ABÌKAKAN 20 - Ala Ane Wene Ket Mene Warogo Wo'ninapike Wene

Mo lagagik pìgìk iko kolek 1.000 tahun logogun wene

¹ Atì'nogo isìgìrìk oba nan, apolik he, at malaikat aike pogot oba nen kwe hùtùkwe etage kunci a'ma baga ma'loma mene ho, halo kopì posie omaken mene ho, ekimo wolok pi waganem lakhìgì.

^2-3 Atì'nogo wolok pi wagasik, at walo hake hùko o holo nen welagaike mene etage Ibilit ìgìk, Setan ìgìk, egarek mene a'nogo, ebe hakhìlìk, yì apùnì tì lalinaperek atì hak lalinapì'lek 1.000 tahun eki hele warek a'ma baga ma'loma logouagalùk pelapesik, kwe kekalim yagarogo kelaksagarek atì hak, kwe kunci yagarogo hikenem hìgì. Atoma logopik en, hikalogo lìakhei wesusak obaat eil omake hesik hikalek logouagalùk hikalogo lìakhei wesigin.

⁴ Atì'nogo hìgìrìk oba nen, opolik he, ap kaintek inobùlùk apik were'ma atoma inebe apigat kain logolìk, apùnì aike inawe a'ma hisìlìk hagisek logolìk ùkùm inoba hìgìk, kotìk, ìkì logouagalùk esewerek hisagama isìgì. Nen, aike hìgì re, it apùnì yeke lo yeke hake hùko mene a'nogo mel, sukwan at ebe hake hagarek a'nogo mel, hogorinapì'lek, etage salek helal waganek a'nogo inetaùken wekelogo ineilhaken oba he a? Ineki ba he a, wanhì'lek heraksìlìk, Yesùt hagatì lagaike mene yogoisìlìk negarek hesik ho, Ala ane hesik ho, inalokop palogo inoasukwa mene arat inapotkwe inelugurinabìk, menhisikesik, at Karìsùt inom apùnì aike inawe a'ma hisìlìk hagisek, mo lagagik pìgìk iko kolek 1.000 tahun welagaika isìgì.

⁵ Apùnì wa'lagaukwa mene emakum atìat inelugurinapesik menhisike isìgì. Atì'nogo meneat he, it apùnì wa'lagaukwa mene hetakwe aike nek he, o mo lagagìk, pìgìk, iko kolek inapotkwe inelugurinapì'lek 1.000 tahun hagasuagalùk hisikomo were'ma isìgì.

⁶ It apùnì emakum wa'lagaukwa mene aike hobuk warek motok logouagalùk ùkùm inoba hìlìk inoasumo wa'lasugun. Meneat he, it aike emakum inapotkwe inelugurinabìk, inebe Ala hesik hisegein mene atì nek he, ina'la motok hai hakogoin o. It atì hobuk wa'lagì'lek logolìk, inebe Ala mel, Karìsùt mel, eperak esewerek arìk, o mo lagagìk, pìgìk, iko kolek 1.000 tahun oba, it Karìsùt inom apùnì aike inawe a'ma hisìlìk hagisek logogun isìgì.

Ibilit mabenetsìlìk etu ai'mo laksegein wene

⁷ Atì'nogo isìgìrìk oba nen, opolik he, o mo lagagìk, pìgìk, iko kolek, 1.000 tahun arat logopik en, elùgùn kopok hogo re, Ibilit eki hele warek a'nogo hele hikalogo lìabi wesigin.

⁸ Atì'nogo lìabi waganem he, weim yabuogolùk, apùnì inùkùl etage lopok pogot erokwe-erokwe 4 oba po yùkwe, ma yùkwe, ìlìkwe, yìkwe, welagaikarek mene lalinabigìlùk ina'la menerìk laga laga hìgì. Atì re, o etage Ogok mene mel, Magok mene mel, inoba weim yoko lagasik, inebe motok apik i al laut yekelek esakokwe welagarek atì hake atogorogo hisikomo welagaika isìgì.

⁹ Atì'nogo atogotasik, apùnì Ala againapùrì o kota Ala awì sili etaùken hutik mene a'nogo logolhìlìk were'ma o larogo inebe inoasuogolùk pùpùn hogo ki wesuogolùk ikenem he, etu pogot oba nen pi waga logolìk, inebe halì lùk hogo nìkì laga isìgì.

¹⁰ Atì'nogo niko kolek, at yeke lo yeke hake a'nogo ho, at aike nen, “An Ala ane yogoisìkì lagì,” ìlùk apeliagat lalinaperek mene a'nogo ho, i laut etu mene yekele'ma hetalì al hake obasi weak mene etage belerang inom-inom amulok niko motok welagam'ma atom wouk hogo pelaksasike a'nogo atoma were'ma, Ibilit a'nogo hobuk inoba wouk hogo pelaksikoma inom atoma logolìk, likene hùako heinet wato moto'-motok logogun isìgi.

O elùgùn oba ùkùm inoba hìgìk, kotìk, igin wene

¹¹ Atì'nogo hìgìrìk oba nen, opolik he, Ala kain welagarek obùlùk hùko kut mene were'ma, at ebe atoma welaga hìgì. Atì'nogo were'ma pogot, kweang, obogat, at agaserogo lek arì'mo nogo nen he, hobuk ineileken hasak legat aga laga hìgì.

¹² Atì'nogo lek aga kolek, apùnì wa'lagaukwa mene inetagewerek mel, inetage lek mel, at kain obùlùk oba werek a'nogo elokoma metek were'ma isìgì. Atì'nogo werek kolek, sùesika obogat hukalhìk, sùesika aike apùnì ineluk motok logouagalùk hanorinabigin mene hùgì inetage helal waganek mene hukalhìk, ìkì laga. Atì'nogo hukalhìlìk, it apùnì wa'lagaukwa mane inoabùt hagatì lagaukwa mene sùesika atoma ba helal waganek mene higit hogoat ùkùm inoba hìgìk, kotìk, ìkì laga hìgì.

¹³ Atì hagat, apùnì hetakwe wa'lagaukwasik, i laut yekele'ma welagaikarek mene, i laut en helelogo wulaksa wagìk, apùnì wa'la'luk a'ma baga pisukwa mene, at wa'lagwì ero mel, a'ma baga mel, esewerek welagarek mene a'nogo nen lìaksa wagìk, ikenem he, at Ala nen it inebe lopok inoabùt hagatì lagaukwa higit hogoat ùkùm inoba hìgìk, kotìk, ìkì laga hìgì.

^14-15 Ùkùm atì'nogo inoba hegein atì re, sùesika it apùnì aike inebe lopok ineluk motok logouagalùk hanorinabigin mene hùgì, inetage helal waganek a'nogo ba wanhì'lek mene halok, atì'nogo i laut etu mene yekelek atì ba wouk hogo pelaksìkì logolìk, a'ma baga mel, wa'lagwì ero mel, inomat wouk hogo atomaat pelaksìkì laga hìgì. Atì'nogo pelaksìkì laga atì re, alebagik elama hesik wa'larì'mo nen, hobuk wa'lasugun he, i etu mene yekele'ma pelaksegein atìat o.