerek higit he, kwe ape 3 baat palek welaga.

¹⁴ Nen, leget pa'leget wùrìk atì, obùle helep ebe 12 nenatma re, at Topa Eak en inebe 12 nenat wenagasogo inayoko hìlìk laksasike mene amanogo inetage helal waganek welaga hìgì.

¹⁵ Nen, at malaikat an wene yogonetì laga mene a'nogo nen, o kota a'nogo mel, kwe ape palek amanogo mel, leget pa'leget wùrìk a'nogo mel, ìlìreke emas mene ba walhagalùk hesogo were'ma lakhìgì.

¹⁶ Atì'nogo hesogo logolìk ebe walhìkì logolìk, o kota a'nogo okut 4 oba hagare'ma re, aleget heta-heta uankwe lek, horokwe lek, eperak higitmo re, ìlìreke a'nogo ba walhìkì laga. Atì'nogo walhikenem, leget aleget heta-heta ho, atuli elùgùn ho, hùlì it ineki wenatarek higit he, 12.000 nen, nen, nit yoma wenatorek higit he, 2.400 kilometer haga'laganem hìgì.

¹⁷ At malaikat a'nogo nen apùnì nen walhagarek hake leget pa'leget a'nogo walhike mene re, hùlì it ineki wenatarek higit he, 144 en, nen, nit yoma wenatorek higit he, 600 meter hake aganem hìgì.

¹⁸ Leget pa'leget atì re, helep amùlìreak oko apik palharek mene etage pailuri pandan atì mene hagarek. Nen, o kota atì ebe emas elokoken hano inapùnak hake mene hìgì.

¹⁹ O kota atì, leget pa'leget obùle wùrìk he, yì helep tì helep oko apik mene etage permata mene eil lebelogo wùrìk. Helep obùle nomor 1 etage pailuri pandan atì mene wùrìk. Nen, opolik, helep obùle nomor 2 etage nilam atì mene wùrìk. Nen, opolik helep obùle nomor 3 etage yakut atì mene wùrìk. Nen, opolik helep obùle nomor 4 etage samarut atì mene wùrìk.

²⁰ Nen, opolik he, helep obùle nomor 5 etage pailuri sepa atì mene wùrìk. Nen, apolik he, helep obùle nomor 6 etage lelima atì mene wùrìk. Nen, opolik he, helep obùle nomor 7 etage era'na sempaka atì mene wùrìk, Nen, opolik he, helep obùle nomor 8 etage pirùt atì mene wùrìk. Nen, opolik he, helep obùle nomor 9 etage topat atì mene wùrìk. Nen, opolik he, helep obùle nomor 10 etage kerisoperat atì mene wùrìk. Nen, opolik he, helep obùle nomor 11 etage lasuari atì mene wùrìk. Nen, opolik he, ebe elùgùnmo helep obùle nomor 12 etage kesubung atì mene wùrì'mo hìgì.

²¹ Nen, kwe ape palek ebe 12 nen amanogo kwe sou lopok helep oko apik mene etage mutiara atì mene hagarek. Nen, o kota atì kwe negarekkwe obogat he, emas mene elokoken muliak hano inapùnak hake mene malek were'ma hìgì.

²² Atì'nogo hìgì meneat he, o kota atoma Ala omame api'mo yì mene tì mene hagasusak enek a'nogo ho, Topa Eak a'nogo ho, eperak inebe Ala awì wùrìk negen werek kolek nogo nen he, Ala awì wùrìk aike were'ma hìgì lek.

²³ Nen, o kota atoma Ala apopok yatìk, Topa Eak a'nogo esage hake yatìk, lìarogo yato kolek nogo nen he, mo mel, tugi mel, yatì logousak legat welaga hìgì.

²⁴ Atì'nogo apopok apik werek kolek nogo nen he, apùnì kweangma mene inùkùl etage lopok aike apopok atì ba nìkì logogun. Nen, it ap kaintek inetagepogot kweangma mene inagarok yì mene tì mene oko apik mene were'ma hogorinaparek mene atì wolok o kota a'nogo hei kìkì logogunat.

²⁵ Nen, o kota atoma o hi ìgì'lek likene motok logogin atì nen he, leget pa'leget wùrì'mo kwe ape palek ebe lopok, kwe sou yagatì'lek hùrìk motok logogin hìgì.

²⁶ Nen, apùnì inùkùl arek mene atì wolok o kota atoma hei kìkì logogun.

²⁷ Atì'nogo kìkì logogun meneat he, apùnì weak ina'meilo mene hagatìk, inapelìak ìgìk, ìkì logolìk inoba horinapì'lek mene o atoma kìkì logogun motok lek hìgì. Atì'nogo meneat he, it aike ineluk motok logouagalùk hanorinabigin mene hùgì inetage helal waganogo Topa Eak arùesika ba hike mene nek o atoma kìkì logogun hìgì o.