ABÌKAKAN 2 - Ala Ane Wene Ket Mene Warogo Wo'ninapike Wene

Wene it Ala againapùrì o Epesùt mene hesik yogosike wene

¹ Atì'nogo yogonetesik hobuk mel yogonete: “An neki ebekwe hesagal ebe 7 nen hesogo logolìk, esage kìalhùkwe ebe 7 nen esok telik emas mene hagarek a'nogo esakokwe werek kolek, a'la tùlem nìgìrek mene a'nogo nen wene yì yogohesik: At Ala nen malaikat ayoko hìlìk lakhei wesu hak, at againapùrì o Epesùt atogotarek mene inayoko hìlìk hisasikomo werek a'nogo, wene an nen it yogoisegein mene yì hat en helal waganogo inoba lakheinok en, it mel yogoisak:

² Hit en an hesik hinepe morogo hinomamerogoat hagatì logolìk, it aike weak hagatenem he, Inoba lopok, ìlùk, inasuk watì'lek heraksegesep lek. Nen, it aike Yesùt en laksa wagama negen hagarogo wìrìk ikenem, hit en he, Inapeliak ìlì'lùgì, ìlùk inoabùt enagat palhesebat. Hinoabùt atì'nogo hagatesep atì, an nelu o.

³ Nen, apùnì nen an hesik yì aik tì aik hagathinapo kolegat, hit en he, At ninabìt, ìlùk, herakhanhì'lek hinepe morogo welagasebat.

⁴ Atì'nogo meneat he, emakum hinetaùken an noba hutik welagagip atì hak, yogotak atì'nogo welagep lek atì nek he, Weak hagarì'lùgì, ìlùk hinoabùt palhì lagì o.

⁵ Atì halok he, hit kopok hogo motogat pegesip welagep atì, hina'la ebethìlìk, hinoabùt hebelarìk he, alep hagatì lagagip atì hagat hagatì logoino o. Atì'nogo hagatì'lek halok he, an nebe wìrìk he, hit mene esage kìalhùkwe atì obùlù'mo nen kìgìlogo wokhegein o.

⁶ Atì'nogo meneat he, it aike ap Nikolaùt oabùt waganogo hagatenem, an napsìrì hisìgìrek hagat, hit hinapsìrì hisìkì lagep atì nek he, hano o.

⁷ “Wene ìgì mene atì, at Ala Areagùn nen Ala againapùrì o yì awì tì awì atogotarek mene yogoisìlì'logoat atì, hinasuk holusak halok he, hanorogo holino o. “At sa nen omame asigin halok he, Ala eyabumo eken inelugurinaperek mene noagalùk melagasigin o, ìlùk wene obogat yogoisìgì mene atì, helal waganogo inoba lakheino o,” ìlùk yogonete.

Wene Ala againapùrì o Simirina mene hesik yogosike wene

⁸ Atì'nogo yogonetesik, hobuk yogonetì logolìk, “An he, ero ba nen pìkìt erepùl oba motok logogin mene a'nogo arat wa'lagagisik en hobuk neluk agagisik welagìrek mane a'nogo nen, wene yì yogohesik: At Ala nen malaikat ayoko hìlìk lakhei wesu hak, at againapùrì o Simirina atogotarek mene inayoko hìlìk hisasikomo werek a'nogo, wene an nen it yogoisegein mene yì, hat an helal waganogo inoba lakheinok en, it mel yogoisak:

⁹ Hit ebe mene hesik hinebe kain hineilmo wùlalhak meneat he, it apùnì Ibilit againapùrì meneat he, inapeliagat, Nit ninebe Yahuri mene, ìlùk ìkì logolìk, hit hinetage weak hagarogo weak hagathinapenem, hinebe hinelageik weak welagep atì, an neluat o.

¹⁰ At Ibilit en hit hina'la kagaluagalùk, apùnì hit mene hetakwe ineki hele warogo hisamo, ineki 10 nen yì aik tì aik hìkì logogun atì re, hinayùk agùp o. Yì aik tì aik atì'nogo hagathinapo kolek, hinetaùken noba hìpìrethìlìk, an ninom hutik were'ma wa'lasugun halok he, sa awewerek sa awewerek laganem, it inomame agaikarek mene oko kare-kare ìksagarek atì hak, oko nabùlal-habùlal hagathinabigin o.

¹¹ “Wene yogoisìgì atì Ala Areagùn nen, Ala againapùrì o yì awì tì awì atogotarek mene yogoisìlì'logoat atì, hinasuk holusak halok he, hanorogo holino o. “Sa nen omame asigin halok he, it aike wa'larìk hobuk moto'-motok wa'lasugun atì, inom weagarinabigin lek o, ìlùk wene obogat yogoisìgì mene atì helal waganogo inoba lakheino o,” ìlùk yogonete.

Wene Ala againapùrì o Perekamùt mene hesik yogosike wene

¹² Wene atì'nogo yogonetesik, hobuk yogonetì logolìk he, “An karok ela heta-heta mago mene nekimo hesogo welagì mene a'nogo nen wene yì yogohesik: At Ala nen malaikat ayoko hìlìk lakhei wesu hak, at againapùrì o Perekamùt atogotarek mene inayoko hìlìk hisasikomo werek a'nogo, wene an nen it yogoisegein mene yì, hat helal waganogo inoba lakheinok an, it mel yogoisak:

¹³ Hit he, Ibilit ebe kain logolìk apùnì aike awe a'ma hagisek welagarok oba welagasep atì an nelu o. Atì'nogo Ibilit auaat logolìk, an naput Anitipat en nabok aberalì agì'lek, oabùt hùpùn hogo yogoisìlìk nikenem, it aike nen ebe hina'la nen watenem, hit en he, Nit ninetaùken Yesùt oba hìpìrìk welagorek atì lek, ninabìt, ìlùk kopologo herakhanhì'lek, ninom hutigat motok welagasep atì, hinoabùt an nelu o.

¹⁴ Atì'nogo meneat he, wene hamùlùgat aike an nabìt mene hagatì lagep mene atì yogohisak o. Hageat apùnì Isirael mene inebe weak asuagalùk, wam tùgì ako warek mene kùrìk nìkìk, pailak haksìgìk, uagalùk, ap Pileam en Palak yakùlesikomo, at en ina'la kagalhì lagaike mene atì, hit aike at awene atì hesogo welagep hisìgì.

¹⁵ Nen, hit aike nen, wene ap Nikolaùt en yakùlisasike mene awene atì waganogo hesogo welagasebat atì. Atì'nogo hagatesep atì, an nabìt motok akìkì lagì o.

¹⁶ Nabìt akìkì lagì atì nen he, hit weak hagatì lagep mene atì heraksìlìk hinoabùt hebela'no o. Atì'nogo hebelagì'lek halok he, hit an karok napema mene ba hinoasigìlùk hepogat wesigin o.

¹⁷ “Wene yogoisìgì atì, Ala Areagùn nen it Ala againapùrì o yì awì tì awì atogotarek mene yogoisìlì'logoat atì, hinasuk holusak halok he, hanorogo holino o. “Sa nen omame asigin mene halok, sùpùrùk etage manna abùrarek mene melagatìk, etage ket mene salogo helep mola mene ba helal waganogo wogotìk, igin o. Etage waganek atì re, it aike inokot. We, at etage helal waganek helegein mene atì nek elu asigin mene wogosigin, ìlùk obogat yogoisìgì mene atì, helal waganogo inoba lakheino o,” ìlùk yogonete.

Wene Ala againapùrì o Tiatira mene hesik yogosike wene

¹⁸ Atì'nogo yogonetesik hobuk mel yogonete: “An Ala aput neileken etu amulok hake, nen, nesok he, tembaga etumo weratenem apipin here-here ikerek atì hake a'nogo nen wene yì yogohesik: At Ala nen malaikat ayoko hìlìk lakhei wesu hak, at againapùrì o Tiatira atogotarek mene inayoko hìlìk hisasikomo werek a'nogo, wene an nen it yogoisegein mene yì, hat en helal waganogo inoba lakheinok en, it mel yogoisak:

¹⁹ Hit hinoabet hagatesep mene atì an nelu o. It apùnì aike hinetawìrogo welagasep atì mel, hinaberalì agì'lek hinoabùt hùpù hogo welagasep atì mel, it aike leberisegesep atì mel, it aike nen yì aik tì aik hinoba hiko kolek, hinepe morogo welagasep atì mel, obogat an nelu o. Nen, alep hamùlùgat negen hagatì lagagip meneat he, yogotak motok apik hagatì lagep atì, an neluat o.

²⁰ Atì'nogo meneat he, at he Isebel a'nogo nen apeliagat, An nebe Ala ane yogoisigirek meneat o, ìlùk apùnì an natitigeke mene inebe apigat pailak haksìkì logouagalùk yakùlisìgìk, wam tùgì ako warek mene kùrìk nìkì logouagalùk yakùlisìgìk, iko kolek, hit en he, wenagatì'lek, At oba lopok, ìlùk, herakhìkì lagep atì nek he, It weak hagarì'lùgì, ìlùk hinoabùt palhì lagì o.

²¹ At he atì, pailak hakhouagalùk hagarì'logo mene atì heraksìlìk oabùt hebelasuagalùk serogo welagì mene re, at hagarì'logo mene atì, heraksìlìk oabùt hebelasusak he, abìt o.

²² Wene yì hina'la eberek logoino: It ap aike nen, he atì inom pailak hakhagarek mene heraksìlìk, inoabùt hebelagì'lek halok he, it heinet wasuagalùk, he atì nogo ikerek oba nen inabisak sagaligin o.

²³ Atì'nogo hagatenem, it Ala againapùrì o yì awì tì awì atogotarek mene obogat en ineileken hìlìk, it en he, At Ala re, apùnì ina'la ebetarek mene atì mel, inetaùken kagalharek mene atì mel, elumo re, apùnì ninebe lopok ninoabùt hagatorek mene higit hogoat ùkùm ninoba hìgìk, oko wo'nisìgìk, igin o, ìlùk, an hùthanuagalùk, it apùnì at he atì ane wanharek mene inebe inoasiginat o.

²⁴ Atì'nogo meneat he, apùnì aike nen, He atì awene, Ibilit awene a'la mene yakùlisikerek, ìlùk egarek mene atì, hit apùnì o Tiatira mene he'nakwe nen, wene atì yakùlhìk, hinelu agìk, ìgì'lek atì nen he, hit en wene ekin mene aike hagasuageip en ìlùk yogohisegein lek o.

²⁵ We, an wesigin atì oan wagì'lek werek kolek, wene wanhigip mene atìat hineki ning hogo hesogo logoino o, ìlùk yogohisìgì atì.

^26-27 “Sa nen an walok mene hagato motok hùlì o elùgùn oba omame asi legein halok he, an nopase nen apùnì inùkùl etage lopok, an nen hagisek logouagalùk menhanìlìk esewerek hanhike atì hak, at omame asi legein mene atì atì'nogoat hagisek logouagalùk menhìlìk esewerek houmo, apùnì nen sìge lùk posie omaken mene ba kweang harogweak mene tamuk-tamak hogo hagatarek atì hak, at ane omamerogo yogoisìkì logolìk, hagisek logogin o.

²⁸ Nen, hesagal wap o mo lagai wagarek higit en lìabi wagarek mene a'nogo wogosiginat o, ìlùk yogohisìgì atì,

²⁹ Ala Areagùn nen it Ala againapùrì o yì awì tì awì atogotarek mene yogoisìlì'logoat atì, hinasuk holusak halok he, hanorogo holino o, ìlùk yogoisìgì mene atì, helal waganogo inoba lakheino o,” ìlùk yogonete.