ABÌKAKAN 19 - Ala Ane Wene Ket Mene Warogo Wo'ninapike Wene

¹ Atì'nogo ikenem holhìrìk oba nen, opolik he, apùnì apik logolek pogot oba logolìk inane hùkorogo mel ikenem holhì: “Ninopase Ala homame apik, u a e, Ninebe telninapetek, u a e, Harat hogothabusak, u a e, Hogothapì lago u hak, u a e, Haleluya ìkì lago, u a e.

² Hat en ùkùm inoba hìgìk, kotìk, u a e, Eberogoat enek egetek, u a e, Higit hogo nek egetek a'nogo nen, u a e, Apùnì o Pabel mene inoabùt, u a e, He yanani nìlìk nikerek mene hake amanogo nen, u a e, Apùnì o yì awì tì awì welagaikarek mene, u a e, Weak hagarinaparek atì nen, u a e, Ùkùm inoba hegetik weagarinapen, u a e, It en hatitigeke mene inamep wulagasogo inoasukwa hesik, u a e, Inùkùlmo inoaten atì nen, u a e, Hogothapì lago, u a e,” ìlùk etawì watì lagaika.

³ Atì'nogo watasik en, hobuk aike watì logolìk he: “Ala ninopase, u a e, Hogothapì lago, u hak, u a e, Haleluya ìkì lago, u a e, Apùnì Pabel mene inesi hule, u a e, Palagì'lek lagaiko motok werek, u a e,” ìlùk ìkì lagaika.

⁴ Atì'nogo iko kolek, it ap inalùgetek inebe 24 en amanogo ho, it Ala nen elalinapikomo ineluk welagaikarek mene inebe 4 en amanogo ho, inom en at Ala ebe kain welagarek obùlùk oba were'ma awe a'ma kìlìk, ineitep awì yagasogo hogoratì logolìk mel ìkì lagaika: “Ebe asuak,” u hak, “Amin,” ìgìk, “Hogothapì lago,” u hak, “Haleluya,” ìgìk, ìkì lagaika.

Topa Eak agwe negen ìgìtì logolìk, pesta hagasugun wene

⁵ Nen, Ala kain welagarek obùlùk oba a'nogo nen mel ìkì lagaika holhì: “Hit Ala atitigeke kaintek ho, kepùtek ho, obogat Ala hinayùk hogo welagasep mene ninopase Ala hogoratì logoino o,” ìlùk ìkì lagaika holhì.

⁶ Atì'nogo ikenem nasuk holhìrìk oba nen opolik he, apùnì apik atogorek logolìk, inane re, i hat hùko mene ane ikerek hake ho, okuku ane hùko pak ìlìk en lulu lagarek ane hake ho, mel ìkì lagaika: “Ninopase Ala hogothapì lago, u hak, Haleluya, ìkì Iago. Hat homame motok api'mo, yì mene tì mene hagasusak enek a'nogo nen, yogotak arat hawe a'ma hinegetik ha'nisek welagen o.

⁷ Atì'nogo logolìk, Topa Eak agwe negen ikagalùk awì arat we ikomo, at agwe negen a'nogo okawerek en arat tomok hogo hakìlì'mo nogo nen he, ebe arat isigin atì nen nina'la hairogo, akiluk hogo, at hogoratì logouok o.

⁸ Agwe atì'nogo ikagalùk, asu kut elokoken hùrùl-herelsek hano mene laberek logouagalùk wogotomo hìgì. Su hano atì ebe re, apùnì Ala againapùrì inoabùt higit hogo hagatarek mene atìat o,” ìlùk ìkì lagaika.

⁹ Atì'nogo ikenem holhìrìk oba nen, at malaikat a'nogo nen mel yogonete: “It apùnì Topa Eak agwe negen ìkìkì logolìk, pesta isago na wesuagalùk inayoko haga mene hùgì ina'la hai hakoak o, ìlùk helal wanino o,” ìlùk yogonetesik, hobuk yogonetì logolìk: “Wene yì re, eberogoat Ala nen ike mene o,” ìlùk yogonete.

¹⁰ Atì'nogo yogonetì lagama, an nen, at malaikat a'nogo awe a'ma kìlìk neitep awì yagasogo hogorasigìlùk ìgì meneat he, at en yogonetì logolìk: “Hùk. Atì'nogo hogo'nabusak lek o. An nebe re, hat mel, hagaiya'lak mel, ninom higit. Wene Yesùt en yogonisasike mene yogoisìlìk negarek mene atì, at Ala Areagùn nen ina'la kagalogo yogoisikenem yogoisagarek atì, wene ero at Yesùt en yogonisasike atìat o. Halok he, at Ala at hogorasusak o,” ìlùk yogonete.

Ap aike wam kuda esi kut mene ba hùrek were'ma eileken lakhasike wene

¹¹ Wene atì'nogo yogonetesik oba nen opolik he, pogot healaganem wam etage kuda esi kut mene apot oba, ap aike etage re, Hùpùhogohagarìk, ìgìk, Eberogoarìlìk, ìgìk, egarek mene, hùrek logolìk, weim higit hogo yapìk, ùkùm higit hogo inoba hìgìk, kotìk, ìlìk nikenem lakhìgì o.

¹² Ap atì eileken he, etu amulok hake, nen ùkùloak oba re, karekare ebe apik ap kaintek inetagepogot ìksagarek atì hake ugu. Nen, at etage salek aike hùnogo mene at oake helal waganek were'ma apùnì obogat inokot, we, at okawerek enek elu mene helal waganek welaga hìgì.

¹³ Nen, at atì asu uan mep labùlìk mene laberek, nen, etage inelumo ìkì lagaika re, Alaane.

¹⁴ Atì'nogo laberek nikenem, ap ekaragùntek pogot oba mene obogat logolek inasu kain lenan su kut mene laberek, nen, inebe lopok inako kuda esi kut mene apot oba hùrek logolìk, at opolik nikenem lagisìgì.

¹⁵ At atì'nogo nìkì logolìk, apùnì inùkùl etage lopok obogat mabenetsegein mene, karok ela apik mene apelema nen wùlìbi waga laga hìgì. Atì'nogo mabenetsìlìk sìge lùk posie omaken omame apik atì hak, at ane omame ba apùnì haksìlìk, opase Ala omame motok api'mo re, yì mene tì mene hagasusak enek a'nogo a'mage lagalìk, ùkùm inoba hikenem anggur eken amusu keraluogolùk obùlùk oba sagalharek atì hak, at esok en al lebelinabigin mene hìgì.

¹⁶ Nen, at etage salek aike yì'nogo: “Ap kaintek inetagepogot obogat ho, inogogì kaintek obogat ho, inoe kain Netagepogot he, anat o,” ìlùk asu uan oba mel, apulok oba mel, helal waganek were'ma hìgì o.

^17-18 Atì'nogo hìgìrìk oba nen opolik he, at malaikat aike mo oba metek logolìk, ane hùkorogo it yì rùe tì rùe obogat pogot obakwe higit tùlem purogo nikenem, mel yogoisìkì laga: “Ap kaintek inetagepogot mel, weim wenewule mene mel, inagoromì kabelek mene mel, wam kuda ebe mel, ap apot oba hùrek negarek mene mel, apùnì inetagewerek mene mel, inetage lek mene mel, inatitigeke mene mel, inalepma welagaikarek mene mel, obogat Ala nen inoatesik ineino apigat hikike mena noageip en hinebe atogosi we'ni o,” ìlùk ikenem holhì.

¹⁹ Atì'nogo holhìrìk lakhìgì hak he, yeke lo yeke hake hùko a'nogo agoromì kaintek inetagepogot kweangma mene ho, inagoromì tentara mene ho, inom en, at wam kuda apot oba hùrek a'nogo ho, agoromì tentara mane ho, inom weim yabuogolùk inebe logolek were'ma isìgì.

²⁰ Atì'nogo were'ma, at aike hageat wagaikesik, “An Ala ane yogohisìkì lagì,” ìlùk apeliagat at yeke lo yeke hake a'nogo eilhanem elalin mene hagatì lagaike a'nogo nen, lalinapenem eberogoat salek, it apùnì aike nen he, “Nit at yeke lo yeke hake oabùt weak mene yì agoromì,” ìlùk silo negen inoba wanhìk, inetaùken sukwan at yeke lo yeke bake hùko a'nogo ebe hake hagarek a'nogo oba hìpìrethìgìk, ìkì lagaika meneat he, yogotak at yeke lo yeke hako a'nogo ebe ho, apeliak lalinapì laga mene a'nogo ho, eperak haksìlìk, hele warogo i laut etu mene yekele'ma hetalì al hake obasi weak mene etage belerang inom-inom amulok niko motok welagare'ma atoma inebe inelukeke laksìkì laga hìgì.

²¹ Atì'nogo laksìkì logolìk, apùnì it inagoromì obogat heraksalùk lagaika mene, at wam kuda apot oba hùrek nìkì laga a'nogo apelema nan karok wùlìbi waga logolìk inoatì laga. Atì'nogo inebe warogo hisikomo yì rùe tì rùe obogat wagaikasik, ineino inalabut ning hogo nìkì lagaika isìgì.